Wasiirka dastuurka Soomaaliya oo shaaciyay inaan la aqbali doonin cid aysan soo xulin hogaamiyayaashii dhaqanka ee hore (SAWIRRO)
Khamiis, April 12, 2012 (HOL) - Shir ay soo qabanqaabisay wasaarada dastuurka Soomaaliya oo lagu qabtay magaalada Nairobi ayaa looga dooday dastuurka
qabyada ah ee Soomaaliya.
Wasiirka dastuurka Soomaaliya C/raxmaan Xoosh Jibriil oo
furay shirka ayaa sheegay in xubnaha ansixinaya dastuurka qabyada ah ee
Soomaaliya oo kur u dhaafaya 800 laga soo xuli doono qabaa’ilka kala duwan ee Soomaalida.
Waxaana uu tilmaamay inaan la aqbali doonin cidii aysan soo
xulIn hogaamiyayaasha dhaqanka ee la wada ictiraafsanyahay.
“Way istaqaannaa Soomaalidu, waana la wada ogyahay
hogaamiyayaasha dhaqanka ee soo jireenka ahaa, kuwaas cid aysan soo xulin ma
aqbali doono”ayuu yiri Xoosh.
Xoosh ayaa sidoo kale sheegay in dastuurkan uu yahay mid gacanta
loo galiyay Soomaalida ayna haatan ka shaqaynayaan dhammaystirkiisa khuburo
Soomaali ah oo gaaraya 9 xubnood.
“Dastuurka waxaa gacanta ku haya khuburo Soomaali ah oo isugu jira rag iyo dumar,
ayaga ayaana soo dhammaystiraya, inta ka horraysana waxaan aruurin doonnaa
fikradaha shacabka oo aan siin doonno tixgalintooda”. Ayuu sii raaciyay
wasiirku.
Shirkan oo ahaa mid lagula tashanayay ergo ka socotay xerada qaxootiga ee
Kakuma ayaa waxaa u sharraxay kasoo qaybgalayaasha ujeedadada shirka madaxa hay’ada ka shaqaysa arrimaha horumarinta shuruucda ee IDLO Shirwac Maxamed Jaamac oo kala shaqaynayay wasaarada dastuurka la tashiyada isagoo ka dhawaajiyay muhiimada ay
leedahay in dastuurka la tashiyadiisa laga qaybgaliyo dadweynaha Soomaalida ah ee
ku dhaqan xeryaha qaxootiga.
“Maanta waxaa inala jooga wafdi ka socda xerada qaxootiga ee Kakuma waxaanan
dhagaysan doonnaa fikradahooda iyo talooyinkooda ku aadan dastuurka”. Ayuu yiri
Shirwac.
Safiirka Soomaaliya Maxamed Cali Nuur Ameeriko oo lagu casuumay kulanka ayaa
soo dhaweeyay in dadka ku dhaqan xeryaha qaxootiga laga qaybgaliyo dastuur u
samaynta dalka iyo sidoo kale dib u dhiska socda.
“Waddanka rajo wanaagsan ayaa ka muuqata,dadka ku dhaqan xeryaha qaxootigana
waa muwaadiniin xaq ku leh dalka, waxaanan ku faraxsanahay in maanta loo yeeray”.
Ayuu yiro danjire Cali Ameeriko.
Batuulo Axmed Gabal oo ka tirsan hawlwadeennada wasaarada
dastuurka oo halkaas ka hadashay ayaa jeedisay khudbad qiiro leh oo ay kaga
codsatay Soomaalida inay u naxaan dalkooda.
“Yaa noo keenay faragalinta shisheeye? Annaga ayaa waddankeenii dayacnay,
markaas ayaa dalkeenii uu noqday mid faraheena ka baxaya, walaalayaal aynu
dalkeenna u istaagno, fursad ayaa wali inoo furan aan dalkeenna ku dhisanno”. Ayay
tiri Batuulo oo si wayn loogu sacabiyay.
Madaxda iyo horjoogayaasha Soomaalida ku dhaqan xerada
qaxootiga ee Kakuma ayaa markaas kadib bilaabay inay fikradahooda ka dhiibtaan
dastuurka qabyo-qoraalka Soomaaliya iyagoo ballanqaaday inay ka qaybgali
doonaan dib u dhiska dalka.
Axmed Cabdisamad, Hiiraan Online
[email protected]
Nairobi , Kenya
