3/28/2024
Today from Hiiraan Online:  _
Wararka Maanta- Arbaco, Sept 26, 2012
Marakiib dagaal oo duqeeyay Magaalada Kismaayo ee Gobolka Jubbada Hoose
Arbaco, September 26, 2012 (HOL) — Maraakiib nooca dagaalka oo la aaminsan yahay inay leedahay dowladda Kenya ayaa saaka dhowr gantaal ku tuuray magaalada Kismaayo ee gobolka Jubbada Hoose, walow aan illaa imika la sheegin cid wax ku noqotay duqeyntaas.

Gantaallada ay soo tuureen Maraakiibta ayaa intoodii badnayd ku dhacay dhul bannaan, waxaana wararku ay sheegeen in mid kamid ah gantaalladaasi uu ku dhacay Dekadda Kismaayo iyadoona la sheegay in burbur uu gaarsiiyay mid kamid ah dhismayaasha ku yaal marsadda magaalada Kismaayo.

Goobjooge magaciisa ka gaabsaday ayaa HOL u sheegay in Marakiibtani oo ku sugnaa duleedka dekedda caalamiga ah ee Kismaayo ay dhowr gantaal kusoo tuureen magaalada, kuwaasoo ku dhacay xeebta Calanleey.

Ilaa imika lama sheegin wax khasaare nafeed ah oo ay geysteen duqeymahaasi, waxaana xiriiro kala duwan oo aan la sameynay dad goobjoogayaal ah ay inoo xaqijiyeen in duqeymaha ay ku dhaceen dhul bannaan oo ku yaal xeebta xaafadda Calanleey ee magaalada Kismaayo.

Maraakiibtan oo la sheegay in ay leedahay dowladda Kenya ayaa aalaaba si kafiirsasho la'aan ah gantaallo ugu soo tuura gudaha magaalada, iyadoona duqeymahaasi ay inta badan sababaan khasaarooyin soo gaara dad rayid ah.

Shacabka ku dhaqan gobollada Jubooyinka ayaa walaac ka muujiyay Duqeymaha ay dowladda Kenya ka geysato gobollada Jubooyinka, kuwaasoo aalaaba ay waxyeelo kasoo gaarto dadka shacabka ah ee ku dhaqan goobaha ay gacanta ku hayso Xarakada  Al-shabaab.

Maraakiibtan duqeymaha ka geystay Kismayo ayaa kusoo beegmaya xilli diyaarado nooca dagaalka ay shalay gantaallo la dhaceen garoonka caalamiga ah ee magaalada Kismaayo, walow aan ilaa imika la garanayn khasaaraha ka dhashay duqeynmahaasi.

Xasan Nuur, Hiiraan Online
[email protected]
Kismaayo, Soomaaliya












Click here
9/26/2012 8:58 AM EST
Arbaco, September 26, 2012 (HOL) — Waxaa maanta xarunta degmada Wadajir ee magaalada Muqdihos lagu qabtay xaflad lagu sagootinayay madaxweynihi hore ee Soomaaliya, Shariif Sheekh Axmed, laguna soo dhaweeyay madaxweynaha cusub, Xasan Sheekh Maxamuud.

9/26/2012 8:58 AM EST
Arbaco, September 26, 2012 (HOL) — Aqoonyahanno, Siyaasiyiin iyo Odoyaal kasoo jeeda gobollada Jubooyinka iyo Gedo ayaa si kulul u cambaareeyay dilkii askari katirsan ciidamada Kenya uu dad rayid ah ugu geeystay nawaaxiga deegaanka Birta dheer ee gobolka Jubada Hoose.

9/26/2012 8:36 AM EST
Arbaco, September 26, 2012 (HOL) — Xukuumadda Somaliland ayaa soo dhawaysay khuburo ku takhasusay sida loo baadho xasuuqyada caalamka ka dhaca iyo lafaha bani’aadamka, kuwaas oo dib u soo fiqi doono xabaalo wadareedyo ay dad badan oo dawladii hore ku laysay magaaladda Hargeysa ku jiraan, gaar ahaan goobta loo yaqaan badhka.

9/26/2012 8:07 AM EST
Arbaco, September 26, 2012 (HOL) — Ergayga xoghayaha guud ee Qaramada Midoobay uga wakiilka ah arrimaha Soomaaliya, danjire Augustine Mahiga ayaa sheegay in xiligii hore iyo hadda ay rajadiisa ku aaddan Soomaaliya aad u kala duwan tahay, wuxuuna xusay in xilligii hore uu ka rajo wanaagsan yahay xilligan.

9/26/2012 7:34 AM EST
Arbaco, September 26, 2012 (HOL) — Saraakiisha u hadlay milateriga dalka Kenya ayaa sheegay in duqeymo ay diyaaradahoodu ka geysteen garoonka diyaaradaha Kismaayo ay ku burburiyeen kaydad hub oo ay Al-shabaab lahayd iyo saldhigyo ay isticmaali jireen Al-shabaab, iyadoo saraakiil u hadlay Al-shabaab ay beeniyeen warkaas.

9/26/2012 4:11 AM EST
Arbaco, September 26, 2012 (HOL) — Wasiirka arrimaha gudaha ee xukuumadda uu waqtigeedu dhammaadka yahay, C/samad Macallin Maxamuud ayaa shaaciyay inay degmooyinka gobolka Banaadir dhigeen ciidammo suga ammaanka Muqdisho, kaddib dilal qorsheysan iyo qaraxyo ka dhacayay magaalada toddobaadyadii ugu dambeeyay.

9/26/2012 3:53 AM EST
Arbaco, September 26, 2012 (HOL) — Afhayeenka howgallada ee Al-shabaab, Sheekh C/casiis Abuu-Muscab oo saxaafadda la hadlay ayaa si kulul uga jawaabay hadal uu mas'uul ka tirsan Xisbul Islaam ku sheegay inay kaga baxeen midowgii ay horay ula galeen Al-shabaab.