5/17/2022
Today from Hiiraan Online:  _
Wararka Maanta- Axad, Sept 9 , 2012
Guddiga Doorashada oo sheegay in mid ka mid ah Murashaxiinta uu ka Tanaasulay ka qaybgalka doorashadea Madaxweynenimo ee Soomaaliya
Axad, September 09, 2012 (HOL) — Guddoonka doorashada madaxweynaha cusub ee Soomaaliya ayaa sheegay in mid ka mid ah murashaxiinta u taagan tartanka doorasho ee madaxweynaha Soomaaliya uu sameeyay tanaasul.

Afhayeenka guddiga doorashada, xildhibaan Cismaan Libaax Ibraahim ayaa sheegay in C/raxmaan C/shakuur Warsame uu tanaasulay shalay kaddib markii uu jeediyay khudbaddiisii ku saabsanayd barnaamijka siyaasadeed haddii uu doorashada ku guuleysto.

"Doorashadu waxay dhacaysaa berri oo ay bishan ku beegan tahay 10-ka, waxaana ka tanaasulay ka qaybgalka doorashada hal murashax oo ah C/raxmaan C/shakuur Warsame," ayuu yiri Cismaan Libaax oo intaas ku daray: "Tartanka wuxuu dhex-mari doonaa 24 murashax."

C/raxmaan C/shakuur ayaan la hadlin saxaafadda lamana oga sababta keentay inuu tanaasul sameeyo, isagoo ka mid ahaa murashaxiintii buuxiyay shuruudihii looga baahnaa inay soo buuxiyaan bixiyayna 10,000 oo dollar oo is-diiwaangelin ahayd.

"Wax walba oo loo baahnaa waan diyaarinay doorashaduna waxay dhacaysaa berri oo Isniin ah," ayuu carrabka ku adkeeyay afhayeenka guddiga doorashada oo intaa ku daray in doorashadan ay tahay mid taariikhi ah oo markii ugu horreysay gudaha dalka lagu qabanayo kaddib muddo dheer.

Xildhibaan Cismaan Libaax wuxuu sheegay in doorashadu ay u dhici qaab saddex wareeg ah, murashaxiin wareegga koowaad hela saddex meelood laba meelood uu heli doono doorashada, haddii la waayo murashax helaya la geli doono wareegga labaad oo ay ku tartami doonaan afarta murashax ee ugu sarreeya, haddii cid ku soo bixi wadayna loo gudbi doono wareegga saddexaad oo ay ku tartami doonaan labad murashax ee ugu codka badan.

Murashaxiinta u taagan doorashada madaxweynaha ayaa maanta sameynayay ololayaal kala duwan oo ay ku muujinayaan waxqabadkooda, waxaana ka mid ah xubnaha sameeyay ololayaasha Shariif Sheekh Axmed oo ah casuumay qaar ka mid ah xildhibaannada baarlamaanka cusub iyo kuwii hore.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/9/2012 4:26 PM EST
Soomaaliya waxay markii ugu horreysay mudo ku dhow 22 sano ay isu diyaarinaysaa doorasho madaxtanimo oo ka dhacda dalka gudihiisa, taasoo sii xoojinaysa rajada ay Soomaali badan oo qurbaha ku nool ay ka qabaan inay dib ugu soo laabtaan dalkooda.

9/9/2012 10:15 AM EST
Axad, September 09, 2012 (HOL) - Amaanka goobaha muhiimka ah ee caasimada Soomaaliya ee Muqdisho ayaa la adkeeyay ,iyadoo ay baaritaano xoog leh samaynayaan ciidamada dawlada iyo kuwa Amisom oo jidgooyooyinka ku baaraya dadka iyo gawaarida.

9/9/2012 8:55 AM EST
Axad, September 09, 2012 (HOL) — Guddoomiyaha baarlamanaka Soomaaliya, Prof. Maxamed Sheekh Cismaan Jawaari ayaa ugu baaqay shacabka Soomaaliyeed inay ka qaybqaataan ilaalinta ammaanka inta lagu jiro doorashada madaxnimo ee dalka, isagoo sheegay in doorashadan ay tahay fursad taariikhi ah oo loo baahan yahay inaan la khasaarin.

9/9/2012 7:42 AM EST
Axad, September 09, 2012 (HOL) — Qaraxyo is-xigay oo sababay dhaawacyada lix qof oo isugu jiray shacab iyo ciidamada dowladda Soomaaliya ayaa maanta ka dhacay xaafadda suuqa xoolaha ee degmada Huriwaa, iyadoo ciidmaada dowladda ay kusoo qabteen in ka badan 70-qof baaritaanno ay ka sameeyeen xaafaddaas.

9/9/2012 6:59 AM EST
Axad, September 09, 2012 (HOL) — Madaxweyne ku xigeenka Somaliland Md. Cabdiraxmaan Cabdilaahi Ismaaciil (Saylici), iyo wefti uu hogaaminayey ayaa ka qaybgalay qalinjabinta 523 arday oo ka qalinjabiyey jaamacadda Camuud ee magaaladda Boorama ee gobolka Awdal.

9/9/2012 4:19 AM EST
Axad, September 09, 2012 (HOL) — Magaalada Muqdisho ee xarunta Soomaaliya oo lagu wado in berri oo Isniin ah lagu qabto doorashada madaxnimo ee dalka kaddib 42-sano ayaa waxaa ka socda ololayaal doorasho oo ay wadaan 25-ka murashax ee ku tartamaya xilka madaxweynenimo ee Soomaaliya.

9/9/2012 3:54 AM EST
Axad, September 09, 2012 (HOL) — Inta la xaqiijiyey lix ruux oo Soomaali ah iyo nin Itoobiyaan ah ayaa lagu dhaawacay tuullada Mfuleni oo 40-km u jirta magaalada Cape Town ee dalka Koonfur Afrika, kaddib markii habeen hore ay dukaamo halkaas ku yaallay weerareen kooxo burcad u dhashay dalka Koonfur Afrika.

9/9/2012 3:41 AM EST
Axad, September 09, 2012 (HOL) — Ugu yaraan laba qof oo mid ka mid ah uu ahaa dhinacyadii dagaalamay ayaa ku dhintay dagaal xalay ciidamada dowladda Somalia iyo kooxo hubeysan ku dhexmaray degmada Xamarjadiid ee degmada Wardhiigley oo ka mid ah 16-ka degmo ee gobolka Banaadir uu ka kooban yahay.

9/9/2012 3:22 AM EST
Axad, September 09, 2012 (HOL) — Madaxweynaha dowladdii KMG ahayd ee dalka Soomaaliya, Shariif Sheekh Axmed ayaa xalay kulan la yeeshay guddoomiyaha baarlamaanka federaalka Soomaaliya, Prof. Maxamed Sheekh Cismaan Jawaari, taas oo ay uga hadleen doorashada madaxweynenimo oo dhacaysa maalinta berri ah oo ku beegan Isniin.