5/17/2022
Today from Hiiraan Online:  _
Wararka Maanta- Axad, Sept 9 , 2012
Soomaali lagu dhaawacay duleedka Cape-Town ee dalka Koonfur Afrika iyo go'aanno laga soo saaray kulanka Ammaanka Soomaalida looga hadlay
Axad, September 09, 2012 (HOL) — Inta la xaqiijiyey lix ruux oo Soomaali ah iyo nin Itoobiyaan ah ayaa lagu dhaawacay tuullada Mfuleni oo 40-km u jirta magaalada Cape Town ee dalka Koonfur Afrika, kaddib markii habeen hore ay dukaamo halkaas ku yaallay weerareen kooxo burcad u dhashay dalka Koonfur Afrika.


Goobjoogayaal Soomaali ah ayaa sheegay in lagu boobay 11 dukaan oo toban ka mid ah ay lahaayeen Soomaali, halka midka kalena uu lahaa ruuxa Itoobiyaanka ah ee la dhaawacay, waxaana weerarkan fuliyay kooxo bastoolado ku hubeysan oo si caadi ah goobta uga baxsaday ka hor intii aysan soo gaarin ciidammo gurmad ahaa.

Todobaadkii hore ayay ahayd markii falal noocan oo kale ah oo lagu dhaawacay afar ruux oo Soomaali ah ay ka dhaceen isla deegaanka Mfuleni oo ka mid ahaa jiray tuulooyinka ugu nabdoon Cape Town.

Dhacdadan cusub ayaa kusoo beegmaysa xilli kulan looga hadlayay adkeynta ammaanka Soomaalida ay mas’uuliyiinta Jaaliyadda Soomaalida la qaateen saraakiisha sar-sare ee hay’adaha ammaanka gaar ahaan booliska Cape Town.

Cabdweli Sheekh C/raxmaan oo ah xoghayaha guud ee (Somali Comunity Board of South Africa) oo hormuud u ahaa Soomaalida ka qaybgashay kulankaasi ayaa sheegay in waxyaabaha la isku afgartay kulankaasi ay ka mid ahaayeen:
  1. In waqti go'an loo yeelo xilliga la xirayo dukaamada Soomaalida.
  2. In muraayadaha aanu xabadda karin lagu xiro afaafka hore ee dukaanka.
  3. In albaab labaad loo sameeyo dukaamada si loo helo irid laga bixi karo haday musiibo timaado (Emergency Exit).
  4. In laba qof ay kawada shaqeeyaan dukaamada laga billaabo galabtii illaa habeenkii xilliga la xirayo.
Waxaa sidoo kale Cabdiweli uu sheegay in kulankaasi lagu magacaabay guddi isku-dhaf ah oo Soomaaliyeed kuwaasoo xiriir wadashaqeeneed la yeelanaya ciidamada booliiska Koonfur Afrika, si looga hortago dhagar-qabayaasha caadaystay inay dhib u geystaan muwaadiniinta Soomaaliyeed.

Dhanka kale, ciidamada booliiska Koonfur Afrika ayaa lagu eedeeyay in marka ay u soo gurmadaan Soomaalida ay ka qaataan ka qaata dukaaadooda wixii ay doonaan iyadoo aan loo ogolaan.

Saddexdii bilood ee la soo dhaafay ugu yaraan 13-qof oo Soomaali ah ayaa lagu dilay deegaannada Philipy, Mfuleni, Khaylitsha, Yanga, Stelenboch iyo tuulooyin kale oo dhammaantood hoos-yimaada magaalo-xeebeedda Cape Town oo ay daggan yihiin Soomaalida ugu badan ee dalka Koonfur Afrika ku nool.

Cabdirisaaq Indha Jaceyl
[email protected]
Cape Town, Koonfur Afrika












Click here
9/9/2012 4:26 PM EST
Soomaaliya waxay markii ugu horreysay mudo ku dhow 22 sano ay isu diyaarinaysaa doorasho madaxtanimo oo ka dhacda dalka gudihiisa, taasoo sii xoojinaysa rajada ay Soomaali badan oo qurbaha ku nool ay ka qabaan inay dib ugu soo laabtaan dalkooda.

9/9/2012 10:15 AM EST
Axad, September 09, 2012 (HOL) - Amaanka goobaha muhiimka ah ee caasimada Soomaaliya ee Muqdisho ayaa la adkeeyay ,iyadoo ay baaritaano xoog leh samaynayaan ciidamada dawlada iyo kuwa Amisom oo jidgooyooyinka ku baaraya dadka iyo gawaarida.

9/9/2012 8:55 AM EST
Axad, September 09, 2012 (HOL) — Guddoomiyaha baarlamanaka Soomaaliya, Prof. Maxamed Sheekh Cismaan Jawaari ayaa ugu baaqay shacabka Soomaaliyeed inay ka qaybqaataan ilaalinta ammaanka inta lagu jiro doorashada madaxnimo ee dalka, isagoo sheegay in doorashadan ay tahay fursad taariikhi ah oo loo baahan yahay inaan la khasaarin.

9/9/2012 8:35 AM EST
Axad, September 09, 2012 (HOL) — Guddoonka doorashada madaxweynaha cusub ee Soomaaliya ayaa sheegay in mid ka mid ah murashaxiinta u taagan tartanka doorasho ee madaxweynaha Soomaaliya uu sameeyay tanaasul.

9/9/2012 7:42 AM EST
Axad, September 09, 2012 (HOL) — Qaraxyo is-xigay oo sababay dhaawacyada lix qof oo isugu jiray shacab iyo ciidamada dowladda Soomaaliya ayaa maanta ka dhacay xaafadda suuqa xoolaha ee degmada Huriwaa, iyadoo ciidmaada dowladda ay kusoo qabteen in ka badan 70-qof baaritaanno ay ka sameeyeen xaafaddaas.

9/9/2012 6:59 AM EST
Axad, September 09, 2012 (HOL) — Madaxweyne ku xigeenka Somaliland Md. Cabdiraxmaan Cabdilaahi Ismaaciil (Saylici), iyo wefti uu hogaaminayey ayaa ka qaybgalay qalinjabinta 523 arday oo ka qalinjabiyey jaamacadda Camuud ee magaaladda Boorama ee gobolka Awdal.

9/9/2012 4:19 AM EST
Axad, September 09, 2012 (HOL) — Magaalada Muqdisho ee xarunta Soomaaliya oo lagu wado in berri oo Isniin ah lagu qabto doorashada madaxnimo ee dalka kaddib 42-sano ayaa waxaa ka socda ololayaal doorasho oo ay wadaan 25-ka murashax ee ku tartamaya xilka madaxweynenimo ee Soomaaliya.

9/9/2012 3:41 AM EST
Axad, September 09, 2012 (HOL) — Ugu yaraan laba qof oo mid ka mid ah uu ahaa dhinacyadii dagaalamay ayaa ku dhintay dagaal xalay ciidamada dowladda Somalia iyo kooxo hubeysan ku dhexmaray degmada Xamarjadiid ee degmada Wardhiigley oo ka mid ah 16-ka degmo ee gobolka Banaadir uu ka kooban yahay.

9/9/2012 3:22 AM EST
Axad, September 09, 2012 (HOL) — Madaxweynaha dowladdii KMG ahayd ee dalka Soomaaliya, Shariif Sheekh Axmed ayaa xalay kulan la yeeshay guddoomiyaha baarlamaanka federaalka Soomaaliya, Prof. Maxamed Sheekh Cismaan Jawaari, taas oo ay uga hadleen doorashada madaxweynenimo oo dhacaysa maalinta berri ah oo ku beegan Isniin.