8/10/2022
Today from Hiiraan Online:  _
Wararka Maanta- Arbaco, Sept 26, 2012
Wasiirka Arrimaha Gudaha Soomaaliya oo sheegay in Ciidammo Ammaanka suga lagu daadiyay Degmooyinka Gobolka Banaadir
Arbaco, September 26, 2012 (HOL) — Wasiirka arrimaha gudaha ee xukuumadda uu waqtigeedu dhammaadka yahay, C/samad Macallin Maxamuud ayaa shaaciyay inay degmooyinka gobolka Banaadir dhigeen ciidammo suga ammaanka Muqdisho, kaddib dilal qorsheysan iyo qaraxyo ka dhacayay magaalada toddobaadyadii ugu dambeeyay.

C/samad Macallin ayaa sheegay in ciidamadan la dhigay baro muhiim ah, isagoo sheegay in cid walba oo ammaanka wax u dhimaysa la qaban doono, lana marsiin doono sharciga, taasoo uu sheegay inay qayb ka tahay adkeynta ammaanka Muqdisho.

"Ciidamadii goobaha qaar horay u joogay waa la kordhiyay, waxaa sidoo kale baro cusub la geeyay ciidammo isugu jira kuwo labisan iyo kuwo aan la bisnayn si loo sugo ammaanka caasimadda," ayuu yiri wasiirka oo la hadlayay saxaafadda.

Sidoo kale, wasiirku wuxuu sheegay inay socdaan qorshayaal lagu xasiliyo amniga guud ee caasimadda, wuxuuna xusay in ciidamada dowladda lagu arki doono goobo aan horay loogu arag.

Wasiirku wuxuu sheegay in go'aanno adag laga soo saaray rasaasta ay ciidamada dowladdu ka ridayaan magaalada dhexdeeda taasoo cabsi weyn ku beerta mararka qaarkood shacabka, isagoo xusay in askarigii shacabka dhexdiisa rasaas ku rida laga qaadi doono tallaabo sharciga waafaqsan.

"Taliyeyaasha ciidamada qalabka sida go'aan ayay ka gaareen in xabad lagu rido magaalada dhexdeeda maalin cad, waa arrin aan sharciga waafaqsaneyn in ciidan  labisan ay rasaas ku dhex tuuraan shacabka dhexdiisa," ayuu yiri wasiirka arrimaha gudaha xukuumadda waqtigeedu dhammaadka yahay.

Hadalkan ayaa wuxuu imaanayaa iyadoo shalay magaalada Muqdisho laga maqlay mar qura rasaas fara badan; taasoo ay ridayeen qaybaha kala duwan ciidamada, kadib markii la sheegay in Maxamed C/llaahi Farmaajo loo magacabay ra'iisul wasaaraha cusub ee Soomaaliya, taasoo madaxtooyadu ay markiiba beenisay.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/26/2012 8:58 AM EST
Arbaco, September 26, 2012 (HOL) — Waxaa maanta xarunta degmada Wadajir ee magaalada Muqdihos lagu qabtay xaflad lagu sagootinayay madaxweynihi hore ee Soomaaliya, Shariif Sheekh Axmed, laguna soo dhaweeyay madaxweynaha cusub, Xasan Sheekh Maxamuud.

9/26/2012 8:58 AM EST
Arbaco, September 26, 2012 (HOL) — Aqoonyahanno, Siyaasiyiin iyo Odoyaal kasoo jeeda gobollada Jubooyinka iyo Gedo ayaa si kulul u cambaareeyay dilkii askari katirsan ciidamada Kenya uu dad rayid ah ugu geeystay nawaaxiga deegaanka Birta dheer ee gobolka Jubada Hoose.

9/26/2012 8:36 AM EST
Arbaco, September 26, 2012 (HOL) — Xukuumadda Somaliland ayaa soo dhawaysay khuburo ku takhasusay sida loo baadho xasuuqyada caalamka ka dhaca iyo lafaha bani’aadamka, kuwaas oo dib u soo fiqi doono xabaalo wadareedyo ay dad badan oo dawladii hore ku laysay magaaladda Hargeysa ku jiraan, gaar ahaan goobta loo yaqaan badhka.

9/26/2012 8:07 AM EST
Arbaco, September 26, 2012 (HOL) — Ergayga xoghayaha guud ee Qaramada Midoobay uga wakiilka ah arrimaha Soomaaliya, danjire Augustine Mahiga ayaa sheegay in xiligii hore iyo hadda ay rajadiisa ku aaddan Soomaaliya aad u kala duwan tahay, wuxuuna xusay in xilligii hore uu ka rajo wanaagsan yahay xilligan.

9/26/2012 7:34 AM EST
Arbaco, September 26, 2012 (HOL) — Saraakiisha u hadlay milateriga dalka Kenya ayaa sheegay in duqeymo ay diyaaradahoodu ka geysteen garoonka diyaaradaha Kismaayo ay ku burburiyeen kaydad hub oo ay Al-shabaab lahayd iyo saldhigyo ay isticmaali jireen Al-shabaab, iyadoo saraakiil u hadlay Al-shabaab ay beeniyeen warkaas.

9/26/2012 3:53 AM EST
Arbaco, September 26, 2012 (HOL) — Afhayeenka howgallada ee Al-shabaab, Sheekh C/casiis Abuu-Muscab oo saxaafadda la hadlay ayaa si kulul uga jawaabay hadal uu mas'uul ka tirsan Xisbul Islaam ku sheegay inay kaga baxeen midowgii ay horay ula galeen Al-shabaab.

9/26/2012 3:29 AM EST
Arbaco, September 26, 2012 (HOL) — Maraakiib nooca dagaalka oo la aaminsan yahay inay leedahay dowladda Kenya ayaa saaka dhowr gantaal ku tuuray magaalada Kismaayo ee gobolka Jubbada Hoose, walow aan illaa imika la sheegin cid wax ku noqotay duqeyntaas.