Shacabka Soomaliyeed oo rajeynaya in dalka uu geli doona xaalad ka wanaagsan midd uu hadda ku jiro kadidb doorashada Madaxweynaha
Jimco, September 07, 2012 (HOL) — Shacabka Soomaaliyeed ayaa waxay
rajeynayaan inuu dalku geli doono jawi ka wanaagsan midda uu hadda ku
jiro, kaddib doorashada madaxnimo ee Soomaaliya oo dhacaysa toddobaadka
soo socda.
Tartanka doorashada ayaa waxaa ka qaybgalaya 25 murashax oo u badan
kuwo dibadda ka yimid, waxaana ka mid ah xubnaha tartamaya madaxweynaha
watigiisu dhammaaday, Shariif Sheekh Axmed iyo ra’iisul wasaarihiisii,
Cabdiweli Maxamed Cali Gaas.
Dadweynaha Muqdisho ku nool ayaa waxay aragtiyo kala duwan ka
bixinayeen doorashada iyo isbedelka uu dalku geli doona, inkastoo aysan
dadku waxba dooranayn, hadana waxay qabaan in xildhibaanada dooranaya
madaxweynaha cusub ay yihiin kuwo aqoon leh.
"Isbedelka xukuumadeed ee dhici doona waa mid aan aad u
taageersanahay, waayo waxaan qabaa in mustaqbalka dalka uu isbedel ku
imaanayo uuna u gudbayo xaalad tan ka duwan," ayuu yiri Ayaanle Carab
Xasan oo la hadlayay wakaaladda wararka Shiinaha ee Shinwaa.
Magaalada Muqdisho ayaa waxay noqonaysaa markii ugu horreysay oo ay
ka dhacdo doorasho madaxweyne tan iyo 1967-kii markaasoo la doortay
madaxweynihii xilligaas ee la dilay C/rashiid Cali Sharma’arke, iyadoo
laba sano kaddib ay xukunka awood ciidan kula wareegeen milaterigii
Soomaaliya oo dalka xukumayay 21-sano.
Soomaalida kasoo laabtay qurbaha ayaa iyaguna qaba in doorashada
madaxnimo ee dalka ay horseedayso in dalka uu dhibaatada ka baxo.
Waxayna sheegeen in ganacsiga Spomalia uu dib u furmi doono sidoo kalena
dadka dibadaha ku nool ay dib ugu soo laaban doonaan dalka.
Xasan Cabdi Maxamed oo ka mid ah gancsatada Soomaaliyeed ayaa qaba in
doorashada ay u hoggaaminayso dalka deggenaan iyo xasillooni, dalkna uu
ka bixi doono dhibaataddii uu muddada dheer kusoo jiray iyo midda
siyaasadeed ee cakiran.
"Waxay ila tahay in doorashada ay tahay howl dalkeenna u horseedaysa
mustaqbal wanaagsan. Waxaan rajeynayaa in madaxweynaha cusub uu noqdo
mid danta dalka ka fekera dibna u soo celiya qoxootiga Soomaaliyeed ee
dibadaha ku nool, kana shaqeeya horumarka dalka. Waayo shirarka lagu
qabtay gudaha dalka way ka wanaagsan yihiin kuwii dibadda lagu qaban
jiray. Sidoo kale waxaan rajeynayaa in doorashadu ay dalka u hoggaamiso
syaasad wanaagsan," ayuu yiri ganacsde Xasan Cabdi.
Bile Isaaq Faarax, ayaa wuxuu isaguna qabaa in tani ay tahay rajadii
ugu wanaagsanayd Soomaliya labaatankii sano ee lasoo dhaafay. Isagoo
yiri: "Anigu waxaan rumeysanahay in doorashadan ay tahay mid rajo
gelinaysa Soomaaliya 21 sano oo rabashado ah kaddib, waayo waxaan
muddadaas ka jiray dalka siyaasado kala duwan. Waa inaan Alle uga
mahad-celinno iftiinka noo bidhaamay."
Magaalada Muqdisho ayaa ku jirta xilligii ugu wanaagsanayd dhinaca
ammaanka 21-kii sano ee lasoo dhaafay, waxaana ammaanka sugaya ciidamada
dowladda iyo kuwa AMISOM si ay doorashadu ugu dhaco sidii loogu
talogalay iyadoo rabashad la’aan ah.
"Waxaan u arkaa doorashada guul shacabka Soomaaliyeed u soo hoyatay,
maxaa yeelay tani waa mid ka tarjumaysa isbedel uu dalku galayo. Ma jiro
wax khilaaf ah sidii lagu arki jiray shirarkii dibadaha dalka lagu
qaban jiray. Shacabka Soomaaliyeed waxay muhiimad weyn u arkaan shirarka
lagu qabtay Muqdisho," ayuu yiri Cabdullaahi Cabdi Xuseen oo ka mid ah
shacabka Muqdisho ku nool.
Shacabka Soomaaliyeed ayaa u arka in
doorashada madaxweynaha ee toddobaadka soo socda dhacaysa ay saameyn
wanaagsan ku yeelanayso noloshooda, ayna dalka oo dhan u horseedi doonto
deggenaasho iyo horumar weyn.
Maxamed Xaaji Xuseen, Hiiraan Online
[email protected]
Muqdisho, Soomaaliya