3/19/2024
Today from Hiiraan Online:  _
Wararka Maanta- Isniin, Dec 3 , 2012
Roobab Mahiigaan ah oo Burburiyay Guryo ay ku noolaayeen Barakacayaal oo ku yaalla Muqdisho iyo Duleedkeeda
Isniin, December 03, 2012 (HOL) — Roobab xooggan oo Sabtidii lasoo dhaafay ka da'ay magaalada Muqdisho ayaa burburiyay guryo ka sameysan cooshado oo ay ku noolaayeen barakacayaal deegaannadoodii uga soo tagay dagaallo iyo abaaro ku dhuftay sannadkii hore.

Barakacayaashan ayaa markii hore ku noolaa guryo ay ka sameysteen baakado iyo baco ay isku xirxireen, kuwaasoo aan ka celin karin roobka, dhaxanta iyo qorraxda, iyadoo qoysaska barakacayaasha ah qaarkood ku waayeen caruurtoodii roobkii da'ay iyo qabowgii uu watay.

"Cunug yar oo aan dhalay 10 maalmood ka hor ayaa iiga dhibtay roobka iyo qabowga uu watay," ayay tiri gabar dhallinyaro ah oo codsatay inaan magaceeda la sheegin, iyadoo xustay in gurigii ay ku noolaayeen uu kusoo dubay, roobabkan uu ku da'yay muddo saacado ah korkooda.

Kaamamka qaarkood ayaa lagu arkayay biyo fara badan oo buuxiyay, kuwaasoo ay dadku ku dhex soconayaan si ay uga baxaan halkaas, waxaana tani ay sare u sii qaadday dhibaatadii ay horay u qabeen barakacayaasha ku nool kaamamka ku yaalla Muqdisho iyo daafaheeda.



Barakacayaashan ayaa waxay ku noolaayeen kaamamka ku dumay in ka badan hal sano, iyagoo roobabkan khasaaraha geystay ay yimaadeen xilli ay ka rajeynayeen xukuumadda cusub ee Soomaaliya inay ka caawiso sidii ay dib ugu noqon lahaayeen deegaannadii ay markii hore kasoo barakaceen.

Xaaladda barakacayaasha ayaa aad u xun, iyagoo sheegay inaysan haysan guryo ay ku noolaadaan, sidoo kalena aan weli kasoo gaarsiin wax gargaar ah, waxayna ku nool yihiin geedo hoostood, iyadoo dhaqaatiirtu ay ka digayaan in cudurro halis ah ay ka dillaacaan kaamamkaas.

"Waxaan ku baaqaynaa in barakacayaashan roobabku haleeleen lala soo gaaro deeq deg-deg ah oo isugu jirta guyo iyo gurmad caafimaad, si looga badbaadiyo inay ku dhacaan cudurrada faafa iyo kuwa ka dhasha qabowga maadaama aysan haysan guryo ay galaan," ayay ku taliyeen dhaqaatiirta Muqdisho qaarkood.

Dadkan ayaa waxay tan iyo sannadkii hore la dhibaatoonayeen macluul ka dhalatay abaartii ku dhufatay Soomaaliya, sidoo kalena ma haystaan guryo, cunno iyo biyo ay cabaan intaba, waxayna ugu baaqeen dowladda iyo hay'adaha deeqaha bixiya inay lasoo gaaraan gargaarro kala duwan.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/3/2012 1:51 PM EST
Isniin, December 03, 2012(HOL): Safaaradda Soomaalida ee Shiinaha iyo dhammaan Ganacsatada iyo ardeyda soomaaliyeed ee ku nool dalka China ayaa si wada jir ah, tacsi ugu dirayo Ehelladii iyo asxaabtii uu ka geeriyooday marxuumka.

12/3/2012 1:29 PM EST
Isniin, December 03, 2012 (HOL) —Kulan ay maanta isugu yimaadeen golaha wasiiradda xukuumadda federaalka Soomaaliya ayay uga doodeen arimo dhowr ah oo ay kamid tahay miinaasiyadda sanadda 2013.

12/3/2012 12:52 PM EST
Isniin, December 03, 2012 (HOL) —Ururka shaqaalaha aduunka ee (ILO) ayaa maanta tababar usoo xiray xubno katirsan maamulka gobolka banaadir.

12/3/2012 8:15 AM EST
Isniin, December 03, 2012 (HOL) — Xildhibaannada Baarlamaanka Soomaaliya ayaa u yeeray wasiirka gaashaandhigga, C/xakiin Maxamuud Xaaji Fiqi iyo wasiirradda arrimaha dibadda iyo iskaashiga caalamiga ah, Fowziyo Yuusuf Xaaji Aadan si ay u weydiiyaan su'aalo ku saabsan Xarigga wariyihiin BBC-da iyo kireyntii safaaradda Soomaaliya ee Talyaaniga.

12/3/2012 8:14 AM EST
Isniin, December 03, 2012 (HOL) — Goobjoogayaashii Caalamiga ahaa ee u kuurgaliyey qaabka doorashooyinka golaha deegaanku uga dhaceen Somaliland ayaa sheegay inay si nabadgalyo ah uga dhacday doorashaddu Somaliland, isla markaana dadku si weyn ugu soo baxeen codeynta, taas oo keentay inay ka bataan dadkii doorashooyinkii hore codeen jiray,kuwaas oo dadweynaha somaliland ku tilmaamay qaar u bislaaday dimuqraadiyada iyo usoo bixitaanka doorashooyinka.

12/3/2012 7:27 AM EST
Isniin, December 03, 2012 (HOL) — Dibadbax lagu taageerayay amarkii isbaarada lagu qaadayay ee uu dhawaan bixiyay madaxweynaha Soomaaliya, Xasan Sheekh Maxamuud ayaa maanta ka dhacay garoonka Koonis Istaadiyum ee magaalada Muqdisho.

12/3/2012 6:56 AM EST
Isniin, December 03, 2012 (HOL) — Wafdi isugu jiray wasiirro iyo saraakiil ciidan oo uu hoggaaminayay wqasiirka arrimaha gudaha iyo ammaanka Qaranka, C/kariin Xuseen Guuleed ayaa ayaa lagu weeraray maanta duleedka degmada Marko ee xarunta gobolka Shabeellada Hoose, iyagoo kusoo jeeday Muqdisho, kaddib markii ay soo gabagabeeyeen safar ay ku joogeen degmada Marko.

12/3/2012 6:26 AM EST
Isniin, December 03, 2012 (HOL) — Xildhibaannada baarlamaanka Soomaaliya ayaa maanta cod aqlabiyad ah ku ansixiyay xeer hoosaasyada uu baarlamaanka Soomaaliya ku shaqeyn doono afarta sano ee soo socota, iyadoo aanay jirin cid kasoo horjeesatay iyo cid ka aamustay.

12/3/2012 3:17 AM EST
Isniin, December 03, 2012 (HOL) — Ugu yaraan shan ka mid ah dhinacyadii dagaalku u dhexeeyay ayaa ku dhintay dagaal culus oo shalay gallinkiii dambe ku dhexmarya duleedka degmada Bardaale ee gobolka Bay ciidamada dowladda Soomaaliya iyo xoogagga Al-shabaab.

12/3/2012 3:09 AM EST
Isniin, December 03, 2012 (HOL) — Danjiraha Jabuuti u jooga Soomaaliya, Dayib Dubad Rooble ayaa shaaca ka qaaday in ciidamada ka socda dalka Jabuuti ee qaybta ka ah howlgalka AMISOM ee Soomaaliya lasoo dhameystiri doono toddobaadka soo socda.

12/3/2012 2:53 AM EST
Isniin, December 03, 2012 (HOL) — Wasiirka arrimaha gudaha iyo Amniga Qaranka ee xukuumadda Soomaaliyeed, Cabdikariin Xuseen Guuleed ayaa sheegay in degmada Marko iyo deegannada kale ee gobolka Shabeellada hoose ay kaga sugan tahay dowladda Soomaaliya la geyn doono ciidammo suga ammaanka oo isugu jira booliis iyo nabad-sugid.

12/3/2012 2:26 AM EST
Isniin, December 03, 2012 (HOL) — Maxaabiis ku jirtay xabsiga degmada Baydhabo oo looga shakisnaa inay ka tirsan yihiin Al-shababa ayaa ka baxsay xalay xabsiga degmada Baydhabo ee xarunta gobolka Bay, iyadoo mas'uuliyiinta gobolkaas ay u sheegeen warbaahinta inay socdaan baaritaanno ku aaddan qaabkii ay maxaabiistu ku baxsatay.

12/3/2012 2:15 AM EST
Isniin, December 03, 2012 (HOL) — Xildhibaannada baarlamaanka Soomaaliya ayaa lagu wadaa inay maanta codka u qaadaan xeer hoosaadyada ay ku shaqeynayaan muddada uu baarlamaankan jiray oo afar sano ah, iyadoo horay ay mudanayaashu uga doodeen xeerkan.