1/24/2022
Today from Hiiraan Online:  _
Wararka Maanta- Sabti, Sept 29, 2012
Ciidamadda Somaliland oo Xabsiga u taxaabay Wariye ka tirsanaa Wargeyska Saxafi ee Magaalada Hargeysa kasoo baxa
Sabti, September 29, 2012 (HOL) — Saraakiil ka socda sirdoonka magaalada Hargeysa ee Somaliland ayaa habeen hore saqdii dhexe xabsiga u taxaabay wariye C/fataax Maxamuud Caydiid oo ka tirsan wargeyska Saxafi oo kasoo baxa magaalada Hargeysa.

Saraakiishan ayaa xafiiska wargeyska ka kaxaystay wakhti lagu qiyaaso labaddii habeenimo goor wargeyska shaqadiisa dhamaatay, taas oo cabsi galisay shaqaalihii xarunta ku sugnaa wakhtigaas, isla markaana sugu kari waayeen ciidamaddu inta uu waagu baryayo.

“Xilli dambe oo wargeyska shaqadiisi dhamaatay oo ku beegnayd ilaa labadii habeenimo ayey ciidan uu hogaaminayo madaxda sirdoonka gobolka Hargeysa xafiiska noogu yimaadeen, kuwaas oo noo sheegay in wariyaha Cabditafaax amar lagu siiyo in la soo xidho”ayuu yidhi mid ka mid ah hawl-wadeenadda wargeyska HOL uga waramayey qaabka loo xidhay.

Shaqaaluhu waxay sheegeen inay saraakiishan sirdoonku  u sheegeen in amarka uu soo bixiyey taliyaha sirdoonka oo dalka dibadda kaga maqan, isla markaana aanay haysan wax tafaasiil ah oo sababta xadhigiisa ah oo ay bixinayaan.

Sidoo kale, Tifaftiraha wargeyska Mustafe Sh. Cumar, ayaa saraakiisha u sheegay in wixii dacwad ah ee laga qabo wargeyska uu ku shaqo leeyahay tifaftiraha wargeyska, isla markaana isaga kala xisaabtamaan, balse waxay sheegeen in amarka lagu soo siiyey in wariye Cabdifaraax in la soo qabto, sidaasna ay ku xidheen.

Maaha markii ugu horaysay ee xukuumadda Axmed Siillaanyo xabsi u taxaabto wariyeyaal, iyadoo aan loo soo marin haba-yaraatee sifaha sharciga ah ee  Dastuurka Somaliland, taas oo damaanad qaaday madax banaanidda warbaahinta, cidii ka cabatana sifo sharci ah usoo marto.

Xadhigan waxa cambaareeyey ururka Suxufiyiinta Somaliland ee SOLJA, kaas oo sheegay inay khalad tahay in wariye la iska xidho, iyadoon loo soo marin sifihii sharciga, isla markaana habeen badh xabsiga loo taxaabo.

Barkhad-Ladiif  M. Cumar, Hiiraan Online  
[email protected]
Hargeysa, Somaliland












Click here
9/29/2012 5:48 PM EST
Sabti, September 29, 2012(HOL): Fadhigii 21aad ee Golaha Xuquuqul Insaanka ee QM ayaa lagu soo gabagabeeyay magaalada Geneva ee dalka Switzerland. Kulankan ayaa si weyn waxaa looga hadlay xaaladda Xuquuqul Insaanka ee dalka Soomaaliya iyo xaaladda kala guurka ah ee uu dalka Soomaaliya soo maray.

9/29/2012 9:58 AM EST
Sabti, September 29, 2012 (HOL) — Deegaannka Ceel-jaale ee duleedka magaalada Baladweyne waxaa gaaray dadkii ka barakacay fatahaadii maalintii shalay ku dhuftay magaalada Baladweyne ee xarunta gobolka Hiiraan, kuwasoo waqtigan ay soo food-saareen xaalado adag dhinaca nolasha ah.

9/29/2012 9:18 AM EST
Sabti, September 29, 2012 (HOL) — Hal qof ayaa ku dhintay, saddex qof oo kalena way ku dhaawacmeen duqeyn ay diyaaradaha dalka Kenya u geysteen degmada Baardheere ee gobolka Gedo, halkaasoo ay ka taliso Xarakada Al-shabaab.

9/29/2012 8:40 AM EST
Sabti, September 29, 2012 (HOL) — Abaanduulaha ciidamada milateriga Soomaaliya Jen. Cabdikariin Yuusuf Aadan (Dhego-badan) oo saxaafadda kula hadlay Muqdisho ayaa sheegay inay ciidamada dowladda iyo kuwa Kenya siiyeen amar ah inaysan gelin gudaha magaalada Kismaayo, sababo jira awgood.

9/29/2012 8:01 AM EST
Sabti, September 29, 2012 (HOL) — Kooxo baastoolado ku hubeysan ayaa laba qof oo shacab ah siyaabo kala duwan ugu toogtay duhurnimadii maanta xaafado ka tirsan magaalada Kismaayo, iyadoo dilalkan ay ka dhigayaan dadka maanta oo keliya lagu dilay Kismaayo saddex qof oo shacab ah.

9/29/2012 7:52 AM EST
Sabti, September 29, 2012 (HOL) — Golaha Wakiiladda Somaliland ayaa kal-fadhigoodii maanta afar xildhibaan xilalka uga xayuubin, kuwaasoo 20 kal-fadhi oo isku xiga aan kasoo xaadirin fadhiyada Golahaasi.

9/29/2012 7:50 AM EST
Sabti, September 29, 2012 (HOL) — Ugu yaraan hal qof ayaa ku dhintay laba kalena dhaawacyo kala duwan ayaa kasoo gaaray kaddib markii bam-gacmeed lagu weeraray maanta suuqa qoryaha lagu qoro oo ku yaalla magaalada Baydhabo ee xarunta gobolka Bay.

9/29/2012 6:29 AM EST
Sabti, September 29, 2012 (HOL) - Dadweyne taageersan madaxweynaha dhawaan loo doortay Jamhuuriyada Soomaaliya Xassan Sheekh Maxamuud ayaa dibad baxyo ka sameeyay degmada Galdogob ee gobolka Mudug.

9/29/2012 3:45 AM EST
Sabti, September 29, 2012 (HOL) — Xarakada Al-shabaab ayaa shaaca ka qaaday maanta in xalay la xiray xafiisyadii maamulkoodu ku lahaa magaalada Kismaayo ee xarunta gobolka Jubbada Hoose, balse ay ciidamadeedu diyaar u yihiin inay la dagaalamaan cid walba oo kasoo horjeedda ku dhaqanka shareecada Islaamka.

9/29/2012 3:22 AM EST
Sabti, September 29, 2012 (HOL) — Xaaladda magaalada Kismaayo ayaa saaka ah mid aad u kacsan, iyadoona magaalada ay ka socoto bililiqo iyo boob loo geysanayo xarumihii maamulka Al-shabaab ee Magaalada Kismaayo.

9/29/2012 3:18 AM EST
Sabti, September 29, 2012 (HOL) — Madaxweynaha Dowladda Soomaaliya, Xasan Sheekh Maxamuud ayaa Jimcihii shalay kulan looga hadlayay ammaanka iyo dib u dhiska dalka kula yeeshay xarunta madaxtooyada xubno ka socday ururrada bulshada rayidka Soomaaliyeed oo uu isagu ka mid ahaan jiray.