3/29/2024
Today from Hiiraan Online:  _
Wararka Maanta- Khamiis, Nov 29, 2012
Iskahorimaad dhexmaray Ciidamada AMISOM iyo Xoogagga Al-shabaab oo ka dhacay Gobolka Shabeellada Hoose

Khamiis, November 29, 2012 (HOL) — Iskahorimaad u dhexeeya ciidamada AMISOM iyo xoogagga Al-shabaab ayaa maanta ka dhacay deegaanno ka tirsan gobolka Shabeellada hoose, iyadoo sidoo kale nin bam ku hubeysan uu qarax ku weeraray ciidammo ka tirsan kuwa AMISOM oo ku sugan degmada Marko.

Dagaalka dhexeeyay ciidamada dowladda Soomaaliya iyo AMISOM ayaa ka dhacay deegaan lagu magacaabo Saliini oo ay ciidamada AMISOM biyo ka dhaasanayeen, iyadoo aan la ogeyn khasaaraha labada dhinac kala gaaray.

"Saacad barkeed ayuu dagaalku socday, ma garan karno khasaaraha ka dhashay, balse ciidamada AMISOM ayaa la weeraray iyagoo biyo dhaansanayay," ayuu yiri goobjooge ku sugan deegaanka uu iskahorimaadku ka dhacay.

Al-shabaab iyo AMISOM ayaan labaduba ka hadlin khasaaraha ka dhashay dagaalka ku dhexmaray deegaanka Siliini, waxaase dagaalkan uu qayb ka noqonayaa dagaallo dhowr jeer oo hore uga dhacay gobolkaas.

Dhanka kale, nin ku hubeysan bambaannada gacanta ayaa weerar ku qaaday goob ay ku suganayeen ciidamada AMISOM, inkastoo bamku uusan khasaare geystan, balse rasaas ay ciidamadu fureen ayaa dhaawac halis ah gaarsiisay ninkaas weerarka geystay.

"Ninka weerarka qaaday waa la dhaawacay, waxaana gacanta ku dhigay isagoo dhaawacan ciidamada AMISOM," ayuu yiri Cali Cumar oo ka mid ah dadka ku nool degmada Marko oo saxaafadda la hadlay.

Degmada Marko oo ah xarunta gobolka Shabeellada Hoose ayaa ka mid tahay degmooyinka gobolka Shabeellada Hoose ee gacanta ugu jirta ciidamada dowladda Soomaaliya iyo kuwa AMISOM.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
11/29/2012 8:44 AM EST
Khamiis, November 29, 2012 (HOL) — Munaasabad maanta loo qabtay 650-arday oo ka qalin-jabinayay jaamacada SIMAD ayaa lagu qabtay hoteelka City Palace ee magaalada Muqdisho kuwaasoo isugu jiray wiilal iyo gabadho da'yar, waxaana munaasabadda ka qayb-galay maamulka sare ee jaamacada, macallimiinta, ardayda, waalidiin iyo dadweyne kale oo lagu casuumay.

11/29/2012 7:58 AM EST
Khamiis, November 29, 2012 (HOL) — Saraakiil ka tirsan Ahlusunna oo maanta shir jaraa'id ku qabtay Muqdisho ayaa sheegay in ciidamada Ahlusunna si rasmi ah loogu wareejinayo dowladda Soomaaliya, iyagoo xusay in dagaalkii ay soo galeen uusan ahayn mid ay ku doonayaan inay noqdaan urur gooni-u-goosad ah.

11/29/2012 7:35 AM EST
Khamiis, November 29, 2012 (HOL) — Kulan golaha wasiirrada Soomaaliya ay ku yeesheen maanta xaruntooda Muqdisho ayay kasoo saareen qodobbo ay ka mid yihiin in la adkeeyo ammaanka caasimadda Soomaaliya, sidoo kalena dowladdu ay is le'ekeyso dhaqaalaha kasoo xarooda dekedda iyo gasroonka diyaaradaha Muqdisho.

11/29/2012 6:06 AM EST
Khamiis, November 29, 2012 (HOL) — Askari ka tirsan ciidamada dowladda Somalia ayaa haweeney rakaab ahayd dilay, saddex qof oo kale ku dhaawacay rasaas uu si bareer ah ugu furay gaari kuwa dadweynaha ah oo marayay agagaarka tarabuunka Muqdisho.

11/29/2012 5:44 AM EST
Khamiis, November 29, 2012 (HOL) — Ugu yaraan lix qof oo labada dhinac ah ayaa ku dhintay toban kalena way ku dhaawacmeen dagaal Arbacadii shalay deegaanka Xudun ee gobolka Sool ku dhexmaray ciidamada Somaliland iyo ciidamada Khaatumo oo diidanaa in doorasho ay halkaas ka dhacdo.

11/29/2012 4:15 AM EST
Khamiis, November, 29, 2012 (HOL) – Maalintii shalay waxaa booqasho ku tagay magaalada Baladweyne ee xarunta gobollka Hiiraan wafdi ka socday xukuumada Soomaaliya oo sidoo kalana ay ka mid ahaayeen xildhibaanno ka tirsan baarlamaanka.

11/29/2012 2:09 AM EST
Khamiis, November 29, 2012 (HOL) — Ra'iisul wasaaraha Itoobiya, Hailemariam Desalegn ayaa sheegay Arbacadii shalay in ciidamada Itoobiya ay sii joogi doonaan Soomaaliya inta ay goobaha ay hayaan kaga wareejinayaan ciidamada Midowga Afrika ka socda ee AMISOM.