Talaado, August 15, 2012(HOL): Maalmihii aanu ka soo gudubnay waxaa isa soo tarayay war ku saabsan in Xarrakada Al-Shabaab ee gacanta ku haya magaalada Kismaayo ee Gobolka Jubbada Hoose ay dadka magaaladaas u xalaaleysay cunista hilibka Waraabaha ama Dhurwaaga.Laanta Afka Soomaaliga ee VOA-da oo arrintan raad-raac ku sameysay ayaa waxay wareysi la yeelatay dad ku sugan Magaalada Kismaayo iyo Maxamed Cabdi Umal oo ka mid ah Culumaa’udiinka waa weyn ee dalka Soomaaliya iyo dibaddiisa sida weyn looga yaqaanno.Shiikh Maxamed Cabdi Umal ayaa wuxuu ka hadlay cunista hilibka Waraabaha, wuxuuna sheegay in uu cunista hilibka xayawaankaas uu yahay mid bannaan oo la cuni karo, isla markaana ay banneysay diinta Islaamka.“Walaal Waraabaha ama dhurwaaga sida loo yaqaanno xadiith ayaa ku soo arooray cunistiisa, waana xadiith-ka saxaabiga Jaabir werinayo. Wuxuu Jaabir sheegay in Nabiga CSW uu sheegay in hilibka waraabaha la cuni karo, isla markaana uu Ugaar yahay. Xadiith-kan waa saxiix, waxaana soo saaray Axmed iyo Afarta Ahlu Sunnanka ah, isla markaana ay saxiixiyeen Bukhaari iyo culumo kale”ayuu yiri Shiikh Maxamed Umal oo soo daliishaday mas’alo shaaficiyah ah oo sheegeysa in ay carabta suuqyayada ku kala iibsan jireen hilibka dhurwaaga, cid diidi jirtayna aysan jirin, iyadoo uu tibaaxay in ay weliba carabta aad u jecleyd hilibka Dhurwaaga.“Kutubteena Fiqiga ugub kuma aha oo Minhaajka iyo kutubta ka hooseysa waa ku taallaa, balse culumadeenna ayaa si kale u fasirtay oo yiri {waraabaha waa midka aan dhulkeena joogin waana midka nacaska ah ee dhulka carabaha jooga ee aan xoolaha cunin} ayay ku sheegi jireen, wax diidayana ma jiro, kutubta Imaamu Shaaficina waa ku taallaa. Mutjamaceenana waxa aysan u cuni jirin culumada ayaa tafsiirkaas siisay, haddana baahi ayaaba jirta oo dadka waxay mararka qaar gaarayaan xilligii bakhtiga u bannaanaa”ayuu yiri Shiikh Umal oo caddeeyay in warka guntiisa iyo gunaanadkiisa uu yahay in cunista hilibka waraabaha ama dhurwaaga uu bannaan yahay.Halkan ka dhegeysto Warbixinta VOAQaar ka mid ah dadka ku dhaqan magaalada Kisamayo ayaa VOA-da u sheegay in hilibka waraabaha si caadi ah loogu kala iibsado suuqyada hilibka lagu iibiyo, isla markaana hilibkiisa iyo subaggiisa la kala siisyo lacag aad u badan, iyadoo ay xuseen dadkani in markii hore hilibka Dhurwaaga lagu kala iibsan jiray si qarsoodi ah, balse hadda si caadi ah loo kala iibsado. Kiilada Hilibka Waraabaha ayaa la kala siistaa 5.50$, halka Kiiladii Subagga ahna la kala siisto 10$.Dhegeystahani la hadlay Laanta Afka Soomaaliga ee VOA-da waxaa uu sheegay in dadka qaarkiisa ay rumeysan yihiin in cunista hilibka dhurwaaga ay dawo u tahay xanuunno ay ka mid yihiin jinka sixirka iyo qallalka, iyadoo taasina si aad ah loola yaabay. Ugu dambeyntiina, dhegeyste kale oo magaciisa qariyay oo hilibka Dhurwaaga ama Waraabaha cunay ayaa sheegay in hilibkan uusan wax badan ka duwaneyn hilib Ariga gaar ahaana midka Dheyllada ah. Dad badan oo ku nool magaalada Kismaayo ayaa ka maagay in ay hilib ka soo iibsadaan suuqyada, iyago ka baqdin qaba in ay soo iibsadaan hilibka Dhurwaaga maadaama ay meel wada suran yihiin hilibkii Ariga iyo midkii Dhurwaaga ama Waraabaha.Salaad Iidow Xasan (Xiis), Hiiraan Online[email protected]