5/24/2022
Today from Hiiraan Online:  _
Wararka Maanta- Talaado, July 3 , 2012
Munaasabad lagu xusayay 01-da Luuliyo oo ka dhacay Baydhabo, Bardaale, Qansax-dheere iyo Deegaanka Daynuunaay

Talaado, July 03, 2012 (HOL) — Munaasabado si heer sare loosoo agaasimay ayaa si gooni-gooni ah uga kala dhacday degmooyinka degmooyinka Baydhaba, Berdaale, Qasax-dheere iyo deegaanka Daynuunaay oo dhammaantood ka tirsan gobolka Bay.

Dadweyne fara badan ayaa si iskooda ah uga qaybgalay dabaal-dagga 1-da Luuliyo iyadoo ay noqonayso markii ugu horreysay muddo sannado ah oo degmooyinkaas laga xuso maalinta xoriyadda gobollada Koonfureed iyo israaca labada gobol ee ay ka koobnayd Jamhuuriyaddii Soomaaliya.

Magaaladdii ka dhacday Baydhabo ayaa waxaa soo qaban-qaabiyay maamulka gobolka, taasoo ay ka qaybagleen wasiiro, xildhibaano, ururrada bulshada rayidka iyo xoogagga wadaniyiinta xaafadaha degmada iyo saraakiil ka tirsan ciidamada DKMG ah iyo kuwa Itoobiya.

Munasabada oo ka dhacday garoonka kubadda cagta ee Dr Ayuub ayaa waxaa ugu horreyn ka hadlya guddomiyaha Baydhabo, Xasan Macalin Axmed (biikole) oo ugu hambalyeeyay dadkii kasoo qaybgalay 01-da Luuliyo isagoo sheegay inay tahay maalin qiime weyn leh uuna ku faraxsan yahay in sannado badan kaddib laga xuso magaalada Baydhabo.


Xildhibaan, Maxamed Xuseen Isaaq (Afaraale) oo isaguna munaasabadda hadal ka jeediyay ayaa inuu aad ugu faraxsan yahay in shacbiga reer Baydhabo ay xusaan maalinta xorriyadda, isagoo sheegay in sidoo kale uu hambalyo u diray dadka ku nool degmooyinka kale ee gobolka ka tirsan oo iyagana laga xusay maalintan.

Guddoomiyaha gobolka Bay, C/fataax Maxamed Ibraahim (Geeseey) oo isaguna ka hadlay munaasaddii loo sameeyay maalinta xorriyadda ayaa sheegay in loo baahan yahay in laga wada-shaqeeyo nabadda iyo xasilloonida dalka, haddii taasi loo wada guntadana uu imaan karo dib u dhis lagu sameeyo kaabayaasha dhaqaalaha, isagoo halkaas ka sheegay in dhaqaale badan oo gobolka loo ballan-qaaday, isagoo xusay in dib loogu dhiso doono garoonka diyaaradaha Baydhabo, garoonka kubadda cagta Dr Ayuub iyo wadooyinka magaalada.

Sidoo kale, munaasabadda waxaa ka hadlay wasiir ku xigeenka wasaaradda difaaca DKMG ah ee Soomaaliya, Maxamed Cali Catoosh wuxuuna ka sheekeeyay qiimaha xorriyaddu ay leedahay iyo halgankii loosoo maray sidii Soomaaliya ay uga xoroobi lahayd gumeystayaashii haystay, isagoo u duceeyay intii u soo halgantay sidii uu dalku xor u noqon lahaa.

Col. Nagaasi oo ka mid ah saraakiisha ciidamada Itoobiya ee Baydhabo ku sugan oo isaguna goobta ka hadlay ayaa sheegay inuu si weyn ugu faraxsan yahay inuu ka qaybgalo xus loo sameynayo maalinta xorriyadda Soomaaliya.


“Markaan Baydhabo imaanaynay farxad baad nagu soo dhaweyseen, markaan gudano wajibaadkeenana farxad baad nagu sagootin doontaan, mana baxayno inta aan ka adkaanayno Al-shabaab... ilkaha ayaan ka siinaynaa, waxaana rajeyneynaa in dowladda Soomaaliya oo cago adag ku taagan aan dalkeennii ku laabanno,” ayuu yiri Col. Nagaasi.

Ugu dambeyn, waxaa goobta ka hadlay sarakaalka ugu sarreeya ciidamada AMISOM ee Baydhabo ku sugan oo u dhashay dalka Burundi isagoo sheegay inay farxadda la qaybsanayaan shacabka Soomaaliyeed.

"Sida muuqata oo wejiyadiina aan ka akhrisan karo farxad baad isugu soo baxdeen; farxadiina iyo xorriyaddiina waa inaad ku ilaashataan nabad iyo xasillooni innagana waxaan nahay walaalahiin idin garab-taagan... Soomaaliya ha noolaato, xoriyadda iyo farxadna ku waara," ayuu yiri Jen. Jeraal.

Munaasabadahan oo kale ayaa waxay ka dhaceen degmada Xudur ee gobolka Bakool iyo degmooyin ka tirsan gobolka Gedo, iyadoo degmooyinkaas oo dhan ay gacanta ku hayso dowladda KMG ah oo gacan ka helaysa ciidamada Itoobiya iyo kuwa Kenya.





Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
7/3/2012 9:38 AM EST
Danjiraha Soomaaliya u jooga dalka Kenya Maxamed Cali Nuur (Ameeriko) ayaa si kulul u cambaareeyay weeraradii lagu qaaday magaalada Gaarissa ee xarunta gobolka waqooyi bari ee Soomaalida.

7/3/2012 9:25 AM EST
Waxaa lagu soo gaba gabeeyay Xabsiga Dhexe ee Xamar Tartan loogu magac daray Todobaadka iyo Xornimada Soomaaliya, kaasoo ay ka qeyb galeen ilaa lix kooxood oo wada ciyaaray ciyaaro is arag ah.

7/3/2012 8:58 AM EST
Talaado, July 03, 2012 (HOL) — Maamulka degmada Yaaqshiid ee gobolka Banaadir ayaa soo bandhigay maanta oo Talaado ah saddex dhallinyaro rag ah oo laba ka mid ah ay xirnaayeen dharka dumarka dhacna u geysanayay dukaan ku yaalla suuqa labaad ee Muqdisho ugu weyn (Suuq Bacaad).

7/3/2012 7:25 AM EST
Talaado, July 03, 2012 (HOL) — Maamulka tuulada Xiriiro oo ka tirsan gobolka Bari ayaa sheegay in ciidamada badda Puntland ay deegaankaas ku dileen laba qof oo shacab ah, sideed kalena ay ku dhaawacyo u geysteen.

7/3/2012 7:09 AM EST
Talaado, July 03, 2012 (HOL) — Hoggaamiyaha Raas-kambooni oo ka dagaalanta gobollada Jubbooyinka, Sheekh Axmed Maxamed Islaam (Sheekh Axmed Madoobe) ayaa sheegay in ciidamada dowladda KMG, kuwa Raas-kambooni iyo militariga Kenya ay hadda ku jiraan diyaar-garow ballaaran oo ay ku doonayaan inay ku weeraraan goobaha ay ka taliso Xarakada Al-shabaab ee gobollada Jubbooyinka.

7/3/2012 4:19 AM EST
Talaado, July 03, 2012 (HOL) — Hay'adda caawisa qoxootiga ee fadhigeedu yahay dalka Norway (NRC) ayaa sheegtay inay joojinsay howlihii samafalka ahaa ee ay ka wadday xeryaha qoxootiga Dhadhaab ee dalka Kenya, kaddib afduubkii loo geystay afar shaqaalaheeda ka mid ah oo ciidamada DKMG ah iyo kuwa Kenya ay xoog kusoo furteen.

7/3/2012 3:52 AM EST
Talaado, July 03, 2012 (HOL) — Ra'iisul wasaaraha Kenya, Raila Odinga ayaa ku hanjabay in ciidamadooda ku sugan Soomaaliya ay xoojin doonaan dagaalka ay kula jiraan Xarakada Al-shabaab oo uu ku eedeeyay weerarro ka dhacay Gaarisa iyo afduubyada shaqaale gargaar oo ka tirsan hay'adda NRC.

7/3/2012 3:45 AM EST
Talaado, July 03, 2012 (HOL) — Kooxo hubeysan ayaa magaalada Garoowe ee xarunta Puntland ku toogtay xalay taliye ku xigeenkii ciidanka booliiska Puntland, G/sare Cabdullaahi Saalax Nadaalo, iyadoo aan si dhab ah loo ogeyn sababta loo dilay iyo cid dilkiisa ka dambeysay.