5/17/2022
Today from Hiiraan Online:  _
Wararka Maanta- Talaado, Sept 11, 2012
Mudaaharaadyo lagu Taageerayo Madaxweynaha Soomaaliya oo ka dhacay Degmada Balcad ee Gobolka Shabellada Dhexe
Talaado, September 11, 2012 (HOL) — Dibadbax lagu taageerayo madaxweynaha cusub ee jamhuuriyadda federaalka Soomaaliya ayaa maanta ka dhacay degmada Balcad ee gobolka Shabeellada dhexe, iyadoo ay halkaas isugu soo baxeen kumannaan qof.

Dadweynaha ayaa ku qaylinayay erayo ay ku taageerayaan doorashada uu kusoo baxay madaxweynaha cusub ee Soomaaliya, Xasan Sheekh Maxamuud oo wareeggii ugu dambeeyay ee doorashada ku helay 190-cod, halka uu helay madaxweynihii hore oo ay tartamayeen 79-cod.

"Waxaan soo dhaweynaynaa madaxweynaha cusub ee Soomaaliya, waxaana ka rajeynaynaa inuu noqdo mid dalka iyo dadka anfaca," ayay ahaayeen hadallo ay dadka isku soo baxay ku sheegayeen codad dhaadheer.

Mas'uuliyiinta dowladda ee gobolka Shabeellada dhexe oo dadweynaha qaarkood la hadlay ayaa sheegay in madaxweynaha cusub uu wax badan ka qaban doono xaalka uu dalku ku sugan yahay.

Degmada Balcad ayaa waxay ka mid tahay degmooyinkii ay ciidamada dowladda iyo kuwa AMISOM oo iskaashanaya ay Al-shabaab ka qabsadeen bartamihii sannadkan, waxayna ka mid noqonaysaa degmooyinka laga dhigay dibadbaxyada taageerada ah.

Sidoo kale, degmada Baydhabo ee xarunta gobolka Bay ayaa waxaa iyadana tan iyo xalay ka dhacayay dibadbaxyo lagu taageerayo madaxweynaha cusub ee Somalia loo doortay, iyagoo dadweynaha degmadaas ku tilmaamay doorashada mid si xaq ah ku dhacday.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/11/2012 5:39 PM EST
Talaado, September , 11, 2012 (HOL)-Madaxweynaha Somaliland Md: Axmed Maxamed Maxamuud Siillaanyo, ayaa u hambalyeeyey madaxweynaha cusub ee Soomaaliya Md: Xasan Sheekh Maxamuud, waxaanu sidoo kale hambalyo klae u diray madaxweynihii tartanka lagaga guulaystay ee Sheekh Shariif Sh. Axmed oo Aqlabay natiijaddii doorashadda ka soo baxday.

9/11/2012 5:38 PM EST
Talaado, September 11, 2012(HOL): Shacabka ku dhaqan xaafadda ay Soomaalidu ku badantahay ee Eastleigh ayaa si diiran usoo dhaweeyay madaxweeynaha cusub ee Jamhuuriyadda Federaalka Soomaaliya Mudane Xasan Sheekh Max'uud.

9/11/2012 5:36 PM EST
Talaado, September , 11, 2012 (HOL)-Dadweynaha Somaliland oo maalmihii u dambeeyey hadal hayey doorashaddii ka dhacaysay magaaladda Muqdisho ayaa mucjiso ku tilmaamay madaxweynaha cusub ee ka soo dhexbaxay musharaxiintii badnaa, iyago intooda badani u saadaalinayey musharaxiin kale inay u dhow yihiin inay tartanka ku guulaystaan.

9/11/2012 9:34 AM EST
Talaado, September, 11, 2012 (HOL)- Jaamacadda Geeska (International Horn University) ( IHU), ayaa waxa ka qalinjabiyey dufcadii 3aad oo kuuliyaddo kala duwan ka baxay, waxaana kuuliyadaha kala duwan ugu muhiimsanaa kuuliyadda quraanka kariimka ah oo markii ugu horaysay 49 arday ka qalinjabiyeen oo ka mid ah 130 ka arday ee jaamacadda ka baxay.

9/11/2012 7:20 AM EST
Talaado, September 11, 2012 (HOL) — Madaxweynihii hore ee Soomaaliya, Shariif Sheekh Axmed ayaa sheegay inuu aqbalay natiijadii doorashada madaxweynenimo ee Soomaaliya, taasoo looga guuleystay, wuxuuna xusay inuu la shaqeyn doono dowladda cusub ee la dhisayo.

9/11/2012 7:06 AM EST
Talaado, September 11, 2012 (HOL) — Dagaal culus oo u dhexeeya ciidamada dowladda KMG, kuwa Raaskaambooni iyo Militariga Kenya oo isgarabsanaya iyo Xarakada Al-shabaab ayaa goordhow ka qarxay deegaan lagu magacaabo harboole oo hoostaga Degmada Afmadow ee gobolka jubada hoose.

9/11/2012 7:03 AM EST
Talaado, September 11, 2012 (HOL) — Laga soo bilaabo subaxnimadii hore ee maalintii shalay ilaa laga soo gaaro fiidnimadii xalay dadka ku dhaqan magaalada Baladweyne ee xarunta gobollka Hiiraan waxaa ay siweyn ugu mashquulsanaayeen la socoshada doorashadii ka dhacday magaalada Muqdisho, iyaga oo si toos ah ugala socday qalabka warbaahinta sida TV-da iyo Idaacadaha oo si toos ah u soo gudbinayay.

9/11/2012 4:07 AM EST
Talaado, September 11, 2012 (HOL) — Qaramada Midoobay, Marekanka iyo Midowga Afrika ayaa si isku mid ah u soo dhaweeyay doorashada madaxweynaha cusub ee Soomaaliya, Xasan Sheekh Maxamuud iyagoo ku tilmaamay doorashadiisa tallaabo horay loo qaaday.