9/25/2022
Today from Hiiraan Online:  _
Wararka Maanta- Sabti, Nov 24, 2012
URURKA SOLJA: “Xeerka Sirdoonka ee uu Baarlamaanka Somaliland Ansixiyay wuxuu si cad uga horimaanayaa Xorriyatul Qawlka”
Sabti, November 24, 2012 (HOL) — Ururka Suxufiyiinta Somaliland ee SOLJA, ayaa madaxweynaha u diray waraaq furan oo ay kaga codsanayaan inaanu saxeexan xeerka sirdoonka oo ka hor imanaya xoriyadda saxaafadda Somaliland.

Xeerkan oo bishii ina dhaaftay labadda gole Baarlamaan ansixineen ayaa madaxweynaha horyaalla, kaas oo aanu wali madaxweynuhu dhaqangalin, waxaanay saxaafaddu u saartay guddi ka hawlgasha in aanu madaxweynuhu xeerkaasi saxeexin ee dib loogu celiyo Baarlamaanka.

Xoghayaha guud ee ururka Suxufiyiinta Somaliland ee SOLJA Maxamed-Rashiid Muxumed Faarax ayaa soo saaray bayaan uu madaxweynaha kaga codsanayo in aanu xeerkaasi saxeexin ee uu ku celiyo baarlamaanka si wax looga soo bedelo lagana saaro qodobada khuseeya madax banaanidda warbaahinta.

“Xeerka sirdoonka Somaliland waxa uu si cad uga horimanayaa qodobka 30-aad, 25-aad ee dastuurka Jamhuuriyadda oo damaanad qaadaya xorriyatul qawlka iyo cabiraada rayiga xorta iyo weliba xeerka saxaafadda Somaliland ee no. 27/2004. ayaa lagu yidhi

War-saxaafadeedkaasi ka soo baxay ururka SOLJA, waxaanu intaas ku daray: “Xorriyatul qawlku waxa uu ka mid yahay mabaadii’da aasaasiga ah ee dastuurka Somaliland, waxaanu bulshada reer Somaliland ugu fadhiyaa qiimo weyn oo aanu ugu fadhiyin cid kale oo adduunyada korkeeda  joogta. Tusaale ahaan sida ay diiwaangeliyeen hay’adaha xuquuqda  aadamaha ee dunidu in ka badan 100,000 oo qof oo shacab ah ayaa u dhintay xorriyadda Somaliland, isla markaana waxa ku naafoobay boqolaal kun oo kale, halka ay ku burburtay dhammaanba wixii ay dadweynuhu hanti kaydsadeen muddo boqolaal sannadood ah. Dhammaanba waxyaabahani waxay dadweynaha reer Somaliland waydaarsadeen qaranimo ku dhisan xurmaynta muwaadinka iyo xorriyaadka aasaasiga ah ee uu leeyahay oo ay ugu horeysa xoriyatul qawlku.”

“Waxa dhici karta in uu jagada madaxweynaha Somaliland ku fadhiisto hogaamiye aan ogayn dhacdooyinkaasi, amaba aan markhaati ka ahayn, laakiin nasiib wanaag madaxweynaha hadda talada dalka Somaliland haya ee Axmed Maxamed Maxamuud (Siilaanyo) wuxuu markhaati ka yahay dhaawac kasta oo soo gaadhay bulshada Somaliland horeyso iyo dambaysaba, waxaanu ogyahay qiimaha uu xorriyatul qawlku ugu fadhiyo bulshada Somaliland”ayaa lagu yidhi qoraalkaasi, waxaanu lagu sii daray “Marka intaasi oo dhan laga yimaado, xeerka sirdoonka ee ay
baarlamaanka Somaliland ansixiyeen wuxuu si cad uga horimanaya xorriyatul qawlka qiimaha intaa leeg ku jooga Somaliland iyo dadkeeda.

Haddaba iyada oo uu Madaxweyne Siillaanyo ogyahay kaalinta ay warbaahinta madaxa banaani ku leedahay Somaliland,isla markaana uu xasuusan karo kaalintii ay warbaahinta Somaliland ku lahayd xilliyadii adkaa ee la soo maray, waxa aanu rajaynaynaa in aanu madaxweyne Siilaanyo marnaba saxeexi doonin xeer xakamaynaya amaba faaf reeb ku soo rogaya xorriyatul qawlka. Ku darsoo warbaahinta Somaliland waxay guddi ergo ah u dirtay  madaxweynaha Somaliland todobaadkan dhamaaday gudihiisa. Waxaanay gudidaasi la kulmeen wasiirka Madaxtooyadda Xirsi X. Cali. Waxaanu u balan qaaday in aanu xeerkaasi saxeexi doonin madaxweynuhu, isla markaana doorashada ka dib ay madaxweynaha warbaahintu kala kulmi doonto.

Madaxweyne adiga oo ah halgamaa, isla markaana waxyaabihii aad u dagaalantay ay ka mid ahaayeen xorriyatul qawlku, markhaatina ka tahay wixii dhib loo soo maray, waxaanu rajaynaynaa in aad xeerkaasi dib ugu celin doonto golayaasha sharci dejinta, isla markaana laga saaro qodobada xakamaynaya xorriyatul qawlka.

Baarlamaanka Somaliland-na waxa looga fadhiyaa inay xeerar u sameeyaan hay’adaha dawladda Somaliland oo in yar oo Cigaal xeerarkooda qoray mooyaane aan lahaynba xeer maamul.

Waxaanu qoraalkayaga ku soo gebagabaynaynaa madaxweyne hawlo ka badan baa yaala xakamaynta xorriyatul qawlkee, ha saxeexin ee dib ugu celi golayaasha. Bayaankani waxa uu ka turjumayaa arragtida ay xeerkan ka qaadatay Warbaahinta Somaliland.”

Barkhad-Ladiif  M. Cumar, Hiiraan Online
[email protected]
Hargeysa, Somaliland












Click here
11/24/2012 10:43 AM EST
Sabti, November 24, 2012 (HOL) —Dagaallo culus oo u dhexeeya ciidamada dowladda Soomaaliya oo garabsanaya kuwa Ahlusunna iyo xoogagga Al-shabaab ayaa ka dhacay degmada Beledxaawo ee gobolka Gedo.

11/24/2012 8:45 AM EST
Sabti, November 24, 2012 (HOL) —Xildhibaanka laga soo doorto Degmada Kamakunji ee magaalada Nairobi Xildhibaan Yuusuf Xasan Cabdi ayaa ballan qaaday in uu laba jibaari doono waxqabadkiisa hadii marlabaad ay soo doortaan shacabka ku dhaqan degmada Kamakunji.

11/24/2012 7:47 AM EST
Sabti, November 24, 2012 (HOL) — Afhayeenka ciidamada AMISOM, Col. Cali Aadan Xumud oo maanta shir jaraa'id ku qabtay Muqdisho ayaa sheegay in AMISOM ay si dhow ula shaqeynayso Dowladda cusub ee Soomaaliya, isagoo sidoo kale sheegay inay soo dhaweynayaan golaha wasiirrada ee dhawaan la ansixiyay.

11/24/2012 7:27 AM EST
Sabti, November 24, 2012 (HOL) — Wasiirka arrimaha gudaha iyo amniga Qaranka ee dowladda Soomaaliya, C/kariin Xuseen Guuleed ayaa markii ugu horreysay kula kulmay Muqdisho taliyeyaasha ciidmada booliiska, isagoo ku bogaadiyay howsha ay hayaan, kana dalbaday inay xoojiyaan howlaha lagu sugayo ammaanka Muqdisho.

11/24/2012 6:10 AM EST
Sabti, November 24, 2012 (HOL) — Xoogag taabacsan Al-shabaab ayaa duhurnimadii maanta weerar khasaare geystay ku qaaday mas'uuliyiin ka tirsan dowladda Soomaaliya oo gobolka Shabeellada hoose u joogay howlo dhedhexaadin ah, iyadoo la sheegay in mid ka mid ah gaadiidkii ay mas'uuliyiinta dowladdu wateen uu ku gubtay dagaalka.

11/24/2012 3:49 AM EST
Sabti, November 24, 2012 (HOL) — Dood-cilmiyeed ku saabsan sida loo wacyi-gelin karo dhallinyarada dagaallada ka qaybgala ayaa maanta lagu qabtay Muqdisho, waxaana kulankan oo ay soo qabanqaabisay hay'adda CCD ka qaybgalay odayaal dhaqameedyo Soomaaliyeed.

11/24/2012 3:32 AM EST
Sabti, November 24, 2012 (HOL) — Xukuumadda Kenya ayaa amar ku bixisay in baaritaan lagu sameeyo khasaarihii nafeed iyo middii maaliyadeed ee ka dhashay rabshadihii toddobaadkii hore ka dhacay magaalada Gaarisa ee gobolka Waqooyi-bari ee Kenya.

11/24/2012 3:07 AM EST
Sabti, November 24, 2012 (HOL) — Danjire Augustine Mahiga ayaa sheegay in dhamaashaha isla-xisaabtan la'aanta Soomaaliya ay fursad weyn u tahay xuquuqul insaanka, isagoo si adag u cambaareeyay dilalka loo geysto wariyeyaasha.

11/24/2012 2:19 AM EST
Sabti, November 24, 2012 (HOL) — Wasiirka gaashaandhigga Dowladda Soomaaliya Cabdixakiin Maxamuud Xaaji Fiqi ayaa Jimcihii shalay kulan la yeeshay saraakiisha ciidamada Afrika ee ku sugan Soomaaliya, isagoo kala hadlay sidii loo sii wadi lahaa howgallada dalka looga saarayo Xarakada Al-shabaab oo weli ka talisa dhul ballaaran.