6/26/2022
Today from Hiiraan Online:  _
Wararka Maanta- Isniin, Sept 10, 2012
Xasan Shiikh Maxamuud oo ku guuleystay doorashadii Madaxweynenimada Soomaaliya


Madaxweynaha cusub ee Soomaaliya Xasan Shiikh Maxamuud


Isniin, September 10, 2012(HOL): Waxaa si aqlabiyad leh ugu guuleystay madaxweynenimada Soomaaliya Xasan Shiikh Maxamuud oo wareeggii ugu dambeeyay ee doorashada madaxweynenimada Soomaaiya uga adkaaday Madaxweynihii hore Shiikh Shariif Shiikh Axmed.

Maanta oo ay taariikhdu tahay 10-ka September 2012, Soomaaliya waxay leedahay Dowlad iyo madaxweyne lagu soo doortay gudaha Soomaaliya, kaasi oo ay soo doorteen mudanayaasha Baarlamaanka Soomaaliya, kaddib doorasho waqti dheer socotay.

Xasan Shiikh Maxamuud  oo ku dhashay degmada Jalalaqsi ee Gobolka Hiiraan ayay tartanka doorashada Madaxweynenimada Soomaaliya isugu soo hareen Shariif Shiikh Axmed kaddib markii ay wareeggii labaad ee doorashada ka tanaasuleen Ra’iisal Wasaarihii hore ee Soomaaliya C/weli Maxamed Cali iyo C/qaadir Cosoble Cali oo wareeggii labaad u soo gudbay.

Markii ay codbixinta soo gebagebowday ayaa waxaa natiijada ku dhawaaqay guddoomiyaha Baarlamaanka Soomaaliya Prof. Maxamed Cusmaan Jawaari oo ku dhawaaqay natiijada doorashada, wuxuuna guud maray sida doorashada u dhacday.

Wareeggii ugu dambeeyay ayay labada musharrax kala heleen:

Xasan Shiikh Maxamuud                                               Shariif Shiikh Axmed
190 cod                                                                            79 cod

Doorashadan ayaa ahayd tii ugu horreysay oo gudaha dalka Soomaaliya ka dhacda, isla markaana lagu soo doorto Madaxweyne Soomaaliyeed, iyadoo horayna gudaha Soomaaliya loogu doortay Guddoonka Baarlamaanka Soomaaliya, isla markaana mudanayaasha baarlamaanka.

Natiijada codbixinta kaddib, madaxweynihii hore ee Soomaaliya Shariif Shiikh Axmed oo hadal kooban jeediyay ayaa sheegay in uu ku faraxsan yahay in 42 sano kaddib ay doorasho xaq ah ka dhacday dalka Soomaaliya, lana soo doortay dowlad aan KMG ahayn, wuxuuna u mahadceliyay guddoonka baarlamaanka Soomaaliya, isagoo caddeeyay in doorashada looga adkaadaa ay  u dhacday si xor ah oo xaq ah, uuna u hoggaansamayo.

Intaas kaddib wuxuu sheegay Shariif Shiikh Axmed in si aanu ammaanka gacanta uga bixin ay taliyayaasha ciidamada qalabka sida ay toos uga ammar qaadanayaan Madaxweynaha cusub ee Soomaaliya Xasan Shiikh Maxamuud. Wuxuu ku kaftamay in uu illoobay in uu u mahadceliyo mudanayaasha Baarlamaanka Soomaaliya, sababtana wuxuu yiri "Waad iska garan kartaa taas".

Madaxweynaha cusub ee Dowladda Soomaaliya Xasan Shiikh Maxamuud oo wax ku soo bartay dalka India ayaa  isla goobta lagu dhaariyay ka hadlay, wuxuuna ugu horreyn u mahadceliyay xildhibaannadii soo doortay iyo kuwii aanan soo dooran, wuxuuna ammaanay madaxweynihii hore Shariif Shiikh Axmed oo uu sheegay in ay saaxibo ahaayeen, weligiisna uu ahaan doono.

Wuxuu sheegay Soomaaliya in uu u baryay waa' cusub oo horumar iyo barwaaqo ah, wuxuuna caddeeyay in uu horay u sii wadi doono halka uu maanta taagan yahay dalka Soomaaliya, aysanna jiri doonin wax dib u dhac ah.

Ugu dambeyntina, Guddoomiyaha Baarlamaanka Soomaaliya Prof. Maxamed Cusmaan Jawaari ayaa ku dhawaaqay in caleemo-saarka madaxweynaha dib laga soo sheegi doono.


Salaad Iidow Xasan (Xiis), Hiiraan Online
[email protected]













Click here
9/10/2012 6:47 PM EST
Kadib markii ay baarlamaanka Soomaaliya si aqlabiyad ah ugu codeeyeen madaxweynaha cusub ee Soomaaliya Xassan Sheekh Maxamuud ayaa magaalada Muqdisho laga maqlay sawaxanka rasaasta.

9/10/2012 7:50 AM EST
Isniin, September 10, 2012 (HOL) — Xildhibaannadii horay loogu diiday inay ka mid noqon doonaan baarlamaanka Soomaaliya oo ay ku jiraan hoggaamiye kooxeedyadii hore ee Soomaaliya ayaa la dhaariyay maanta si ay uga qaybgalaan doorashada madaxweynenimo ee Soomaaliya.

9/10/2012 7:35 AM EST
Isniin, September 10, 2012 (HOL) — Hay'adaha CPD iyo SOYDEN oo ka shaqeeya arrimaha horumarinta dhallinyarada ayaa soo gabgabeeyay tababar muddo sideed bilood socday oo lagu tababarayay dhallinyaro ay saameyn ku yeesheen colaadaha dalka ka jira.

9/10/2012 7:10 AM EST
Isniin, September 10, 2012 (HOL) — Musharaxa xisbiga madaxweyne ee xisbiga UDUB, ayaa sheegay inay ka qaybgali doonin doorashooyinka golaha deegaanka, isla markaana xusay inuu maxkamadda u gudbin doono dacwad ka dhan ah guddidda Diiwaangelinta ururadda.

9/10/2012 6:13 AM EST
Isniin, September 10, 2012 (HOL) — Murashaxiin ka mid ahaa kuwii u tartamaya xilka madaxnimo ee Soomaaliya ayaa ku dhawaaqay inay tanaasuleen, iyagoo aan sheegin sababaha ku kallifay inay tanaasul sameeyaan.

9/10/2012 5:30 AM EST
Isniin, September 10, 2012 (HOL) — Markab ay leeyihiin ciidamada NATO ee howlgalka la dagaalanka burcad-badeedda u jooga xeebaha dalka Soomaailya, gaar ahaan kuwa Puntland ayaa soo badbaadiyey koox tahriibeyaal ah oo isugu jira Soomaali iyo Itoobiyaan, kuwaas oo muddo dhowr beri ah badda saarnaa, kadib markii ay ciladi soo food saartay doon yar oo ay ku safrayeen.

9/10/2012 5:26 AM EST
Isniin, September 10, 2012 (HOL) — Iyadoo la filayo in maanta magaalada Muqdisho ay ka dhacdo doorashada madaxtinimo ee Soomaaliya oo ay u taaganyihiin ku dhowaad ilaa 25 musharax ayaa Soomaalida ku dhaqan dalka gudihiisa iyo dibadiisa waxa ay isha ku hayaan warbaahinta Soomaalida ee soo tabinaysa qaabka ay u dhaceyso doorashada.

9/10/2012 4:28 AM EST
Isniin, September 10, 2012(HOL): Waxaa la soo gebagebeeyay wareegga koowaad ee doorashada madaxweynenimada Soomaaliya oo maanta mudanayaasha baarlamaanka Soomaaliya ku kala dooranayeen musharraxiin isu soo taagay xilka madaxweynenimada Soomaaliya.

9/10/2012 3:16 AM EST
Isniin, September 10, 2012 (HOL) — Shacabka Soomaaliyeed ee ku nool gudaha iyo dibadda dalka ayaa rajo wanaagsan ka muujiyay doorashada maanta Muqdisho ka dhacaysa ee lagu soo dooranayo madaxweynaha hoggaamin doona dalka muddo dheer kaddib.

9/10/2012 2:54 AM EST
Isniin, September 10, 2012 (HOL) — Xildhibaannada baarlamaanka Soomaaliya ayaa maanta oo Isniin ah dooran doona madaxweynihii dalka hoggaamin lahaa afarta sano ee soo socota, iyadoo doorahadan ay noqonayso tii ugu horreysay oo dalka ka dhacda muddo afartameeyo sano ka badan.