10/1/2022
Today from Hiiraan Online:  _
Wararka Maanta- Sabti, Nov 24, 2012
Wasiirka Gaashaandhigga Somalia oo Mas'uuliyiinta AMISOM kala Hadlay sidii dib loogu dhisi lahaa Ciidamada Xoogga dalka
Sabti, November 24, 2012 (HOL) — Wasiirka gaashaandhigga Dowladda Soomaaliya Cabdixakiin Maxamuud Xaaji Fiqi ayaa Jimcihii shalay kulan la yeeshay saraakiisha ciidamada Afrika ee ku sugan Soomaaliya, isagoo kala hadlay sidii loo sii wadi lahaa howgallada dalka looga saarayo Xarakada Al-shabaab oo weli ka talisa dhul ballaaran.

Mudane Fiqi ayaa si gaar ah ula kulmay taliyaha guud ee AMISOM, Jen. Andrue Guthi iyo ku xigeenkiisa, Simon Kranja, isagoo ka dalbaday inay gacan ka geystaan dib u dhiska ciidamada xoogga dalka Soomaaliya iyo qalabeyntooda, si ay ula wareegaan gacan ku haynta ammaanka dalka oo dhan.

“Kulanku wuxuu ahaa mid muhiim u ah sii socoshada dagaalka lagula jiro Al-shabaab oo caqabad ku ah ammaanka Soomaaliya., Waxaana naga go’an in si dhaqso ah aan dalka oo dhan uga saarno, insha Allah dhawaan shacabku waxay arki doonaan wax ay ku farxaan," ayuu wasiirka gaashaandhigga Soomaaliya ku sheegay warsaxaafadeed kasoo baxay xafiiskiisa Muqdisho.

Ciidamada AMISOM ayaa waxay qayb ka yihiin howgallada lagula dagaalamayo Al-shabaab, iyadoo sannadkan billowgiisa ay ciidamadan iyo kuwa dowladdu markii ugu horreysay ay ka qabsadeen Al-shabaab deegaan ka baxsan Muqdisho taasoo ahayd degmada Afgooye ee gobolka Shabeellada Hoose.

“Waxaan sidoo kale kulan uga hadlanay sidii dib loogu dhiso lahaa ciidamada xoogga dalka iyo qalabeyntooda, taasoo ah arrin aan muhiimadda koowaad siinayno xilligan. Sidoo kale waxaan ka hadalnay sidii dhallinyarada Al-shabaab ay qaldeen loogu abuuri lahaa fursad ay dib ugu dhismaan mustaqbalkooda,” ayuu wasiirku ku yiri warsaxaafadeedka uu soo saaray.

Taliyeyaasha ciidamada AMISOM ee kulanka la qaatay wasiirka gaashaandhigga Soomaaliya ayaan iyagu ka hadlin kulankaan iyo qodobbadii looga hadlay, iyadoo ay horay taliyeyaasha AMISOM u sheegeen inay si dhow ula shaqeyn doonaan golaha wasiirrada xukuumadda cusub ee Soomaaliya.

Ugu dambeyn, wasiirka Gaashaandhigga wuxuu shacabka Soomaaliyeed ka dalbaday inay qaybtooda ka qaataan dib u dhiska iyo taageerrada ciidamada xoogga dalka oo uu sheegay inay yihiin kuwo sabab u noqon kara in dalka uu cagihiisa ku istaago.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
11/24/2012 10:43 AM EST
Sabti, November 24, 2012 (HOL) —Dagaallo culus oo u dhexeeya ciidamada dowladda Soomaaliya oo garabsanaya kuwa Ahlusunna iyo xoogagga Al-shabaab ayaa ka dhacay degmada Beledxaawo ee gobolka Gedo.

11/24/2012 8:45 AM EST
Sabti, November 24, 2012 (HOL) —Xildhibaanka laga soo doorto Degmada Kamakunji ee magaalada Nairobi Xildhibaan Yuusuf Xasan Cabdi ayaa ballan qaaday in uu laba jibaari doono waxqabadkiisa hadii marlabaad ay soo doortaan shacabka ku dhaqan degmada Kamakunji.

11/24/2012 7:47 AM EST
Sabti, November 24, 2012 (HOL) — Afhayeenka ciidamada AMISOM, Col. Cali Aadan Xumud oo maanta shir jaraa'id ku qabtay Muqdisho ayaa sheegay in AMISOM ay si dhow ula shaqeynayso Dowladda cusub ee Soomaaliya, isagoo sidoo kale sheegay inay soo dhaweynayaan golaha wasiirrada ee dhawaan la ansixiyay.

11/24/2012 7:44 AM EST
Sabti, November 24, 2012 (HOL) — Ururka Suxufiyiinta Somaliland ee SOLJA, ayaa madaxweynaha u diray waraaq furan oo ay kaga codsanayaan inaanu saxeexan xeerka sirdoonka oo ka hor imanaya xoriyadda saxaafadda Somaliland.

11/24/2012 7:27 AM EST
Sabti, November 24, 2012 (HOL) — Wasiirka arrimaha gudaha iyo amniga Qaranka ee dowladda Soomaaliya, C/kariin Xuseen Guuleed ayaa markii ugu horreysay kula kulmay Muqdisho taliyeyaasha ciidmada booliiska, isagoo ku bogaadiyay howsha ay hayaan, kana dalbaday inay xoojiyaan howlaha lagu sugayo ammaanka Muqdisho.

11/24/2012 6:10 AM EST
Sabti, November 24, 2012 (HOL) — Xoogag taabacsan Al-shabaab ayaa duhurnimadii maanta weerar khasaare geystay ku qaaday mas'uuliyiin ka tirsan dowladda Soomaaliya oo gobolka Shabeellada hoose u joogay howlo dhedhexaadin ah, iyadoo la sheegay in mid ka mid ah gaadiidkii ay mas'uuliyiinta dowladdu wateen uu ku gubtay dagaalka.

11/24/2012 3:49 AM EST
Sabti, November 24, 2012 (HOL) — Dood-cilmiyeed ku saabsan sida loo wacyi-gelin karo dhallinyarada dagaallada ka qaybgala ayaa maanta lagu qabtay Muqdisho, waxaana kulankan oo ay soo qabanqaabisay hay'adda CCD ka qaybgalay odayaal dhaqameedyo Soomaaliyeed.

11/24/2012 3:32 AM EST
Sabti, November 24, 2012 (HOL) — Xukuumadda Kenya ayaa amar ku bixisay in baaritaan lagu sameeyo khasaarihii nafeed iyo middii maaliyadeed ee ka dhashay rabshadihii toddobaadkii hore ka dhacay magaalada Gaarisa ee gobolka Waqooyi-bari ee Kenya.

11/24/2012 3:07 AM EST
Sabti, November 24, 2012 (HOL) — Danjire Augustine Mahiga ayaa sheegay in dhamaashaha isla-xisaabtan la'aanta Soomaaliya ay fursad weyn u tahay xuquuqul insaanka, isagoo si adag u cambaareeyay dilalka loo geysto wariyeyaasha.