2/7/2023
Today from Hiiraan Online:  _
Wararka Maanta- Arbaco, Aug 7 , 2013
Dowladda Kenya oo Shuruud ku Xirtray Wareejinta Garoonka Diyaaradaha & Dekedda Magaalada Kismaayo ee Jubbada Hoose


Arbaco, August 07, 2013 (HOL) — Xukuumadda Kenya ayaa shuruud ku xirtay wareejinta garoonka diyaaradaha iyo dekedda magaalada Kismaayo ee xarunta goblka Jubbada Hoose, iyadoo dhawaan ay madaxda dalalka ay ciidamadu ka joogaan Somnalia ay kasoo saareen shir ay ku yeesheen Kampala in maamulka garoonka iyo dekedda Kismaayo lagu wareejiyo dowladda Soomaaliya.

Wargeyska Daily Naition ayaa arrintan ku saabsan oo uu soo daabacay wuxuu ku sheegay in dowladda Kenya ay kasoo horjeesatay go’aankii ay dalalka ay ciidamada ka joogaan Soomaaliya ku gaareen in maamulka dekedda iyo garoonka diyaaradaha Kismaayo lagu wareejiyo dowladda Soomaaliya.

Ciidamada Kenya ayaa waxay qayb ka yihiin howgalka Midowga Afrika ee AMISOM, waxayna bishii September ee sannadkii hore 2012 ka saareen Al-shabaab magaalada Kismaayo, inkastoo magaaladaas ay lugaha la gashay colaado u dhexeeya hoggaamiyeyaal isku haysta maamulka magaaladaas.

Muran siyaasadeed ka dhashay dagaalladii dhawaan ka dhacay Kismaayo ayaa bilihii ugu dambeeyay u dhexeeyay dowladaha Soomaaliya iyo Kenya, kaddib markii ciidamada Kenya lagu eedeeyay inay la safteen Sheekh Axmed Madoobe oo dagaal la galay hoggaamiye kooxeedyo kale, kaasoo hadda ka taliya magaalada Kismaayo.

“Dowladda Kenya diyaar ayay u tahay inay wareejiso garoonka diyaaradaha iyo dekedda magaalada Kismaayo, balse waxay ku wareejinaysaa mas'uul ku yimid hannaan dib u heshiisiineed oo la isku raacsan yahay,” ayuu yiri, Karanja Kibicho oo ka mid ah saraakiisha sar-sare ee wasaaradda arrimaha dibadda Kenya.

Kibicho ayaa sheegay in haddii ay hadda ciidamada Kenya isaga baxaan Kismaayo ay ku laabanayaan halkii ay markii hore ka yimaadeen (Kenya), isagoo intaa ku daray inuusan shaki ka qabin inay Kismaayo ku laabanayso meesheedii hore (Maamulkii Al-shabaab).

Dowladda Soomaaliya ayaa bishii hore warqad ay kaga cabanayso ciidamada Kenya ee ku sugan Kismaayo u dirtay ururka Midowga Afrika, waxayna dowladdu ku dalbatay qoraalka in ciidamada Kenya laga bedelo Kismaayo lana geeyo ciidammo isku dhaf ah, inkastoo aysan jirin wax jawaab ah oo uu ururku ka bixiyay cabashadaas.

Laakiinse, shir toddobaadkan magaalada Kampala ee dalka Uganda ku dhexmaray dalalka ay cididamadu ka joogaan Soomaaliya ayaa lagu go’aamiyay in dowladda Soomaaliya lagu wareejiyo dekedda iyo garoonka diyaaradaha Kismaayo.

“Ciidamada AMISOM kuma jiraan wax dagaallo ah,” ayuu yiri Zaddock Madiri Syong’oh oo ka tirsan la taliyeyaasha sare ee wasaaradda arrimaha dibadda Kenya, isagoo intaas ku daray. “Haddii ay ciidamada Kenya ka baxaan Soomaaliya, waxaa xaqiiqo ah in Al-shabaab ay markiiba la wareegayso goobihii laga xoreeyay.”

Kenya ayaa la sheegay in sababta ay ciidamadeeda ugu dirtay Soomaaliya ay tahay sidii ay gudaha Soomaaliya uga sameysan lahayd deegaan ay ka difaacdo xuduudaha dalkeeda oo ay Al-shabaab weerarro joogto ah ku hayaan.

Warar hoose ayaa sheegaya in xukuumadda Soomaaliya ay wadahadal kula jirta Sheekh Axmed Madoobe oo dowladda Kenya ay iska fogeysay inay taageerto, qorshuhuna uu yahay in lagu wareejiyo maamulka Kismaayo si loo wadaago daqliga kasoo baxa dekedda iyo garoonka Kismaayo.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/7/2013 3:32 PM EST
Arbaco, August 07, 2013 (HOL) — Xukuumadda Soomaaliya ayaa caawa ku dhawaaqay inay maalinta berri ah tahay ciid, waxaana hambalyo ku aaddan ciidda u diray shacabka Soomaaliyeed ra’iisul Soomaaliya, Cabdi Faarax Shirdoon Saacid.

8/7/2013 3:30 PM EST
Arbaco, August 07, 2013 (HOL) — Wasiirka horumarinta adeegga bulshada Xukuumada Soomaaliya, Maryan Qaasim Axmed ayaa maanta oo Arbaco ah ku dhawaaqday in dowladda Soomaaliya ay ka heshay dalka Yemen deeqo waxbarasho jaamacadeed ah, kuwaasoo tiradoodu tahay 100, kuwasoo kala ah waxbarashada sare iyo shahaadaha koowaad ee Bachelor-ka.

8/7/2013 10:01 AM EST
Arbaco, August 07, 2013 (HOL) — Hay’adda gargaarka bani’aadmanimo ee Afrika (HARO) ayaa gargaar raashin ah oo loogu talo-galay sakaatul fidriga ka qaybisay degmada Wadajir ee gobolka Banaadir iyo magaalada Kismaayo ee gobolka Jubbada Hoos, iyadoo loo qaybiyay dad dan-yar oo ay ku jireen kuwo indhoolayaal ah.

8/7/2013 8:47 AM EST
Arbaco, August 07, 2013 (HOL) — Bannaanbax looga horjeedo go’aankii uu ku gaaray bankiga Barclays inuu joojiyo adeegyadii uu u qaban jiray xawaaladaha Soomaalida ayaa maanta ka dhacay magaalada London, gaar ahaan afaafka hore ee xafiiska ra’iisul wasaaraha Britain, David Cameron.

8/7/2013 8:17 AM EST
Arbaco, August 07, 2013 (HOL) — Dabley hubeysan ayaa xalay ku gubey inta u dhexeysa magaalada Boosaaso iyo tuulada Kala-bayr labo gaari oo nooca xamuulka qaada ee ay Soomaalidu (Candho-meydlaha) u taqaan ah.

8/7/2013 8:16 AM EST
Arbaco, August 07, 2013 (HOL) — Magaalada Muqdisho ayaa waxaa lagu qabtay munaasabad lagu xusayay sannadkii laabad ee kasoo wareegay markii la aasaasay xisbiga DADKA Soomaaliyeed oo ka mid ah xisbiyadii siyaasadeed ee ka qaybgalay doorashadii madaxnimo ee Soomaaliya.

8/7/2013 8:10 AM EST
Arbaco, August 07, 2013 (HOL) — Iyadoo ay maalin keliya ka harsan tahay munaasabaddii Iidul Fidriga ayaa waxaa suuqa weyn ee magaalada Boosaaso laga dareemayaa dhaqdhaqaaq ganacsi oo xooggan.

8/7/2013 4:57 AM EST
Arbaco, August 07, 2013(HOL) :- Xoogagga Al-shabaab ayaa dagaal xooggan ku qaaday degmada Afmadow ee gobolka Jubbada hoose, iyadoona dagaalkaasi uu sababay khasaarooyin lixaad leh oo kala gaaray dhinacyadii dagaalamay.

8/7/2013 2:52 AM EST
Arbaco, August 07, 2013 (HOL) — Deeq lacageed oo gaareysa 1,440 dollar ayaa la gaarsiiyay bukaannada ku jira isbitaalka guud ee magaalada Laascaanood ee xarunta gobolka Sool.

8/7/2013 2:41 AM EST
Arbaco, August 07, 2013 (HOL) — Xilli ay muddo yari ka harsan tahay munaasabaddii Iidul Fidriga ayaa waxaa magaalooyinka waaweyn ee Puntland ka bilowday howlagallo ay ciidamada Boolisku ammaanka si weyn ugu adkeynayaan.

8/7/2013 2:17 AM EST
Arbaco, August 07, 2013 (HOL) — Dab weyn oo aan la ogeyn wixii sababay ayaa saakay oo Arbaco ah ka kacay garoonka diyaaradaha Jommo Kenyata ee magaalada Nairobi, taasoo keentay in garoonka la xiro tan iyo inta amar kale laga soo saarayo.