3/28/2024
Today from Hiiraan Online:  _
Wararka Maanta- Arbaco, Nov 28, 2012
Madaxweynaha Somalia oo sheegay in sababta Jabuuti ay u booqdeen ay tahay inay tusaale ka dhigaan sida uu dalkaas u shaqenayo
Arbaco, November 28, 2012 (HOL) — Madaxweynaha Dowladda Soomaaliya, Xasan Sheekh Maxamuud iyo wafdi uu hoggaaminayo oo maalmihii lasoo dhaafay safar ku joogay dalka Jabuuti ayaa sheegay in safarka ay ku tageen Jabuuti uu isugu jiro laba qodob oo kala ah: maadcelin iyo inay tusaale ka dhigtaan sida dalkaas yar uu u shaqeynayo.

Madaxweynaha oo la hadlayay saxaafadda ayaa sheegay in sababta ay u booqdeen Jabuuti ay ugu horreyso si ay u arkaan sida dalkaas uu u shaqeeyo, si ay tusaale uga dhigtaan, wuxuuna sababta labaad ku sheegay mahadcelin ay shacabka iyo xukuumadda Jabuuti u sidaan.

"Waxaan nimid dal shaqeynaya oo maamulkiisa dowladnimo uu dhameystiran yahay  waxna qabanaya, marka waxaan ka barannay oo aan argnay howsha na sugaysa ee la doonayo inaan Soomaaliya ka qabanno sida ay u taallo," ayuu yiri Xasan Sheekh oo sheegay inay booqdeen dekedda iyo xarunta isgaarsiinta ayna arkeen sida ay u shaqeynayaan.

Sidoo kale, madaxweynaha Soomaaliya wuxuu sheegay in madaxda iyo shacabka dalka Jabuuti ay uga mahadceliyeen dadaalkii dheeraa ee ay ku bixiyeen sidii ay Soomaaliya nabad u noqon lahayd, isagoo sheegay in Jabuuti ay dadaallo badan sameysay si ay u caawiso Soomaalida.

"Waayo aragnimo ayay noo tahay inaan howlaha ka socda Jabuuti ka faa'iideysano, waayo innagu waan ka xeeb dheernahay. Waxyaabaha kale aan aragnay waxaa ka mid ah habka ay u shaqeynayso isgaarsiinta Jabuuti, gaar ahaan internet-ka badda dhexdiisa la dhigo," ayuu yiri madaxweyne Xasan.

Mar uu ka hadlayay waxqabashada dowladda cusub ee Soomaaliya oo noqonaysa tii ugu horreysay muddo labaatan sano kaddib ah oo ka dhalata Soomaaliya, wuxuuna sheegay in dowladdiisa ay ku taagan tahay lix qodob oo uu sheegay inay wax kaga qaban doonaan xaaladda ay Soomaaliya ku jirto.

"Tiirarka aan saldhigga uga dhignay dowladda waxay tilmaamayaan meelaha in laga shaqeeyo ama wax laga qabto mudan, kuwaas ayaana ka billaabaynaa soo celinta ammaanka iyo deggenaashaha Soomaaliya, waana aamisannahay inaan ku guuleysan doonno," ayuu yiri Xasan Sheekh.

Madaxweynaha Soomaaliya ayaa maalmaha soo socda booqan doona Itoobiya iyo Kenya, isagoo madaxda dalkaas kala hadli doono iskaashiga kala dhexeeya Somalia dalalkaas oo ay ciidammo ka joogaan Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
11/28/2012 12:28 PM EST
Arbaco, November 28, 2012 (HOL) —Madaxweeynaha Jamhuuriyadda Federaalka Soomaaliya Mudane Xasan Sheekh Max’uud iyo wafdigii uu hogaaminayay oo saaka ka ambabaxay Dalka Jabuuti ayaa galabta gaaray magaalada Adisababa ee dalka Itoobiya

11/28/2012 6:39 AM EST
Arbaco, November 28, 2012 (HOL) — Guud ahaan gobolada iyo degmooyinka Somaliland waxa si weyn loogu dareeray sidii dadweynuhu ugu codayn lahaayeen musharaxiinta ka sharaxan degmooyinkooda, waxaanay Dadweynuhu saaka arooryadii hore safaf dhaadheer u galeen goobaha laga codaynayo, iyagoo si degan ugu jira sefefka una samraya cadceedda kulul iyo wakhtiga dheer ee ay ku jiraan safafka.

11/28/2012 6:20 AM EST
Arbaco, November 28, 2012 (HOL) — Iska-horimaad sababay khasaare nafeed ayaa maanta oo Arbaco ah ku dhexmaray duleedka degmada Balad-Xaawo ee gobolka Gedo ciidamada dowladda Soomaaliya iyo xoogagga Al-shabaab, iyadoo mas'uuliyiin u hadlay dowladda Soomaaliya ay guulo ka sheegteen dagaalka.

11/28/2012 6:17 AM EST
Arbaco, November 28, 2012 (HOL) — Ergayga xoghayaha guud ee qaramadda midoobay u qaabilsan Soomaaliya Dr: Augustine Mahiga, ayaa ka raali galiyey madaxweynaha iyo shacabka Somaliland warqad ka soo baxday xafiiskiisa oo uu madaxweynaha Somaliland si weyn u qoonsaday kuna tilmaamay mid gef ku ah qaranimadda Somaliland.

11/28/2012 6:00 AM EST
Arbaco, November 28, 2012 (HOL) — Maamulka degmada Dharkeynley ee gobolka Banaadir ayaa sheegay inay ku guuleysteen inay degmadaas ka qaadaan isbaarooyin yaallay, waxayan dowladda ka dalbadeen inay degmadaas geysto ciidammo ka hortaga in isbaarooyinka lasoo celiyo.

11/28/2012 3:24 AM EST
Arbaco, November 28, 2012 (HOL) — Wasiirka Gaashaandhigga Jamhuuriyadda federaalka Soomaaliya Mudane C/xakiin Xaaji Fiqi ayaa kulan la qaatay dhigiisa dalka Jabuuti, C/qaadir Kaamil Maxamed waxayna labadani masuul ka wada hadleen arimo ku saabsan iskaashiga labada dal.

11/28/2012 3:15 AM EST
Arbaco, November 28, 2012 (HOL) — Hay'adda Laan-Qeyrta Cas ee (ICRC) ayaa soo gabgabeysay raashin qaybin ay kawadday gobollada Koonfurta Soomaaliya, iyadoo sheegtay in deeqdaas ay ka faa'iideysteen 170,000 oo qof oo ku nool gobollada Jubbada Hoose iyo Gedo.

11/28/2012 3:14 AM EST
Arbaco, November 28, 2012 (HOL) — Maamulka Xarakada Al-Shabaab ee degmada Baardheere ayaa sheegay inay saaka gacanta ku dhigeen labo dhalinyaro oo ka yimid dhinaca degmada Mandheera ee dalka Kenya, kuwaasoo ay ku sheegeen inay yihiin basaasiin u adeegaya Kenya.

11/28/2012 2:40 AM EST
Arbaco, November 28, 2012 (HOL) — Qof ku hubeysnaa qoriga AK-47 ayaa fiidnimadii xalay ku toogtay magaalada Baladweyne sadax ruux oo rayid ah, kuwaasoo ka mid ahaa ganacsatada ku dhaqan magaalada.