1/20/2022
Today from Hiiraan Online:  _
Wararka Maanta- Jimco, Sept 21, 2012
Wariyeyaashii ku geeriyooday Weerarradii Ismiidaaminta ahaa ee xalay ka dhacay Muqdisho oo Maanta la Aasayo

Jimco, September 21, 2012 (HOL) — Warieyaashii ku dhintay Qaraxyadii shalay ka dhacay Muqdisho ayaa lagu wadaa in maanta lagu aaso Muqdisho, iyadoo tani ay ka dhigayso tirada wariyeyaasha lagu dilay sannadkan Soomaaliya 12-wariye oo intooda badan ku dhintay Muqdisho.

Saddex wariye oo laba ka mid ah ka tirsanaa idaacadda iyo telefishinka dowladda ayaa ku dhintay qaraxyadii ismiidaaminta ahaa ee shalay ka dhacay Muqdisho, iyadoo tiro kale oo wariyeyaal ahna ay ku dhaawacmeen.

"Aaska weyn ayaa loo sameyn doonaa wariyeyaashan, runtiina waa mid aad looga xumaado in wariyeyaasha iyo dadka shacabka ah la beegsado," ayuu yiri mas'uul ka tirsan warbaahinnada ka howlaga Muqdisho.



Wariyeyaasha dhintay ayaa waxay kala ahaayeen: Cabdiraxmaan Yaasiin oo ahaa agaasimaha idaacadda VOD, Liibaan Cali Nuur iyo Cabdisataar Daahir Sabriye oo ka tirsanaa iyaguna idaacadda iyo telefishinka dowladda Soomaaliya.

Xarakada Al-shabaab oo lagu eedeeyay weerarradan oo ahaa kuwo ay fuliyeen laba nin oo waxyaabaha qarxa isku soo xiray ayaan weli ka hadlin, balse mas'uuliyinta dowaldda ayaa ku adkeysanaya inay ahaayeen weerarradan kuwo ay Al-shabaab soo abaabushay.

Tan iyo sannadkii 2009 ayaa waxay noqonaysaa markii ugu horreysay oo saddex wariye ay ku dhintaan hal goob oo qaraxyo lagu weeraray, iyadoo la xusuusto in dhowr wariye ay ku dhinteen qarax ka dhacay hoteelka Shaamow ee Muqdisho.

Dhanka kale, dadkii shacabka ahaa ee iyaguna ku dhintay weerarka ayaa lagu wadaa in maanta qaarkood lagu aaso Muqdisho, halka kuwo kalena xalay siyaabo kala duwan loogu aasay degmooyinka Muqdisho qaarkood.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/21/2012 8:50 AM EST
Kooxo bastoolado ku hubaysan ayaa toogtay wariye Xassan Yuusuf Absuge oo kamid ahaa warfidiyeenka ka hawlgala magaalada Muqdisho.

9/21/2012 6:16 AM EST
Jimco, September 21, 2012(HOL): Xarunta Dr. Ismaaciil Jimcaale Cosoble ee xuquuqda aadanaha ayaa cambaareyn kulul dusha uga tuurtay ciddii ka dambeysay qaraxii lagu halaagmay ee shalay ka dhacay Magaalada Muqdisho, waxaana warsaxaafadeed ka soo baxay xarunta oo la soo gaariiyay HOL uu u qornaa sidan:

9/21/2012 4:24 AM EST
Jimco, September 21, 2012 (HOL) — Dowladda Mareykanka ayaa ka hadashay dagaalka lagula jiro Al-shabaab ee ka socda Jubbooyinka, kuwaasoo lagu doonayo in lagu qabsado magaalada Kismaayo ee xarunta gobolka Jubbada Hoose.

9/21/2012 4:15 AM EST
Jimco, September 21, 2012 (HOL) — Madaxweynaha Soomaaliya, Xasan Sheekh Maxamuud ayaa si adag u cambaareeyay weerarradii Ismiidaaminta ahaa ee xalay ka dhacay maqaayad shaaha lagu cabo oo ku dhow madaxtooyada Soomaaliya ee Muqdisho, wuxuuna ku tilmaamay kuwo fulaynimo ah oo lagu dilay dad aan waxba galabsan.

9/21/2012 4:13 AM EST
Jimco, September 21, 2012 (HOL) — Tirada dadkii ku dhintay qaraxyadii xalay ka dhacay Muqdisho ayaa aad u sii kordhay, iyadoo tiradu ay haadda marayso 22-qof oo shacab u badnaa, iyadoo aysan weli ka hadlin weerarkan Xarakada Al-shabaab oo ay dowladdu ku eedeysay.

9/21/2012 4:12 AM EST
Jimco, September 21, 2012 (HOL) — Alle ha u naxariistee fannaankii weynaa ee Faysal Cumar Mushteek ayaa xalay goor dambe ku geeriyooday jidka isku xidha Magaalada Hargeysa iyo Berbera dhexdoodda oo la doonayey in dhakhtar dibadeed loo diro.