1/24/2022
Today from Hiiraan Online:  _
Wararka Maanta- Sabti, Sept 29, 2012
Madaxweynaha Soomaaliya oo Ururrada Bulshada Rayidka ah ka dalbaday inay kala shaqeeyaan dib u dhiska dalka iyo Ammaanka
Sabti, September 29, 2012 (HOL) — Madaxweynaha Dowladda Soomaaliya, Xasan Sheekh Maxamuud ayaa Jimcihii shalay kulan looga hadlayay ammaanka iyo dib u dhiska dalka kula yeeshay xarunta madaxtooyada xubno ka socday ururrada bulshada rayidka Soomaaliyeed oo uu isagu ka mid ahaan jiray.

Kulanka oo ahaa mid intiisa badan diiradda lagu saaray sidii ay ururrada bulshada rayidka qaybtooda uga qaadan lahaayeen horumarinta dalka iyo sugidda ammaanka ayaa waxaa hadallo ka jeediyay madaxweynaha Soomaaliya iyo mas’uul ka tirsan bulshada rayidka ah.

“Bulshada rayidka ah waxaa looga baahan yahay inay ka qaybqaataan sugidda ammaanka, waayo waxaa dhacaysa in qof aan wax galabsan oo kasoo baxay maqaayad la dilo,” ayuu yiri madaxweyne Xasan Sheekh, oo sheegay in bulshada rayidka ah ay door muhiim ah ka qaataan dib u dhiska iyo horumarinta dalka.

Madaxweynuhu wuxuu hadalkiisa ku sheegay in dowladdu ay la dagaalamayso musuq-maasuqa si loo helo dowlad tayo oo gudata howlaha ay shacabka Soomaaliyeed ka sugayaan, sidoo kalena ay dowladda ka go’an tahay in ammaanka guud ee dalka ay adkeyso si shacabka Soomaaliyeed ay u helaan ammaan buuxa.



Sidoo kale, xubno ka tirsan ururrada bulshada rayidka oo kulanka ka hadlay ayaa kula taliyay madaxweynaha inuu xoojiyo dib u heshiisiinta, dhalliyarada la dareensiiyo inay iyagu leeyihiin dalka si ay u dareemaan qiimaha dalkooda ayna uga qaybqaataan difaaciisa.

“Madaxweyne waxaan kaa codsanaynaa in haweenka iyo dhallinyarada wax laga siiyo hoggaanka dalka,” ayay tiri mid ka mid ah haweenkii ka socday bulshada rayidka ah ee kulanka ka qaybgashay, iyadoo soo dhaweysay kaalinta ay haweenku ku yeesheen hay’adaha dowladda.

Ugu dambeyn, xubnaha bulshada rayidka ah waxay sheegeen inay dhallinyarada u sameyn doonaan wacyi-gelin si ay uga qaybqaataan dib u dhiska dalkooda, maadaama ay dhalintu yihiin mustaqbalka dalka.

Madaxweynaha Soomaaliya oo laga sugayo inuu ku dhawaaqo ra’iisul wasaare soo dhisa xukuumad hoggaamisa dalka, ayaa wuxuu tan iyo markii la magacaabay kulammo la yeelanayay qaybaha kala duwan ee bulshada, iyadoo kulankan uu qayb ka ahaa kulammadaas.




Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/29/2012 5:48 PM EST
Sabti, September 29, 2012(HOL): Fadhigii 21aad ee Golaha Xuquuqul Insaanka ee QM ayaa lagu soo gabagabeeyay magaalada Geneva ee dalka Switzerland. Kulankan ayaa si weyn waxaa looga hadlay xaaladda Xuquuqul Insaanka ee dalka Soomaaliya iyo xaaladda kala guurka ah ee uu dalka Soomaaliya soo maray.

9/29/2012 9:58 AM EST
Sabti, September 29, 2012 (HOL) — Deegaannka Ceel-jaale ee duleedka magaalada Baladweyne waxaa gaaray dadkii ka barakacay fatahaadii maalintii shalay ku dhuftay magaalada Baladweyne ee xarunta gobolka Hiiraan, kuwasoo waqtigan ay soo food-saareen xaalado adag dhinaca nolasha ah.

9/29/2012 9:18 AM EST
Sabti, September 29, 2012 (HOL) — Hal qof ayaa ku dhintay, saddex qof oo kalena way ku dhaawacmeen duqeyn ay diyaaradaha dalka Kenya u geysteen degmada Baardheere ee gobolka Gedo, halkaasoo ay ka taliso Xarakada Al-shabaab.

9/29/2012 8:40 AM EST
Sabti, September 29, 2012 (HOL) — Abaanduulaha ciidamada milateriga Soomaaliya Jen. Cabdikariin Yuusuf Aadan (Dhego-badan) oo saxaafadda kula hadlay Muqdisho ayaa sheegay inay ciidamada dowladda iyo kuwa Kenya siiyeen amar ah inaysan gelin gudaha magaalada Kismaayo, sababo jira awgood.

9/29/2012 8:01 AM EST
Sabti, September 29, 2012 (HOL) — Kooxo baastoolado ku hubeysan ayaa laba qof oo shacab ah siyaabo kala duwan ugu toogtay duhurnimadii maanta xaafado ka tirsan magaalada Kismaayo, iyadoo dilalkan ay ka dhigayaan dadka maanta oo keliya lagu dilay Kismaayo saddex qof oo shacab ah.

9/29/2012 7:52 AM EST
Sabti, September 29, 2012 (HOL) — Golaha Wakiiladda Somaliland ayaa kal-fadhigoodii maanta afar xildhibaan xilalka uga xayuubin, kuwaasoo 20 kal-fadhi oo isku xiga aan kasoo xaadirin fadhiyada Golahaasi.

9/29/2012 7:50 AM EST
Sabti, September 29, 2012 (HOL) — Ugu yaraan hal qof ayaa ku dhintay laba kalena dhaawacyo kala duwan ayaa kasoo gaaray kaddib markii bam-gacmeed lagu weeraray maanta suuqa qoryaha lagu qoro oo ku yaalla magaalada Baydhabo ee xarunta gobolka Bay.

9/29/2012 6:29 AM EST
Sabti, September 29, 2012 (HOL) - Dadweyne taageersan madaxweynaha dhawaan loo doortay Jamhuuriyada Soomaaliya Xassan Sheekh Maxamuud ayaa dibad baxyo ka sameeyay degmada Galdogob ee gobolka Mudug.

9/29/2012 3:45 AM EST
Sabti, September 29, 2012 (HOL) — Xarakada Al-shabaab ayaa shaaca ka qaaday maanta in xalay la xiray xafiisyadii maamulkoodu ku lahaa magaalada Kismaayo ee xarunta gobolka Jubbada Hoose, balse ay ciidamadeedu diyaar u yihiin inay la dagaalamaan cid walba oo kasoo horjeedda ku dhaqanka shareecada Islaamka.

9/29/2012 3:22 AM EST
Sabti, September 29, 2012 (HOL) — Xaaladda magaalada Kismaayo ayaa saaka ah mid aad u kacsan, iyadoona magaalada ay ka socoto bililiqo iyo boob loo geysanayo xarumihii maamulka Al-shabaab ee Magaalada Kismaayo.

9/29/2012 3:17 AM EST
Sabti, September 29, 2012 (HOL) — Saraakiil ka socda sirdoonka magaalada Hargeysa ee Somaliland ayaa habeen hore saqdii dhexe xabsiga u taxaabay wariye C/fataax Maxamuud Caydiid oo ka tirsan wargeyska Saxafi oo kasoo baxa magaalada Hargeysa.