5/17/2022
Today from Hiiraan Online:  _
Wararka Maanta- Axad, Sept 9 , 2012
Murashaxiinta u tartamaya Kursiga Madaxweynenimo ee Soomaaliya oo Muqdisho ka wada ololayaal doorasho oo xoog leh
Axad, September 09, 2012 (HOL) — Magaalada Muqdisho ee xarunta Soomaaliya oo lagu wado in berri oo Isniin ah lagu qabto doorashada madaxnimo ee dalka kaddib 42-sano ayaa waxaa ka socda ololayaal doorasho oo ay wadaan 25-ka murashax ee ku tartamaya xilka madaxweynenimo ee Soomaaliya.

Dadweyne fara badan oo wata sawirrada murashaxiinta qaarkood iyo baabuur ay ku xiran yihiin cod baahiyeyaal ayna ku dhaggan yihiin sawirrada murashaxiinta oo ay qaarkood heeso ka daaran yihiin ayaa lagu arkayaa waddada Maka Al-Mukarama oo ah midda ugu mashquulka badan xilligan magaalada Muqdisho.

"Xildhibaannada waxaan ugu baaqaynaa inay doortaan hoggaamiye dalka badbaadin kara," ayay ka sinnaayeen dadka dibadbaxayada dhigayay iyo codadka ka baxayay cod-baahiyeyaasha ku xiray gaadiidka.

Murashaxiinta ayaa waxay ku tartamayaan sidii ay codadka ku heli lahaayeen ayna dadka uga dhaadhicin lahayaeen inay yihiin mas'uuliyin wax badan ka bedeli doona xaalka uu dalka ku sugan yahay.

Caruur iyo haween loo dhiibay calanka Soomaaliya isla markaana sida sawirrada murashaxiinta ayaa waxay socod ku marayaan waddooyinka Muqdisho qaarkood, iyadoo warar hoose ay sheegayaan in dadkaas ay yihiin kuwo la ijaartay si dadka kale loo tuso in taageero badan uu murashaxu ku dhex leeyahay bulshada.

Jawiga ay ku jirto Muqdisho maanta ayaa si weyn uga bedelen jawiyadii ay soo martay 21-kii sano ee ay dagaalladu socdeen, waxaana xubnaha xil doonka ah ay ku tartamayaan helidda taageerada shacabka, halka kuwii hore ay taageeradooda ku raadin jireen cabsi-gelinta shacabka.

Doorashada oo berri dhacaysa ayaa lagu wadaa in isla berri lagu dhawaaqo cidda ku guuleysatay loona dhaariyo xilka, iyadoo madaxweynahaas laga sugayo inuu la tacaamulo dal aanay nabadi ka jirin iyo dad la qabsaday colaadaha dabada dheeraday.

Hiiraan Online ayaa waxay si toos ah u soo tabin doontaa doorashada madaxnimo ee dalka, iyadoo ay dadweynaha Soomaaliyeed meel walba oo ay joogaan ay kala socon doonaan HOL sida ay doorashadu u dhacayso.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/9/2012 4:26 PM EST
Soomaaliya waxay markii ugu horreysay mudo ku dhow 22 sano ay isu diyaarinaysaa doorasho madaxtanimo oo ka dhacda dalka gudihiisa, taasoo sii xoojinaysa rajada ay Soomaali badan oo qurbaha ku nool ay ka qabaan inay dib ugu soo laabtaan dalkooda.

9/9/2012 10:15 AM EST
Axad, September 09, 2012 (HOL) - Amaanka goobaha muhiimka ah ee caasimada Soomaaliya ee Muqdisho ayaa la adkeeyay ,iyadoo ay baaritaano xoog leh samaynayaan ciidamada dawlada iyo kuwa Amisom oo jidgooyooyinka ku baaraya dadka iyo gawaarida.

9/9/2012 8:55 AM EST
Axad, September 09, 2012 (HOL) — Guddoomiyaha baarlamanaka Soomaaliya, Prof. Maxamed Sheekh Cismaan Jawaari ayaa ugu baaqay shacabka Soomaaliyeed inay ka qaybqaataan ilaalinta ammaanka inta lagu jiro doorashada madaxnimo ee dalka, isagoo sheegay in doorashadan ay tahay fursad taariikhi ah oo loo baahan yahay inaan la khasaarin.

9/9/2012 8:35 AM EST
Axad, September 09, 2012 (HOL) — Guddoonka doorashada madaxweynaha cusub ee Soomaaliya ayaa sheegay in mid ka mid ah murashaxiinta u taagan tartanka doorasho ee madaxweynaha Soomaaliya uu sameeyay tanaasul.

9/9/2012 7:42 AM EST
Axad, September 09, 2012 (HOL) — Qaraxyo is-xigay oo sababay dhaawacyada lix qof oo isugu jiray shacab iyo ciidamada dowladda Soomaaliya ayaa maanta ka dhacay xaafadda suuqa xoolaha ee degmada Huriwaa, iyadoo ciidmaada dowladda ay kusoo qabteen in ka badan 70-qof baaritaanno ay ka sameeyeen xaafaddaas.

9/9/2012 6:59 AM EST
Axad, September 09, 2012 (HOL) — Madaxweyne ku xigeenka Somaliland Md. Cabdiraxmaan Cabdilaahi Ismaaciil (Saylici), iyo wefti uu hogaaminayey ayaa ka qaybgalay qalinjabinta 523 arday oo ka qalinjabiyey jaamacadda Camuud ee magaaladda Boorama ee gobolka Awdal.

9/9/2012 3:54 AM EST
Axad, September 09, 2012 (HOL) — Inta la xaqiijiyey lix ruux oo Soomaali ah iyo nin Itoobiyaan ah ayaa lagu dhaawacay tuullada Mfuleni oo 40-km u jirta magaalada Cape Town ee dalka Koonfur Afrika, kaddib markii habeen hore ay dukaamo halkaas ku yaallay weerareen kooxo burcad u dhashay dalka Koonfur Afrika.

9/9/2012 3:41 AM EST
Axad, September 09, 2012 (HOL) — Ugu yaraan laba qof oo mid ka mid ah uu ahaa dhinacyadii dagaalamay ayaa ku dhintay dagaal xalay ciidamada dowladda Somalia iyo kooxo hubeysan ku dhexmaray degmada Xamarjadiid ee degmada Wardhiigley oo ka mid ah 16-ka degmo ee gobolka Banaadir uu ka kooban yahay.

9/9/2012 3:22 AM EST
Axad, September 09, 2012 (HOL) — Madaxweynaha dowladdii KMG ahayd ee dalka Soomaaliya, Shariif Sheekh Axmed ayaa xalay kulan la yeeshay guddoomiyaha baarlamaanka federaalka Soomaaliya, Prof. Maxamed Sheekh Cismaan Jawaari, taas oo ay uga hadleen doorashada madaxweynenimo oo dhacaysa maalinta berri ah oo ku beegan Isniin.