11/30/2021
Today from Hiiraan Online:  _
Wararka Maanta- Isniin, Jun 18, 2012
Qaraxyo Khasaare Nafeed geystay oo siyaabo kala duwan uga dhacay qaar ka mid ah Degmooyinka Gobolka Banaadir

Isniin, June 18, 2012 (HOL) — Ugu yaraan saddex qof ayaa ku dhintay, tiro intaas ka badanna way ku dhaawacmeen qaraxyo siyaabo kala duwan uga dhacay shalay gallinkii dambe iyo xalay qaar ka mid ah degmooyinka gobolka Banaadir.

Mid ka mid ah qaraxyadan ayaa lagu weeraray gaari uu leeyahay guddoomiyaha golaha odayaasha-dhaqanka ee Muqdisho, Maxamed Xasan Xaad, waxaana ku dhintay weerarkaas qof rayid ah iyo mid ka mid ah dadkii la socday gaariga.

"Adeer gaarigayga oo alaabo ka doonay guriga Axmed Diiriye oo ku yaalla xaafadda Xamar-bile ee degmada Yaaqshiid ayaa waxaa qabsaday qarax aanan garanayn in gaariga uu saarnaa iyo inuu dibadda uga yimid," ayuu yiri Maxamed Xaad oo ka hadlay qaraxa gaarigiisa haleeyay.

Sidoo kale, guddoomiyuhu wuxuu sheegay in qof rayid ah uu qaraxaas ku dhintay darawalkii iyo ruux kale oo ilaalo ahaana ay si xun ugu dhaawacmeen, inkastoo uu ku dhintay mid ka mid ah labadan qof isbitaalkii la dhigay.

Goobjoogayaal ayaa sheegay in qaraxa gaariga haleelay uu ahaa mid aad u xooggan, iyadoo aysan jirin cid sheegatay inay mas'uul ka tahay, waxaana tani ay noqonaysaa markii ugu horreysay oo gaadiidka odayaasha dhaqanka lagu weeraro qarax.

Dhanka kale, laba qarax ayaa xalay ka dhacay isgoysyada Black Sea iyo xaafadda Howlwadaag ee Muqdihso oo ay saldhigyo ku leeyihiin ciidamada dowladda KMG ah, iyadoo mid ka mid ah qaraxyadan uu ku dhintay qof rayid ah.

Lama oga khasaaraha ciidamada dowladda kasoo gaaray qaraxyadan iyadoo ay kusoo beegmayaan qaraxyadan xilli ay saraakiisha dowladda KMG ah sheegeen inay ka hortagayaan falalka ammaan-darro ee ka dhacaya Muqdisho.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/18/2012 12:29 PM EST
Isniin, June 18, 2012(HOL): Orodyahan Soomaaliyeed oo degan magaalada Nijmegen una orda dalka Holland ayaa ku guuleystey oradka 5000m ee dalka Holland oo lagu qabtey magaalada Amsterdam garoonkeeda Olympicsh Stadion taariikhdu marka aheyd 18 June 2012.

6/18/2012 8:35 AM EST
Isniin, June 18, 2012 (HOL) — Kulan looga hadlayay sidii haweenka Soomaaliyeed ay kaalintooda uga qaadan karaan siyaasadda iyo hoggaanka dalka ayaa wuxuu ka furmay maanta xerada Xalane oo ah saldhigga ugu weyn ee ciidamada AMISOM ay ku leeyihiin Soomaaliya.

6/18/2012 8:24 AM EST
Isniin, June 18, 2012 (HOL) — Ra'iisul wasaaraha DKMG ah ee Soomaaliya, Cabdiweli Maxamed Cali oo maanta kulan la yeeshay odayaasha-dhaqanka Soomaaliyeed ee ku shirsan Muqdisho ayaa wuxuu kaga dalbaday inay sida ugu dhaqsiyaha badan kusoo gudbiyaan liiska ergadii ansixinta dastuurka cusub ee Soomaaliya.

6/18/2012 7:54 AM EST
Isniin, June 18, 2012 (HOL) — Mas’uuliyiinta maamulka gobolka Hiiraan ayaa maanta magaalada Beledweyne ku qabtay baroordiiq loo dhigay sanad-guuradii sadaxaad ee kasoo wareegatay weerarkii Ismiidaaminta ahaa ee 18, June, sanadkii 2009 ka dhacay magaalada Beledweyne.

6/18/2012 7:51 AM EST
Isniin, June 18, 2012 (HOL) — Kalluumeeysatada ka jalaabata xeebaha gobolka Jubada hoose ayaa ka canabeysa shaqo la'aan soo foodsaartay kadib markii la gudo galay xilliga Badxiranka oo gobollada Jubooyinka looga yaqaan "Xilliga Kuusiga".

6/18/2012 7:26 AM EST
Isniin, June 18, 2012 (HOL) — Xisbiga xorriyadda iyo cadaaladda ee dalka Masar oo ay leeyihiin ururka Akhwaanul Muslimiin ayaa sheegay in hoggaamiyahooda uu guul ka gaaray doorashooyinkii madaxnimo ee labadii casho ee lasoo dhaafay ka dhacay dalkaas.

6/18/2012 4:24 AM EST
Isniin, June 18, 2012 (HOL) — Hoggaamiyaha ugu sarreeya Xarakada Al-shabaab, Sheekh Mukhtaar C/raxmaan Abuu-Zubeyr oo cajalad maqal ah oo uu soo saaray ku sheegay inay dagaallada wadayaan inta ay Soomaaliya ka hirgelinayaan dowlad Islaami ah.

6/18/2012 4:13 AM EST
Isniin, June 18, 2012 (HOL) — Waxaa uga curtay dalka Koonfurta Afrika dilalka loo geysanayo Soomaalida ku noo dalkaas iyadoo toddobaadkan oo keliya lagu dilay dalkaas 14-qof, waxaana la isku raacay in dadkaas laga tooganayay laba meelood oo kala ah wadnaha iyo madaxa oo ah meelaha ugu halista badan jirka aadanaha.