10/26/2021
Today from Hiiraan Online:  _
Wararka Maanta- Talaado, Jun 19, 2012
Dagaal khasaare dhaliyay oo Ciidamada DKMG iyo Al-shabaab ku dhexmaray deegaan hoostaga Degmada Garbahaareey

Talaado, June 19, 2012 (HOL) — Wararka aynu ka heleyno gobolka Gedo ayaa sheegaya in shalay gelinkii danbe dagaal aad u culus oo la isku adeegsaday hubka noocyadiisa kala duwan uu ka qarxay deegaanka Tuulo Barwaaqo oo hoostaga degmada Garbahaareey ee gobolka Gedo.

Dagaalka ayaa yimid kadib markii Ciidamada dowladda KMG ay weerar ku qaadeen saldhig ay xoogagga Al-shabaab ku lahaayeen deegaanka Tuulo Barwaaqo, waxaana labada dhinac halkaasi ku dhexmaray dagaal aad u culus.

Warar iskhilaafsan ayaa kasoo baxaya khasaaraha ka dhashay dagaalkaasi, iyadoona warar ka madax banaan dhinacyadii dagaalamay ay sheegayaan in ilaa sedex qof oo dhinacyadii dagaalamay ah ay ku dhinteen dagaalkii shalay, halka dhaawacuna intaa ka badanyahay.

Galad Maxamed Daahir oo kamid ah saraakiisha dowladda ee gobolka Gedo oo warbaahinta la hadlay ayaa sheegay in weerarka ay iyagu qaadeen, wuxuuna xusay in howlgalkii shalay uu u dhacay sidii loogu talo galay, islamarkaasina ay ku dileen laba kamid ah dagaalyahannada Al-shabaab, wuxuuna sheegay in dhankooda uusan jirin khasaare kasoo gaaray dagaalkaasi.

Saraakiil u hadashay Al-shabaab ayaa iyaguna dhankooda guulo ka sheegtay dagaalkii shalay, waxayna wararku sheegayaan in dhinacyadii dagaalamay ay isku horfadhiyaan duleedka deegaanka Tuulo Barwaaqo oo hoostaga degmada Garbahaareey ee gobolka Gedo.

Ciidamada dowladda KMG ayaa mudooyinkan danbe ka bilaabay gobolka Gedo weerarro qorsheysan oo ay la beegsanayaan saldhigyada xoogagga Al-shabaab ay ku leeyihiin gobolkaasi.

Xasan Nuur, Hiiraan Online
[email protected]
Kismaayo, Soomaaliya













Click here
6/19/2012 8:33 AM EST
Talaado, June 19, 2012 (HOL) — Wasaaradda gaashaandhigga ee dalka Yemen ayaa sheegtay in ruuxii fuliyay qarax ismiidaamin ah oo lagu dilay taliyaha ciidamada Yemen ee Koonfurta Yemen uu ahaa Soomaali waxyaabaha qarxay isku soo xiray.

6/19/2012 8:16 AM EST
Talaado, June 19, 2012 (HOL) — Madaxda Soomaalida ayaa waxay ku qulqulayaan magaalada Nairobi ee dalka Kenya, halkaasoo lagu wado inuu maalinta Berri ah uga furmo shir ay uga hadlayaan waxyaabihii ka qabsoomay Roadmap-ka iyo sidoo kale heshiiskii ay bishii hore ku gaareen magaalada Addis Ababa ee dalka Itoobiya.

6/19/2012 7:58 AM EST
Talaado, June 19, 2012 (HOL) — Kaddib howlgal ay si wadajira ah uga sameeyeen saacadihii ugu dambeeyay qaybo ka mid ah xaafadaha magaalada Beledweyne ee gobolka Hiiraan ciidamada maamulka iyo kuwa gacanta siinaya ee Itoobiya ayay sheegeen inay kusoo qabqabteen walxaha qarxa iyo rag la tuhunsan yahay inay ka tirsan yihiin Al-shabaab.

6/19/2012 7:37 AM EST
Talaado, June 19, 2012 (HOL) — Ugu yaraan hal qof ayaa ku dhintay iska-horimaad ciidammo kawada tirsan dowladda KMG ah ku dhexmaray maanta degmada Hodan ee gobolka Banaadir, iyadoo sidoo kale maydka qof rayid ah laga helay xaafadda Wajeer ee degmada Kaaraan.

6/19/2012 7:14 AM EST
Talaado, June 19, 2012 (HOL) — Maxkamadda ciidamada DKMG Soomaaliya ayaa ku xukuntay dil toogasho ah askari ka tirsan ciidamada dowladda KMG ah, kaddib markii maxkamadeyntiisu ay ka dhacday degmada Afgooye ee gobolka Shabeellada hoose.

6/19/2012 4:51 AM EST
Talaado, June 19, 2012 (HOL) — Ciidamadda gaarka u Tobabaran ee la Dagaalanka Argagixisadda (RRU) ayaa habeen hore Galalafay Guri ku yaalla xaafadda Jig-jiga yar ee degmadda IbraahimKoodbuur, kuwaas oo Dadkii ku noollaa dhamaan dibadda uga soo saaray, isla markaana qol qol u baadhay.

6/19/2012 4:44 AM EST
Talaado, June 19, 2012 (HOL) — Golaha wasiirrada DKMG ah ee Soomaaliya oo ku yeeshay Muqdisho gallinkii dambe ee shalay kulan aan caadi ahayn ayaa waxay kasoo saareen qodobbo ay ka mid yihiin in maamullo loo sameeyay goobihii laga qabsaday Xarakada Al-shabaab.

6/19/2012 4:26 AM EST
Talaado, June 19, 2012 (HOL) — Madaxweynaha dalka Kenya, Mwai Kibaki ayaa u magacaabay wasiirka gaashaandhigga Kenya, Maxamed Yuusuf Xaaji inuu noqdo sii hayaha xilka wasaaradda ammaanka gudaha iyo xiriirka gobollada ee Kenya, kaddib markii wasiirkii hore ee wasaaraddan uu ku dhintay shil diyaaradeed.

6/19/2012 4:07 AM EST
Talaado, June 19, 2012 (HOL) — Wasiirka arrimaha gudaha iyo ammaanka Qaranka DKMG ah ee Soomaaliya, Cabdisamad Macallin Maxamuud oo ah madaxa guddiga ay u saartay dowladda Soomaaliya wadahadallada Somaliland lala yeelanayo ayaa rajo wanaagsan ka muujiyay waxyaabaha laga filayo inay shirkaas kasoo baxaan.

6/19/2012 3:59 AM EST
Talaado, June 19, 2012 (HOL) — Munaasibad lagu xusayey afartan guuradii ka soo wareegtay markii la qoray farta Soomaaliga ayaa xalay lagu qabtay magaalada Minneapolis ee gobolka Minnesota, taasi oo ay ka soo qeybgaleen dad weyne aad u fara badan oo ka kala yimid qeybaha Gobolka, iyadoo sidoo kalana ay goob-joog ka ahaayeen abwaano, hal-abuuro iyo qoraayaal caan ah oo Soomaaliyeed.