8/8/2022
Today from Hiiraan Online:  _
Wararka Maanta- Talaado, Dec 18, 2012
Meydadka 20-qof oo tahriibayaal ah oo kasoo caariyey xeebta Boosaaso iyo in ka badan 30 oo la la'yahay [Sawirro]


Talaada, December 18, 2012 (HOL)- Ugu yaraan 50-qof oo tahriibayaal ah ayaa geeriyoodey, kadib markii ay dooni kula degtey deegaanka Mareera oo dhowr KM ka durugsan magaalada Boosaaso ee xarunta gobolka Bari. Meydadka 18-qof oo dadkaas kamid ah ayaa ka soo caariyey xeebta, waxaa sidoo kale nolol lagu helay 4-qof, iyadoo ilaa iyo hadda la la'yahay dad ka badan 30.

Meydadka soo caariyey waxaa la keenay Isbitaalka weyn ee magaalada Boosaaso; si eheladoodu ay u aqoonsadaan, waxaana intaas kadib aas-wadareed loogu sameeyey xabaalaha Biyo-kulule ee duleedka magaalada Boosaaso.

Wasiir ku-xigeenka wasaaradda caafimaadka ee Puntalnd Marwo Zeynab Ugaas Yaasiin oo warbaahinta kula hadashay gudaha Isbitaalka ayaa tacsi u dirtay eheladii ay dadkaasi ka geeriyoodeen, waxayna sidoo kale ugu baaqday dadka ku haminaya tahriibka in ay ka digtoonaadaan.

Wasiirka ayaa sidoo kale sheegtay in dowladu ay dadaal badan ku bixisay sidii loo xakameyn lahaa safarka tahriibta, islamarkaana ay ku guuleysatey in ay dhinto tirada dadka ka safraya xeebaha gobolka Bari ee kusii jeeda dhinaca dalka Yemen.

Dhinaca kale qaybta meyda ee Isbitaalka Bender-qasim ee magaalada Boosaaso waxaa maanta soo buux dhaafiyey boqolaal dadweyne ah oo u badnaa kuwo qaraabo la ah dadka shilkaas naxdinta badan ku geeriyoodey, waxayna haweeney kamid ahi HOL u sheegtay in ay shilkaas kaga geeriyootey gabar ay eedo u tahay oo iyada oo aan ogeyn ka dhuumatay.

Si kastaba ha ahaatee dhacdooyinka noocan oo kale ah ayaan aheyn kuwo ugub ku ah xeebaha Puntland, haseyeeshee 14-kii bishii Febaraayo ee sanadkan ayey ahayd markii sidan oo kale ay xeebaha degmada Laas-qoray uga soo caariyeen meydadka 30 tahriibayaal ah oo ay bad-weynta dooni kula degtey.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
12/18/2012 8:03 AM EST
Talaado, December 18, 2012 (HOL) — Xarakada Al-shabaab ayaa boqolaal ka tirsan xoogaggeeda tababar ugu soo xirtay saldhig ay ku leeyihiin degmada Buulo-burte oo lagu magacaabo Khaalid Bin Waliid, waxaana guutadan loogu magac-daray mid ka mid ah hoggaamiyeyaashii Al-Qaacida ee la dilay Abuu-Yaxye Al-Liibi.

12/18/2012 7:17 AM EST
Talaado, December 18, 2012 (HOL) — Mas'uuliyiinta maamulka Somaliland ayaa ku dhawaaqay inay diyaar u yihiin inay lasii wadaan dowladda Somalia wadahadalladii billowday bishii Feberaayo ee sannadkan, kuwaasoo looga hadlayay sidii go'aan mideysan looga gaari lahaa mustaqbalka siyaasadda Soomaaliya.

12/18/2012 6:58 AM EST
Talaado, December 18, 2012 (HOL) — Madaxweynaha Soomaaliya, Xasan Sheekh Maxamuud oo kasoo laabtay dalka Jabuuti ayaa maanta kula kulmay xafiiskiisa ergayga Midowga Afrika ee arrimaha Soomaaliya, Maxamed Saalax Aanaadiif, isagoo kala hadlay howgallada AMISOM.

12/18/2012 6:42 AM EST
Talaado, December 18, 2012 (HOL) — Golaha Deegaanka ee degmadda Ceerigaabo ee gobolka Sanaag ayaa dib u doortay maayarkii hore ee degmadaasi Xildhibaan Ismaaciil Xaaji Nuur iyo maayar ku xigeen cusub Xildhibaan:Saalax Yuusuf Cabaase.

12/18/2012 3:58 AM EST
Isniin, December 17, 2012 (HOL) —Saraakiisha ciidamada dowladda Soomaalya ayaa sheegay in ay sugeen ammaanka wadada dheer ee isku xirta magaalooyinka Afgooye iyo Marko oo marar ay xoogagga Al-shabaab ka geeysteen weerrro dhabbagal ah.

12/18/2012 3:00 AM EST
Ciidamada dowladda federaalka Soomaaliya, kuwa raaskaambooni iyo Militariga Kenya oo iskaashanaya ayaa saaka aroortii si nabadgelyo ah kula wareegay jaziiradda Kudhaa....