5/17/2022
Today from Hiiraan Online:  _
Wararka Maanta- Arbaco, Sept 5 , 2012
Markab laga leeyahay dalka Kenya oo duqeeyay Dekedda iyo Garoonka Kismaayo iyo dad badan oo degmadaas ka Qaxaya
Arbaco, September 05, 2012 (HOL) — Markab dagaal oo laga leeyahay dalka Kenya ayaa duqeeyay Talaadadii shalay dekedda iyo garoonka diyaaradaha ee magaalada Kismaayo oo ah xarunta gobolka Jubbada Hoose, xilli ay degmadaas uga qaxayaan dagaallada awgood dad fara badan.

Afhayeenka milateriga Kenya, Col. Cyrus Oguna ayaa sheegay in duqeyntan ay qayb ka tahay olole la doonayo in Al-shabaab looga saaro Kismaayo, balse wuxuu ka gaabsaday inuu ka hadlo khasaaraha ay duqeyntaas geysatay.

"Duqeyntan waxay qayb ka tahay qorshaha la doonayo in Kismaayo looga saaro Al-shabaab. Saddex jaho ayay weerarradu uga socdaan," ayuu yiri Col. Oguna, isagoo rajo wanaagsan ka muujiyay in xilli dhow ay geli doonaan degmadaas.

Saraakiil u hadlay Xarakada Al-shabaab ayaa sheegay in saraakiisha Kenya iyo kuwa dowladda Soomaaliya ay adeegsanayaan dacaayado ay ku doonayaan inay dadka ku nool Kismaayo baqdin ku geliyaan si ay magaalada uga barakacaan.

Goobjoogayaal ku sugan Kismaayo ayaa sheegay in dad badan ay magaalada isaga baxayaan, kuwaasoo qaarkood aadaya dhinaca Muqdisho, halka kuwo kalena ay u baxayaan dhinaca soohdimaha u dhexeeya Soomaaliya iyo Kenya.

Bishii hore ayay saraakiisha hoggaaminaya ciidamada Kenya ee AMISOM ka tirsan waxay saxaafadda u sheegeen inay qabsan doonaan Kismaayo inta aysan dhicin doorashada madaxweynaha Soomaaliya oo lagu wado inay dhacdo 10-ka bishan September.

"Xaaladdu aad ayay u adag tahay, dad badan ayaa isaga baxaya magaalada, balse xoogagga Al-shabaab ay isticmaalayaan awood si aysan dadku u barakicin. Dadku waxaa cabsi weyn geliyay duqeymaha joogtada ka noqaday magaalada," ayuu yiri Maxamed Cali oo ka mid ah dadkii ka barakacayay Kismaayo.

Sidoo kale, Maxamuud Geelle oo ka mid ah waxgaradka Kismaayo ayaa sheegay in qof walba uu doonayo inuu ka baxo magaalada si uu uga nabad galo dagaallada iyo duqeymaha ku dhacaya magaalada.

Xarakada Al-shabaab ayaa ciidammo badan dhoobtay daafaha iyo gudaha degmada Kismaayo iyadoo wacad ku martay inay difaacanayso, iyadoo Kismaayo ay tahay magaalada ugu weyn magaalooyinka ay Al-shabaab xilligan ka taliso.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/5/2012 12:13 PM EST
Arbaco, September 05, 2012 (HOL) — Guddiga doorashada madaxweynaha Somalia ayaa maanta shaaciyay magacyada murashaxiin buuxiyay shuruudihii looga baahnaa kuwaasoo ka mid ah 37 xubnood oo illaa iyo hadda gudbiyay araajidooda.

9/5/2012 8:49 AM EST
Arbaco, September 05, 2012 (HOL) — Guddoomiyaha xisbiga Mucaaradka ah ee UDUB, Daahir Rayaale Kaahin ayaa waxba kama jiraan ku tilmaamay qoraal kasoo baxay guddida diiwaangelinta doorashooyinka madaxweynenimo ee Somaliland oo sharci-daro ku tilmaamay shirkii lagu doortay musharaxiinta doorshada madaxweynenimo ee Somaliland uga qaybgeli doona xisbiga UDUB oo kala ah, Cali Waran-Cadde iyo Axmed Xaaji Daahir.

9/5/2012 8:27 AM EST
Arbaco, September 05, 2012 (HOL) — Dowladda Soomaaliya iyo AMISOM ayaa sheegay maanta in ciidamadooda ay la wareegeen deegaanno ku yaalla xeebta bad-weynta Hindiya oo ay ka mid tahay Ceel-macaan oo ay ku taallo dekeda macmal ah oo ay sheegeen in Al-shabaab ay u isticmaali jirtay inay kala soo dagaan hbka iyo dagaalyahannada ajnabiga ah.

9/5/2012 7:16 AM EST
Arbaco, September 05, 2012 (HOL) — Dalladda dhaliyarada bartamaha iyo Koofurta Soomaaliya (South Central Somali Youth Umbrella) ayaa kulan weyn oo uu ka qayb-galeen arday iyo dadweyne fara badan ayaa waxay ku qabteen Muqdihso.

9/5/2012 3:58 AM EST
Arbaco, September 05, 2012 (HOL) — Madaxweynaha Somaliland, Axmed Maxamed Maxamuud (Siilaanyo) oo shalay galabta ku laabtay magaalada Hargeysa kaddib ka qaybgalkii aaskii ra'iisul wasaarihii hore ee Itoobiya Meles Zenawi ayaa sheegay inay soo dhaweynayaan cid walba oo kusoo baxda doorashada madaxweynenimo ee Soomaaliya.

9/5/2012 3:19 AM EST
Arbaco, September 05, 2012 (HOL) — Dadka ku dhaqan degmooyinka Maxaas iyo Moqokori 24-kii saac ee la soo dhaafay waxaa ay ku jireen gurmad xoog leh oo la xiriir bal sidii wax badan looga ogaan lahaa ugu danbeytii khasaaraha uu sababay dab habeen hore qabsaday dhul howd ah oo u dhaxeeya labada degmo.

9/5/2012 3:14 AM EST
Arbaco, September 05, 2012 (HOL) — Ugu yaraan lix qof oo ay ku jiraan labadii dhinac ee dagaalamay ayaa ku dhintay dagaal culus oo xalay saqdii dhexe gudaha degmada Garbahaarey ku dhexmaray ciidamada dowladda Soomaaliya iyo xoogagga Al-shabaab.