5/17/2022
Today from Hiiraan Online:  _
Wararka Maanta- Isniin, Sept 10, 2012
Xisbiga UDUB oo Qaadacday ka qayb-galka Doorashada golaha Deegaanka, sheegayna inay Maxkamada dacwad u gudbinayaan
Isniin, September 10, 2012 (HOL) — Musharaxa xisbiga madaxweyne ee xisbiga UDUB, ayaa sheegay inay ka qaybgali doonin doorashooyinka golaha deegaanka, isla markaana xusay inuu maxkamadda u gudbin doono dacwad ka dhan ah guddidda Diiwaangelinta ururadda.

"Bulshada Somaliland waxaan u soo bandhigayaa talaabooyinka waxashnimada ah ee lagula kacay xisbiga Udub iyo taageerayaashiisa si looga reebo doorashooyinka,iyada oo si badheedh ah oo loogu tala galay loo baahiyey arimo lidi ku ah guusha uu doonayo  in xisbiga Udub ka soo hooyo doorashooyinka fooda inagu soo haya oo xisbigu filayo inuu si xoog ah ugu guulaysan doono”ayuu yidhi Musharaxa xisbiga UDUB ee madaxweynenimadda Cali Maxamed Warancadde.

"Waxaase ayaan daro ah in maanta xisbiga Udub lagu qaado dagaal waxashnimo ah oo la doonayo in xisbigii dalkan hooyada u ahaa lagu burburiyo,lagagana reebo doorashooyinka soo socda, iyada oo loo sii gogol xaadhayo, kuwo ka liita xisbiga Udub oo aan la garanayn halka ay dalka gaadhsiin doonaan,maadaama nidaamkii xisbiyada badani isku bedelay nidaamka ururada qabyaalada badan”ayuu raaciyey hadalkiisa

Cali Maxamed Warancadde ayaa sheegay in bulshadda somaliland iyo caalamkaba u cadaynayo inuu qaadacay doorashooyinka, magdhowna laga bixiyo wixii soo gaadhay habsami u socodka hawlihii xisbiga ee u diyaargarowga doorashooyinka.

"Waxaanu bulshada Somaliland iyo bulshada caalamka ee ku hawlan arimaha doorashooyinka dalka u sheegaynaa inaanu qaadacnay doorashada, ilaa inta laga helayo guddiyo lagu aamini karo garsoorka axsaabta kuna sifaysan dhexdhexaad, magdhawna laga bixinayo wixiii daano ah ee gaadhay habsami u socodka hawlihii xisbiga ee dhinaca u diyaar garawga doorashooyinka deegaanka,  anaga oo dacwad ka dhan ah guddiga diiwaan gelinta u gudbin doona maxkamada sare ee Somaliland”:ayuu yidhi.

Si kastaba ha ahaatee, xisbiga UDUB ayaa sideed sanadood dalka xukumayey, kuwaas oo si wanaagsan xilka u wareejiyey ka dib markii doorashadii 2010 lagaga adkaaday, haseyeeshee xisbigan ayaa khilaaf xoogani hadheeyey, waxaana khilaafkaasi ka faa’iidaystay ururadda siyaasadda kuwaas oo badi musharaxiintii golaha deegaanka ee magaalooyinka soo buuxiyey, iyagoo inta badan dadkii hami siyaasadeed ku jiray iska soo wada sharaxeen ururadda iyo xisbiyadda kale, taasina ay keentay inay wakhti dambe udub bilowday  wakhtiguna cidhiidhi ku noqday maadama oo afar cisho ka hadhsan tahay mudadii la xidhayey liiska musharaxiinta taasina u muuqato in aanay ka gaadhsiin Karin dhamaystirka liiska musharaxiinta ee laga rabo.

Barkhad-Ladiif  M. Cumar, Hiiraan Online
[email protected]
Hargeysa, Somaliland












Click here
9/10/2012 6:47 PM EST
Kadib markii ay baarlamaanka Soomaaliya si aqlabiyad ah ugu codeeyeen madaxweynaha cusub ee Soomaaliya Xassan Sheekh Maxamuud ayaa magaalada Muqdisho laga maqlay sawaxanka rasaasta.

9/10/2012 2:10 PM EST
Isniin, September 10, 2012(HOL): Waxaa si aqlabiyad leh ugu guuleystay madaxweynenimada Soomaaliya Xasan Shiikh Maxamuud oo wareeggii ugu dambeeyay ee doorashada madaxweynenimada uga adkaaday Madaxweynihii hore Shiikh Shariif Shiikh Axmed.

9/10/2012 7:50 AM EST
Isniin, September 10, 2012 (HOL) — Xildhibaannadii horay loogu diiday inay ka mid noqon doonaan baarlamaanka Soomaaliya oo ay ku jiraan hoggaamiye kooxeedyadii hore ee Soomaaliya ayaa la dhaariyay maanta si ay uga qaybgalaan doorashada madaxweynenimo ee Soomaaliya.

9/10/2012 7:35 AM EST
Isniin, September 10, 2012 (HOL) — Hay'adaha CPD iyo SOYDEN oo ka shaqeeya arrimaha horumarinta dhallinyarada ayaa soo gabgabeeyay tababar muddo sideed bilood socday oo lagu tababarayay dhallinyaro ay saameyn ku yeesheen colaadaha dalka ka jira.

9/10/2012 6:13 AM EST
Isniin, September 10, 2012 (HOL) — Murashaxiin ka mid ahaa kuwii u tartamaya xilka madaxnimo ee Soomaaliya ayaa ku dhawaaqay inay tanaasuleen, iyagoo aan sheegin sababaha ku kallifay inay tanaasul sameeyaan.

9/10/2012 5:30 AM EST
Isniin, September 10, 2012 (HOL) — Markab ay leeyihiin ciidamada NATO ee howlgalka la dagaalanka burcad-badeedda u jooga xeebaha dalka Soomaailya, gaar ahaan kuwa Puntland ayaa soo badbaadiyey koox tahriibeyaal ah oo isugu jira Soomaali iyo Itoobiyaan, kuwaas oo muddo dhowr beri ah badda saarnaa, kadib markii ay ciladi soo food saartay doon yar oo ay ku safrayeen.

9/10/2012 5:26 AM EST
Isniin, September 10, 2012 (HOL) — Iyadoo la filayo in maanta magaalada Muqdisho ay ka dhacdo doorashada madaxtinimo ee Soomaaliya oo ay u taaganyihiin ku dhowaad ilaa 25 musharax ayaa Soomaalida ku dhaqan dalka gudihiisa iyo dibadiisa waxa ay isha ku hayaan warbaahinta Soomaalida ee soo tabinaysa qaabka ay u dhaceyso doorashada.

9/10/2012 4:28 AM EST
Isniin, September 10, 2012(HOL): Waxaa la soo gebagebeeyay wareegga koowaad ee doorashada madaxweynenimada Soomaaliya oo maanta mudanayaasha baarlamaanka Soomaaliya ku kala dooranayeen musharraxiin isu soo taagay xilka madaxweynenimada Soomaaliya.

9/10/2012 3:16 AM EST
Isniin, September 10, 2012 (HOL) — Shacabka Soomaaliyeed ee ku nool gudaha iyo dibadda dalka ayaa rajo wanaagsan ka muujiyay doorashada maanta Muqdisho ka dhacaysa ee lagu soo dooranayo madaxweynaha hoggaamin doona dalka muddo dheer kaddib.

9/10/2012 2:54 AM EST
Isniin, September 10, 2012 (HOL) — Xildhibaannada baarlamaanka Soomaaliya ayaa maanta oo Isniin ah dooran doona madaxweynihii dalka hoggaamin lahaa afarta sano ee soo socota, iyadoo doorahadan ay noqonayso tii ugu horreysay oo dalka ka dhacda muddo afartameeyo sano ka badan.