3/28/2024
Today from Hiiraan Online:  _
Wararka Maanta- Jimco, Sept 28, 2012
Wararkii ugu Danbeeyey ee Xaaladda Magaalada Kismaayo

Jimco, 28, 2012 (HOL) - Xaaladda Magaalada Kismaayo ayaa ah mid kacsan iyadoona ciidamada huwanta ah iyo kuwa Al-shabaab ay isku horfadhiyaan halka loo yaqaan Madaxtooyada  oo ku taal afaafka hore ee laga soo galo magaalada Kismaayo.

Goobjooge ku sugan magaalada Kismaayo oo HOL u waramay ayaa sheegay in xaaladda ay tahay mid aad u cakiran islamarkaasina la arkayo gaadiidka Tiknikada loo yaqaan iyo askar fara badan oo katirsan Al-shabaab oo dhexwareegaya magaalada, waxaana xoogagga Al-shabaab ay ciidamo xooggan isugu geeyeen xaafadaha siinaay iyo buulo-abliko oo ku yaal waqooyiga magaalda Kismaayo.

Ciidamada dowladda iyo kuwa Kenya oo aad u tiro badan islamarkaasina ku hubeysan hubka noocyadiisa kala duwan ayaa lagu soo waramayaa in ay Xeebta Kibooro ilaa nawaaxiga madaxtooyada iyadoona ciidamada huwanta ah ay halkaasi ka sameysteen difaacyo xooggan.

"Duhurkii ayuu mar dagaal qarxay laakiin daqiiqado kadib wuu istaagay, waxaana labada ciidan ay isu jiraan wax yar, laakiin waxaa madaafiic laga maqlayaa dhanka xeebta Kibooro," sidaa waxaa yiri goobjooge ku sugan Kismaayo oo HOL u waramay.

Xaaladda magaalada ayaa ah mid aad u kacsan, waxaana dadku ay ku jiraan guryahooda iyagoo aad uga welwelsan marxaladda dagaal ee soo foodsaartay Kismaayo, waxaana dadka ay garan la'yihiin meel ay aadaan madaama wadooyinkii magaalada looga baxay ay yihiin halka ay ciidamadu isku horfadhiyaan.

Dhinaca kale dagaal xooggan ayaa lagu soo waramayaa in uu maanta ka qarxay deegaanka Birta Dheer, waxaana la sheegayaa in dagaalkaasi uu sababay khasaarooyin xooggan oo kala gaaray labada dhinac walow aan la garanayn tirada rasmiga ah ee dadka ku waxyeeloobay.

Saraakiil katirsan ciidamada dowladda oo aan la xiriirnay ayaa ka gaabsaday in ay faahfaahin ka bixiyaan haseyeeshee waxay sheegeen in ay soo baacsadeen xoogaggii Al-shabaab islamarkaasina ay haatan ku suganyihiin deegaanka Canjeel oo qiyaastii 30 KM dhanka galbeed kaga beegan magaalada Kismaayo.

Saraakiil u hadashay Al-shabab ayaa iyaguna dhankooda guulo ka sheegtay dagaalkaasi, iyagoona sheegay in ay dagaalkii maanta ku gubeen laba gaadiid oo nooca dagalka ah oo ay leedahay dowladda Kenya.

Wararkii ugu danbeeyay ee xiisadaha ka taagan gobolka Jubada Hoose waxaad uga bogan doontaan wararkeena danbe Insh'allah.

Xasan Nuur, Hiiraan Online
[email protected]
Kismaayo, Soomaaliya













Click here
9/28/2012 4:58 PM EST
Jimco, September 28, 2012 (HOL) - Xoogagga Al-shabaab ayaa caawa gabi ahaanba isaga huleelay magaalada Kismaayo, kadib markii ciidamada dowladda KMG iyo kuwa Kenya ay dhowr jiho kasoo weerareen magaalada.

9/28/2012 3:39 PM EST
Jimco, September, 28, 2012 (HOL) – Xaalad adag ayaa soo food saartay dadka ku dhaqan magaalada Baladweyne ee xarunta gobollka Hiiraan kadib markii uu xalay ku fatahay inta badan xaafaddaha magaalada wabiga Shabeelle.

9/28/2012 4:13 AM EST
Jicmo, September 28, 2012 (HOL) — Wariye ka faalooda barnaamiyada ciyaaraha oo maydkiisa oo qoorta ka go'an laga helay shalay degmada Huriwaa ayaa maanta lagu aasay deegaanka KM-13 ee duleedka Muqdisho, waxaana wariyahan uu noqonayaa wariyihii shanaad oo toddobaadkan lagu dilo Muqdisho.

9/28/2012 4:01 AM EST
Jicmo, September 28, 2012 (HOL) — Dagaal fool ka fool ah ayaa lagu soo waramayaa in uu ka bilowday duleedka magaalada Kismaayo, dagaalkaas oo ay isaga soo horjeedaa ciidamada dowladda KMG oo kaashanaya kuwa Kenya oo saaka maraakiib uga soo dagay dhanka xeebta Cceeldhiig ee magaalada Kismaayo iyo xoogagga Al-shabaab.

9/28/2012 3:56 AM EST
Jicmo, September 28, 2012 (HOL) — Guddoomiyaha gobolka Banaadir, ahna duqa Muqdisho, Maxamuud Axmed Nuur Tarsan ayaa sheegay in isbaarooyin lacago looga qaado dadka shacabka ah ay yaallaan qaar ka mid ah waddooyinka Muqdisho, isagoo ugu baaqay ciidamada dolwadda inay isbaarooyinkaas wax ka qabtaan.

9/28/2012 3:34 AM EST
Jicmo, September 28, 2012 (HOL) — Ciidamada booliiska Soomaaliyeed ayaa xalay baaritaanno saf-ballaaran ka sameeyay saddex degmo oo ka tirsan kuwa gobolka Banaadir, kuwaasoo ay kusoo qabqabteen dad fara badan oo lala xiriirinayo ammaan-darradii maalmihii lasoo dhaafay ka dhacayay Muqdisho.

9/28/2012 3:15 AM EST
Jicmo, September 28, 2012 (HOL) — Afhayeen milateriga Kenya, Col. Cyrus Oguna ayaa warbaahinta u sheegay in ciidamada Kenya ee qaybta ka ah AMISOM iyo kuwa dowladda Soomaaliya ay la wareegeen gacan ku haynta xaafado ka tirsan degmada Kismaayo ee gobolka Jubbada hoose.

9/28/2012 3:14 AM EST
Jicmo, September 28, 2012 (HOL) — Xaafadaha magaalada Baladweyne ayaa waxaa ku fatahay webiga Shabeelle, kaddib markii xalay uu magaaladaas ka da'een roobab xooggan oo geystay khasaare dhimasho oo soo gaartay dad iyo xoolo nool.