6/26/2022
Today from Hiiraan Online:  _
Wararka Maanta- Khamiis, Sept 6 , 2012
Madaxweynaha Soomaaliya iyo Murashaxiin kale oo ku biiray Murashaxiinta buuxiyay shuruudihii Murashaxnimo ee looga bahnaa
Khamiis, September 06, 2012 (HOL) — Madaxweynaha Soomaaliyaiyo xubno kale oo ka tirsan murashaxiinta u taagan doorashada madaxnimo ee dalka ayaa ku biiray xubnihii horay u buuxiyay shuruudihii uu ku xiray guddiga doorashada madaxweyne ee Soomaaliya.

Shariif Sheekh Axmed, Prof. Axmed Ismaaciil Samatar iyo Xasan Sheekh Maxamuud ayaa u gudbiyay guddiga doorashada warqadihii ay soo buuxiyeen, kuwaasoo ay ku qornaayeen shuruudo dhowr ah oo ay ka mid yihiin, in murashaxu uu bixiyo 10,000 oo dollar iyo inuu kalsooni ka haysto labaatan murashax.

Doorashada madaxweynenimo ee Soomaaliya ayaa waxay dhacaysaa 10-ka bishan September, iyadoo guddiga uu tan iyo billowgii bishan waday diyaagarowga sidii ay ku dhici lahayd doorashada madaxweynenimo ee Soomaaliya.

"Maanta ayay ku eg-tahay qabashada araajida, illaa iyo haddana waxaa buuxiyay shuruudihii looga bahnaa siddeed murashax," ayuu yiri afhayeenka guddiga mudane Cismaan Libaax Ibraahim oo saxaafadda la hadlay.

Afhayeenka guddiga ayaa wuxuu hadalkiisa ku daray in 37 murashax ay siiyeen warqadihii ay kusoo buuxin lahaayeen shuruudihii looga bahaa, isagoo sheegay inay dhici karaan in murashaxiintaas qaarkood aysan dib u soo celin warqadihii ay qaateen.

Tan iyo markii lagu dhawaaqay in Soomaaliya ay ka baxayso xilliga KMG ah ayna ka dhacayso Muqdisho doorashada madaxweynaha Soomaaliya kaddib 42-sano ayaa waxaa dadaal weyn ugu jiray qabsahada xilkan xubno fara badan oo qaarkood horay xilal uga soo qabtay Soomaaliya.

Magaalada Muqdisho ayaa waxaa si aad ah looga dareemayaa diyaargarow loogu jiro doorashada madaxweynenimo ee Soomaaliya, iyadoo murashaxiinta qaarkood ay sameynayaan ololayaal ay ku doonayaan inay ku kasbadaan codadka xildhibaanada baarlamaanka Soomaaliya oo madaxweynaha dooranaya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/6/2012 8:15 PM EST
Khamiis, September, 06, 2012 (HOL) – Jaamacada Baladweyne University oo ka mid ah Jaamacadaha ku yaala magaalada Baladweyne ee xarunta gobollka Hiiraan ayaa ardayda wax ka barata waxaa ay maanta sanadkii afraad dib u bilaabeen waxbarashada Jaamacada.

9/6/2012 1:32 PM EST
Talaado 6-da September 2012(HOL): Guddiga doorashada madaxweynenimada Soomaaliya ayaa galabta ku dhawaaqay tirada musharraxiinta isu soo taagay madaxweynenimada Soomaaliya ee buuxiyay shuruudihii lagu xiray, waxayna tiradaha musharraxiintaas gaareysaa 25 musharrax.

9/6/2012 8:48 AM EST
Khamiis, September 06, 2012 (HOL) — Wasiirrada xukuumadda Soomaaliya ee uu waqtigeedu dhammaaday ayaa maanta kulankoodii ugu dambeeyay ku yeeshay magaalada Muqdisho, kaasoo ay uga hadleen waxqabadkoodii iyo ammaanka guud ee dalka.

9/6/2012 8:25 AM EST
Khamiis, September 06, 2012 (HOL) — Booliiska dowladda Soomaaliya iyo booliiska AMISOM ayaa maanta howlgallo wadajir ah oo lagu soo qabqabtay boqolaal ruux oo dhallinyaro ah ka sameeyay degmada Xamarjajab ee gobolka Banaadir.

9/6/2012 6:58 AM EST
Khamiis, September 06, 2012 (HOL) — Xoogagga Al-shabaab ayaa maanta kusoo bandhigay magaalada Kismaayo hub iyo gaadiid dagaal oo ay sheegeen in ay kusoo qabsadeen dagaallo mudooyinkii ugu danbeeyay ka socday duleedka degmada Afmadow ee gobolka jubada Hoose.

9/6/2012 3:40 AM EST
Khamiis, September 06, 2012 (HOL) — In ka badan 10 ruux ayaa ku dhimatay tiro kale oo intaa ka sii badanna dhaawac ayaa ka soo gaaray dagaalo culus oo labo maleeshiyo beelleed ku dhaxmaray deegaannka lagu magacaabo Bangala oo ka tirsan gobollka Galguduud

9/6/2012 3:32 AM EST
Khamiis, September 06, 2012 (HOL) — Iskahorimaadyo u dhexeeya ciidamada dowladda Soomaaliya iyo kooxo hubeysan ayaa xalay ka dhacay isgoyska Ex-koontarool Afgooye iyo degmada Dharkeynley oo dhinaca koonfeed kaga yaalla Muqdisho.

9/6/2012 3:11 AM EST
Khamiis, September 06, 2012 (HOL) — Ugu yaraan afar qof ayaa ku dhintay 13 qof oo kalena way ku dhaawacmeen bam xalay lagu weeraray guri ku yaalla degmada Afgooye iyo weerar ay kooxo hubeysan ku qaadeen gaari rakaab siday oo kasoo ambabaxay magaalada Baydhabo kuna soo jeedyay Muqdisho.