3/19/2024
Today from Hiiraan Online:  _
Wararka Maanta- Isniin, Dec 3 , 2012
Wasiirka Arrimaha Gudaha Somalia oo sheegay in ciidammo Ammaanka suga la geynayo Gobolka Shabeellada Hoose
Isniin, December 03, 2012 (HOL) — Wasiirka arrimaha gudaha iyo Amniga Qaranka ee xukuumadda Soomaaliyeed, Cabdikariin Xuseen Guuleed ayaa sheegay in degmada Marko iyo deegannada kale ee gobolka Shabeellada hoose ay kaga sugan tahay dowladda Soomaaliya la geyn doono ciidammo suga ammaanka oo isugu jira booliis iyo nabad-sugid.

Wasiirka iyo wafdi uu hoggaaminayo oo ku sugan degmada Marko ayaa waxay la kulmeen waxgaradka iyo mas'uuliyiinta maamulka gobolkaas iyagoo kala hadlay sidii lagu xoojin lahaa ammaanka degamda Marko iyo degmooyinka kale ee ay dowladdu kaga sugan tahay gobolkaas.

"Kulanka dhexmaray wasiirka iyo maamulka gobolka wuxuu salka ku hayay sidii loo xoojin lahaa ammaanka degmada Marko iyo degmooyinka kale ee gobolkaas ay kaga sugan tahay dowladda," ayuu yiri gudoomiye ku xigeenka dhinaca ammaanka ee gobolka Shabeellada hoose, Axmed Cumar Mudane oo ka warbixinayay kulankii ay la yeesheen wasiirka iyo xubnaha la socda.

Degmada Marko oo 90-km dhinaca Koonfureed kaga beegan Muqdisho ayaa ka mid ah degmooyinkii ay ciidamada dowladda iyo kuwa AMISOM ka qabsadeen sannadkan Al-shabaab, iyadoo sidoo kale ay ciidamada isbahaysanaya ay qabsadeen Afgooye iyo Wanlaweyn oo ay Al-shabaab ka talinaysay mudod sannado ah.

Guddoomiye ku xigeenka gobolka Shabneellada hoose oo hadalkiisa sii wata ayaa sheegay in wasiirka iyo mas'uuliyiinta gobolka ay isla garteen in degmooyinka ay dowladdu kaga sugan tahay gobolka la geeyo ciidammo isugu jira nabad-sugid iyo booliis si ay u sugaan ammaanka.

"Rajo weyn ayaan ka qabnaa in degmooyinka weli ku jira gacanta Al-shabaab aan kala wareegno, si loo geeyo ciidammo nabad-sugid iyo booliis isugu jira," ayuu yiri Axmed Mudane oo xusay in maamulkooda uu ka go'an yahay xaqiijinta ammaanka gobolka Shabeellada hoose oo dhan.

Wasiirka arrimaha gudaha oo shalay gaaray degmada Marko ee xarunta gobolka Shabeellada hoose ayaa lagu wareeray inta u dhexeysa degmadaas iyo deegaanka Shalaanbood oo 10-km u jira, iyadoo aanay jirin khasaare soo gaartay wafdiga uu hoggaaminayay wasiirka.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/3/2012 1:51 PM EST
Isniin, December 03, 2012(HOL): Safaaradda Soomaalida ee Shiinaha iyo dhammaan Ganacsatada iyo ardeyda soomaaliyeed ee ku nool dalka China ayaa si wada jir ah, tacsi ugu dirayo Ehelladii iyo asxaabtii uu ka geeriyooday marxuumka.

12/3/2012 1:29 PM EST
Isniin, December 03, 2012 (HOL) —Kulan ay maanta isugu yimaadeen golaha wasiiradda xukuumadda federaalka Soomaaliya ayay uga doodeen arimo dhowr ah oo ay kamid tahay miinaasiyadda sanadda 2013.

12/3/2012 12:52 PM EST
Isniin, December 03, 2012 (HOL) —Ururka shaqaalaha aduunka ee (ILO) ayaa maanta tababar usoo xiray xubno katirsan maamulka gobolka banaadir.

12/3/2012 8:15 AM EST
Isniin, December 03, 2012 (HOL) — Xildhibaannada Baarlamaanka Soomaaliya ayaa u yeeray wasiirka gaashaandhigga, C/xakiin Maxamuud Xaaji Fiqi iyo wasiirradda arrimaha dibadda iyo iskaashiga caalamiga ah, Fowziyo Yuusuf Xaaji Aadan si ay u weydiiyaan su'aalo ku saabsan Xarigga wariyihiin BBC-da iyo kireyntii safaaradda Soomaaliya ee Talyaaniga.

12/3/2012 8:14 AM EST
Isniin, December 03, 2012 (HOL) — Goobjoogayaashii Caalamiga ahaa ee u kuurgaliyey qaabka doorashooyinka golaha deegaanku uga dhaceen Somaliland ayaa sheegay inay si nabadgalyo ah uga dhacday doorashaddu Somaliland, isla markaana dadku si weyn ugu soo baxeen codeynta, taas oo keentay inay ka bataan dadkii doorashooyinkii hore codeen jiray,kuwaas oo dadweynaha somaliland ku tilmaamay qaar u bislaaday dimuqraadiyada iyo usoo bixitaanka doorashooyinka.

12/3/2012 7:46 AM EST
Isniin, December 03, 2012 (HOL) — Roobab xooggan oo Sabtidii lasoo dhaafay ka da'ay magaalada Muqdisho ayaa burburiyay guryo ka sameysan cooshado oo ay ku noolaayeen barakacayaal deegaannadoodii uga soo tagay dagaallo iyo abaaro ku dhuftay sannadkii hore.

12/3/2012 7:27 AM EST
Isniin, December 03, 2012 (HOL) — Dibadbax lagu taageerayay amarkii isbaarada lagu qaadayay ee uu dhawaan bixiyay madaxweynaha Soomaaliya, Xasan Sheekh Maxamuud ayaa maanta ka dhacay garoonka Koonis Istaadiyum ee magaalada Muqdisho.

12/3/2012 6:56 AM EST
Isniin, December 03, 2012 (HOL) — Wafdi isugu jiray wasiirro iyo saraakiil ciidan oo uu hoggaaminayay wqasiirka arrimaha gudaha iyo ammaanka Qaranka, C/kariin Xuseen Guuleed ayaa ayaa lagu weeraray maanta duleedka degmada Marko ee xarunta gobolka Shabeellada Hoose, iyagoo kusoo jeeday Muqdisho, kaddib markii ay soo gabagabeeyeen safar ay ku joogeen degmada Marko.

12/3/2012 6:26 AM EST
Isniin, December 03, 2012 (HOL) — Xildhibaannada baarlamaanka Soomaaliya ayaa maanta cod aqlabiyad ah ku ansixiyay xeer hoosaasyada uu baarlamaanka Soomaaliya ku shaqeyn doono afarta sano ee soo socota, iyadoo aanay jirin cid kasoo horjeesatay iyo cid ka aamustay.

12/3/2012 3:17 AM EST
Isniin, December 03, 2012 (HOL) — Ugu yaraan shan ka mid ah dhinacyadii dagaalku u dhexeeyay ayaa ku dhintay dagaal culus oo shalay gallinkiii dambe ku dhexmarya duleedka degmada Bardaale ee gobolka Bay ciidamada dowladda Soomaaliya iyo xoogagga Al-shabaab.

12/3/2012 3:09 AM EST
Isniin, December 03, 2012 (HOL) — Danjiraha Jabuuti u jooga Soomaaliya, Dayib Dubad Rooble ayaa shaaca ka qaaday in ciidamada ka socda dalka Jabuuti ee qaybta ka ah howlgalka AMISOM ee Soomaaliya lasoo dhameystiri doono toddobaadka soo socda.

12/3/2012 2:26 AM EST
Isniin, December 03, 2012 (HOL) — Maxaabiis ku jirtay xabsiga degmada Baydhabo oo looga shakisnaa inay ka tirsan yihiin Al-shababa ayaa ka baxsay xalay xabsiga degmada Baydhabo ee xarunta gobolka Bay, iyadoo mas'uuliyiinta gobolkaas ay u sheegeen warbaahinta inay socdaan baaritaanno ku aaddan qaabkii ay maxaabiistu ku baxsatay.

12/3/2012 2:15 AM EST
Isniin, December 03, 2012 (HOL) — Xildhibaannada baarlamaanka Soomaaliya ayaa lagu wadaa inay maanta codka u qaadaan xeer hoosaadyada ay ku shaqeynayaan muddada uu baarlamaankan jiray oo afar sano ah, iyadoo horay ay mudanayaashu uga doodeen xeerkan.