2/7/2023
Today from Hiiraan Online:  _
Wararka Maanta- Arbaco, Aug 7 , 2013
Hay’adda HARO oo Zakaatul Fidri u qaybisay Indhoolayaal iyo Barakacayaal ku nool Muqdisho iyo Jubbada Hoose (SAWIRRO)


Arbaco, August 07, 2013 (HOL) — Hay’adda gargaarka bani’aadmanimo ee Afrika (HARO)  ayaa  gargaar raashin ah oo loogu talo-galay sakaatul fidriga ka qaybisay degmada Wadajir ee gobolka Banaadir iyo magaalada Kismaayo ee gobolka Jubbada Hoos, iyadoo loo qaybiyay dad dan-yar oo ay ku jireen kuwo indhoolayaal ah.

Gargaarkan oo ka koobnaa Bur iyo Bariis ayaa waxaa soo ururiyay walaalaha Soomaaliyeed ee ku nool waqooyiga Ameerika, iyagoo ugu talo-galey in la siiyo dadka ku dhibaateysan gobollada Banaadir iyo Jubbada Hoose, iyadoo intii ay socotay qaybinta deeqdaas ay goob-joog ka ahaayeen mas’uuliyiin ka tirsan xafiiska HARO ee Soomaaliya

Intii lagu jiray bishii Ramadaan waxay hay’adda HARO ku howlanayd afurinta dadka heli karin afurka, iyadoo isku garab-wadday raashin qaybinta bisil iyo mid cayriin, kuwaasoo lasoo billaabay billowgii bishan Ramadaan ay illaa iyo hadda ka waddo gobollada kala ah: Banaadir, Jubbada Hoose, Puntland iyo Somaliland.

Dadkii ka faa’iideystay sakaatul fidriga iyo kuwi la afurinayay Ramadaanka ayaa waxay si aad ah ugu mahadceliyeen hay’adda HARO iyo dadkii gacanta ka geystay mashruucan, waxayna ka codsadeen hay’adda inay mar kasta oo la gaaro bisha Ramadaan ay halkaas kawaddo barnaamijyada lagu afurinayo dadka masaakiinta ah ee aan waxba haysan.

Sidoo kale, waxay ugu baaqeen inay halkaas kasii waddo bixinta zakaatul fidriga, iyadoo mas’uuliyiintii ka socday HARO ay ballan-qaadeen in halkaas kasii wadi doonaan howlaha ay ugu adeegayaan dadka dhibaateysan iyo kuwa aan waxba haysan.

Qaar ka mid dadka Indhoolayaasha ah ee loo qaybiyay zakaatul fidriga ayaa u mahad-celiyey walaalaha Soomaaliyeed ee Waqooyiga Ameerika waxayna Ilaah ugu baryeen in waxay soo dhiibeen wax ka khayr badan uu ugu bedelo iyagoo sheegeen in hay’adda HARO aysan ahayn markii ugu horreysey oo ay gargaarka noocan oo kale ah ka helaan hay’adda.

Dhinaca kale, waxaa iyana hay’adda HARO waxay magaalada Kismaayo ka qaybisey zakaatul fidri; waxaana la siiyay dad gaaraya 403-qoys kuwaasoo ku jiray saddex xero oo ku yaalla magaaladaas; waxayna qaybintaas ay u dhacday sidii loogu talogalay, waxaana gargaarkan uu ka mid ahaa kuwii ay soo dhiibeen walaalaha ku nool Waqooyiga Ameerika.










Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/7/2013 3:32 PM EST
Arbaco, August 07, 2013 (HOL) — Xukuumadda Soomaaliya ayaa caawa ku dhawaaqay inay maalinta berri ah tahay ciid, waxaana hambalyo ku aaddan ciidda u diray shacabka Soomaaliyeed ra’iisul Soomaaliya, Cabdi Faarax Shirdoon Saacid.

8/7/2013 3:30 PM EST
Arbaco, August 07, 2013 (HOL) — Wasiirka horumarinta adeegga bulshada Xukuumada Soomaaliya, Maryan Qaasim Axmed ayaa maanta oo Arbaco ah ku dhawaaqday in dowladda Soomaaliya ay ka heshay dalka Yemen deeqo waxbarasho jaamacadeed ah, kuwaasoo tiradoodu tahay 100, kuwasoo kala ah waxbarashada sare iyo shahaadaha koowaad ee Bachelor-ka.

8/7/2013 8:47 AM EST
Arbaco, August 07, 2013 (HOL) — Bannaanbax looga horjeedo go’aankii uu ku gaaray bankiga Barclays inuu joojiyo adeegyadii uu u qaban jiray xawaaladaha Soomaalida ayaa maanta ka dhacay magaalada London, gaar ahaan afaafka hore ee xafiiska ra’iisul wasaaraha Britain, David Cameron.

8/7/2013 8:17 AM EST
Arbaco, August 07, 2013 (HOL) — Dabley hubeysan ayaa xalay ku gubey inta u dhexeysa magaalada Boosaaso iyo tuulada Kala-bayr labo gaari oo nooca xamuulka qaada ee ay Soomaalidu (Candho-meydlaha) u taqaan ah.

8/7/2013 8:16 AM EST
Arbaco, August 07, 2013 (HOL) — Magaalada Muqdisho ayaa waxaa lagu qabtay munaasabad lagu xusayay sannadkii laabad ee kasoo wareegay markii la aasaasay xisbiga DADKA Soomaaliyeed oo ka mid ah xisbiyadii siyaasadeed ee ka qaybgalay doorashadii madaxnimo ee Soomaaliya.

8/7/2013 8:10 AM EST
Arbaco, August 07, 2013 (HOL) — Iyadoo ay maalin keliya ka harsan tahay munaasabaddii Iidul Fidriga ayaa waxaa suuqa weyn ee magaalada Boosaaso laga dareemayaa dhaqdhaqaaq ganacsi oo xooggan.

8/7/2013 4:57 AM EST
Arbaco, August 07, 2013(HOL) :- Xoogagga Al-shabaab ayaa dagaal xooggan ku qaaday degmada Afmadow ee gobolka Jubbada hoose, iyadoona dagaalkaasi uu sababay khasaarooyin lixaad leh oo kala gaaray dhinacyadii dagaalamay.

8/7/2013 4:01 AM EST
Arbaco, August 07, 2013 (HOL) — Xukuumadda Kenya ayaa shuruud ku xirtay wareejinta garoonka diyaaradaha iyo dekedda magaalada Kismaayo ee xarunta goblka Jubbada Hoose, iyadoo dhawaan ay madaxda dalalka ay ciidamadu ka joogaan Somnalia ay kasoo saareen shir ay ku yeesheen Kampala in maamulka garoonka iyo dekedda Kismaayo lagu wareejiyo dowladda Soomaaliya.

8/7/2013 2:52 AM EST
Arbaco, August 07, 2013 (HOL) — Deeq lacageed oo gaareysa 1,440 dollar ayaa la gaarsiiyay bukaannada ku jira isbitaalka guud ee magaalada Laascaanood ee xarunta gobolka Sool.

8/7/2013 2:41 AM EST
Arbaco, August 07, 2013 (HOL) — Xilli ay muddo yari ka harsan tahay munaasabaddii Iidul Fidriga ayaa waxaa magaalooyinka waaweyn ee Puntland ka bilowday howlagallo ay ciidamada Boolisku ammaanka si weyn ugu adkeynayaan.

8/7/2013 2:17 AM EST
Arbaco, August 07, 2013 (HOL) — Dab weyn oo aan la ogeyn wixii sababay ayaa saakay oo Arbaco ah ka kacay garoonka diyaaradaha Jommo Kenyata ee magaalada Nairobi, taasoo keentay in garoonka la xiro tan iyo inta amar kale laga soo saarayo.