3/28/2024
Today from Hiiraan Online:  _
Wararka Maanta- Khamiis, Nov 29, 2012
Saraakiil u hadlay Ururka Ahlusunna oo sheegay in Ciidamada Ahlusunna lagu Wareejinayo Dowlada Soomaaliya
Khamiis, November 29, 2012 (HOL) — Saraakiil ka tirsan Ahlusunna oo maanta shir jaraa'id ku qabtay Muqdisho ayaa sheegay in ciidamada Ahlusunna si rasmi ah loogu wareejinayo dowladda Soomaaliya, iyagoo xusay in dagaalkii ay soo galeen uusan ahayn mid ay ku doonayaan inay noqdaan urur gooni-u-goosad ah.

Guddoomiyaha degmada Dhuuso-mareeb, Axmed Yuusuf Xasan (Ciyoow) iyo guddoomiyaha degmada Guriceel, Cismaan Ciise Nuur (Taar-dhuleed) oo ah labada mas'uul ee u hadlay Ahlusunna ayaa hadalkooda ku daray in Ahlusunna ay muddo dheer sugaysay dowlad ay ciidamada ku wareejiso.

"Innagu howl dhib badan ayaan soo marnay, waxaana muddo sugaynay dowlad u diyaar ah inay ciidamada Ahlusunna la wareegto oo ay daboosho baahidooda. Runtii ma ahayn wixii aan u dagaalamaynay inaan noqonno urur gooni-u-goosad, balse waxaan ahayn urur doonaya inay dalka ka difaacaan cadowga," ayuu yiri Taar-dhuleed oo shirka jaraa'id ka hadlay.

Sidoo kale, guddoomiyaha degmada Guriceel wuxuu hadalkiisa ku daray in 15,00 oo askari ay diyaar u yihiin degmada Guriceel kuwaasoo dagaallo badan lasoo galay Al-shabaab, haatanna diyaar u ah inay ka mid noqdaan ciidamada dowladda.

Guddoomiyaha degmada Dhuusomareeb, Ciyoow oo isaguna goobta ka hadlay ayaa sheegay in go'aanka ciidamada Ahlusunna loogu wareejinayo dowladda uu ku yimid wadahadallo xiliyadii u dambeeyay u socday dowladda iyo saraakiisha Ahlusunna.

"Arrintan waa mid muddo dheer laga soo shaqeynayay oo ay isla og-yihiin madaxda Ahlusunna iyo madaxda dowladda Soomaaliya, runtiina aad ayaan u jeclayn inay dowladdu gaarto deegaanka ballaaran ee ay ka taliso Ahlusunna," ayuu yiri Ciyoow oo intaas ku daray in dhawaan ay dowladdu ka howlgeli doonto deegaannadaas.

Ugu dambeyn, guddoomiyaha Guriceel wuxuu sheegay in deegaanno gobolka Galguduud ka tirsan ay ku sugan yihiin xoogag taabacsan Al-shabaab, balse hadda la billaabayo dadaallo looga saarayo halkaas.

Gobolka Galguduud ayaa waxaa gacan ku hayntiisa muddo afar sano ah ku dagaalamayay xoogagga Al-shabaab iyo dagaalayahannada Ahlusunna, iyadoo ay noqonayso markii ugu horreysay oo ay dowladda Soomaaliya ka howlgasho gobolkaas.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
11/29/2012 8:44 AM EST
Khamiis, November 29, 2012 (HOL) — Munaasabad maanta loo qabtay 650-arday oo ka qalin-jabinayay jaamacada SIMAD ayaa lagu qabtay hoteelka City Palace ee magaalada Muqdisho kuwaasoo isugu jiray wiilal iyo gabadho da'yar, waxaana munaasabadda ka qayb-galay maamulka sare ee jaamacada, macallimiinta, ardayda, waalidiin iyo dadweyne kale oo lagu casuumay.

11/29/2012 7:35 AM EST
Khamiis, November 29, 2012 (HOL) — Kulan golaha wasiirrada Soomaaliya ay ku yeesheen maanta xaruntooda Muqdisho ayay kasoo saareen qodobbo ay ka mid yihiin in la adkeeyo ammaanka caasimadda Soomaaliya, sidoo kalena dowladdu ay is le'ekeyso dhaqaalaha kasoo xarooda dekedda iyo gasroonka diyaaradaha Muqdisho.

11/29/2012 6:06 AM EST
Khamiis, November 29, 2012 (HOL) — Askari ka tirsan ciidamada dowladda Somalia ayaa haweeney rakaab ahayd dilay, saddex qof oo kale ku dhaawacay rasaas uu si bareer ah ugu furay gaari kuwa dadweynaha ah oo marayay agagaarka tarabuunka Muqdisho.

11/29/2012 5:51 AM EST
Khamiis, November 29, 2012 (HOL) — Iskahorimaad u dhexeeya ciidamada AMISOM iyo xoogagga Al-shabaab ayaa maanta ka dhacay deegaanno ka tirsan gobolka Shabeellada hoose, iyadoo sidoo kale nin bam ku hubeysan uu qarax ku weeraray ciidammo ka tirsan kuwa AMISOM oo ku sugan degmada Marko.

11/29/2012 5:44 AM EST
Khamiis, November 29, 2012 (HOL) — Ugu yaraan lix qof oo labada dhinac ah ayaa ku dhintay toban kalena way ku dhaawacmeen dagaal Arbacadii shalay deegaanka Xudun ee gobolka Sool ku dhexmaray ciidamada Somaliland iyo ciidamada Khaatumo oo diidanaa in doorasho ay halkaas ka dhacdo.

11/29/2012 4:15 AM EST
Khamiis, November, 29, 2012 (HOL) – Maalintii shalay waxaa booqasho ku tagay magaalada Baladweyne ee xarunta gobollka Hiiraan wafdi ka socday xukuumada Soomaaliya oo sidoo kalana ay ka mid ahaayeen xildhibaanno ka tirsan baarlamaanka.

11/29/2012 2:09 AM EST
Khamiis, November 29, 2012 (HOL) — Ra'iisul wasaaraha Itoobiya, Hailemariam Desalegn ayaa sheegay Arbacadii shalay in ciidamada Itoobiya ay sii joogi doonaan Soomaaliya inta ay goobaha ay hayaan kaga wareejinayaan ciidamada Midowga Afrika ka socda ee AMISOM.