10/19/2021
Today from Hiiraan Online:  _
Wararka Maanta- Sabti, Jun 16, 2012
Ganacsato Soomaali ah oo bilihii ugu dambeeyay dalka Koonfur Afrika loogu geystay falal isugu jira dil, dhac iyo boob-hantiyeed

Sabti, June 16, 2012 (HOL) — Labadii bilood ee lasoo dhaafay dalka Koonfur Afrika waxaa lagu dilay in ka badan 10-ganacsato Soomaaliyeed ah tiro intaasi ka badana waa lagu dhaawacay, waxaa kaloo loo geystay boob-hanitiyeed oo aad u ballaaran.

Dilalka oo ahaa kuwo fool xun ayaa waxay ka kala dhaceen magaalooyin kala duwan waxayna dilalka ugu badani ka dhaceen gobolka Western-Cape gaar ahaan tuulooyin iyo xaafadaha ku dhow magaalada Cape-town, dilalkan ayaa ahaa kuwo saf-mar ah oo ay geysteen kooxo burcad ah oo u dhashay Koofur Afrika kuna hubeysnaa bastoolado.

Goob-joogayaal ayaa u sheegay HOL inay indhahooda ku arkeen dilal ay ka naxeen oo lagula kacay ganacsato Soomaaliyeed oo intooda badan lagu weeraray goobihii ay ku ganacsanayeen laguna furay rasaas markii ay dhinteenna laga tagay iyadoo aan wax laga qaadan, waxaa kaloo ay sheegeen inay arkeen ganacasto Soomaali ah oo iyagana inta la dilay laga dhacay hantidii u taallay dukaammada iyo gaadiidkii ay wateen.

Lama oga sababta keentay inay burcaddu si lama filaan ah u soo xoogeystaan xilligan oo lagu jiro qaboobe ah oo aan looga baran burcaddu inay geystaan falal noocan oo kale ah.

Dilkii ugu naxdinta badnaa ayaa wuxuu ahaa mid dhacay toddobaadkii lasoo dhaafay markaasoo la dilay wiil dhallinyaro ah oo intii aan la dilin ka hor laga jaray faraha gacmihiisa iyo sanka, kaddibna lagu dhex-toogtay gaarigii uu watay iyadoo la dhigtay maydka wiilkan iyo gaarigiisii meel kayn ah, waxayna tani argagax weyn gelisay Soomaalida ku nool Koonfur Afrika, oo qaarkood sheegay in tobban xabbo lagu dhuftay.

Galabnimadii Jimcaha ayaa xaafada Phillippi oo ku dhow magaalada Cape-town waxaa lagu dilay ruux Soomaaliyeed oo lagu magacaabi jiray C/llaahi Jiin, waxaana lagu dhex toogtay gaarigiisii kaasoo yaallay bannaanka goobtiisa ganacsi ee uu xaafaddan ku lahaa

Illaa hadda ma jiraan dad loosoo xiray dilalka iyo boobka is-daba-joogga ah ee loo geystay Soomaalida ganacsiga ku haysata dalka Koonfur Afrika, laakiinse ciidamada booliskuna waxay sheegeen inay baaritaano wadaan, weyna adag tahay in la helo fursado lagu ogaado cidda dhabta ah ee ka dambeysay dilalkan iyo dhaca is daba jooga ah ee Soomaalida loo geysanayo, maxaa yeelay goobaha ay dambiyadani ka dhacaan ayaa ah xaafado isku raran ah oo ay adag tahay in ciidamada booliisku ay gaaraan isla markaan ay soo qabtaan kuwii dambiyada galay.

Ganacsatada Soomaaliyeed ayaa waxay intooda badan ku ganacsadaan goobaha ka fog magaalooyinka oo ay dhaqaale badan ka helaan, taas ayaana keentay in si fudud loogu dilo.

Faarax Daahir, Hiiraan Online
[email protected]
Cape-town, Koonfur Afrika













Click here
6/16/2012 2:16 PM EST
Sabti, June 16, 2012(HOL): Xiriirka Soomaaliyeed ee kubada cagta ayaa shaaca ka qaaday in uu magaalada Muqdisho soo gaaray Cowskii Artifishaalka ee lagu gogli lahaa garoonka Stadium Banaadir, iyadoo shirkadda qandaraaska hoose ee dhsimaha la siiyay ee {East African Modern Engineering company EMECO} ay soo dhameystirtay diyargarowgii hore ee dhulka cowska la dhigi doono.

6/16/2012 9:51 AM EST
Saraakiil isugu jirta Uganda, Burundi iyo Jabuuti qeybna ka ah howlgalka AMISOM ee dalka Soomaaliya ayaa maanta markii ugu horeysay gaartay islamarkaana si wada jir ah u booqday magaalada Beledweyne.

6/16/2012 9:34 AM EST
Sabti, June 16, 2012 (HOL) — Kulan ay laba maalmood uga socday Muqdisho 10-murashax oo u taagan xilka madaxnimo ee Soomaaliya ayay kasoo saareen dhowr qodob oo ku saabsan doorashooyinka, iyagoo beesha caalamka ugu baaqay inaysan madaxda dowladda KMG ah u isticmaalin doorashada gargaarka ay beesha caalamka ka helaan.

6/16/2012 8:59 AM EST
Sabti, June 16, 2012 (HOL) — Hay'adda caafimaadka adduunka ee WHO ayaa dib u furtay xaruntii caafimaadka degmada Xudur ee gobolka Bay, kaddib markii laga saaray xoogaggii Al-shabaab ee ka talinayay muddo afarta sano ku dhow.

6/16/2012 8:45 AM EST
Sabti, June 16, 2012 (HOL) — Wasiirka Waxbarashadda iyo Tacliinta sare Marwo: Samsam Cabdi Aadan, ayaa sheegtay wakhtiga rasmiga ah ee imtixaanka shahaadiga ah Dugsiyadda dhexe iyo kuwa Sareba ka bilaabmi doono Somaliland, iyadoo sheegan in bishan June sodankeedda uu imtixaanku u bilaabmi doono, waxaanay ardayda ugu bushaaraysay in niyad sami ku galaan imtixaankaasi.

6/16/2012 8:20 AM EST
Sabti, June 16, 2012 (HOL) — Guddiga qoraalka dastuurka Soomaaliya ayaa maanta sheegay inuu dib u dhac ku yimid qorshe ay ku doonayeen inay dastuurka kusoo bandhigaan, iyagoo sheegay in toddobaadka soo socda ya soo bandhigi doonaan.

6/16/2012 8:01 AM EST
Sabti, June 16, 2012 (HOL) — Wasiirka Gaashaandhiga Somaliland Mr: Axmed X. Cali Cadami ayaa sheegay in hawlgal uu ciidanka Milatariga Somaliland ka sameeyey Deegaanka Tukaraq ee gobolka Sool oo ciidamo Maamulka khaamuto State hore u fadhiyeen ay kala wareegeen.

6/16/2012 8:01 AM EST
Sabti, June 16, 2012 (HOL) — Telefishinka dalka Sucuudiga ayaa maanta oo Sabti ah baahiyay in dhaxal-sugihii boqortooyada Saudi Arabia, Na'if Bin Cabdul-casiis Aala-Sucuud uu ku dhintay magaalada Geneve ee dalka Swizerland.

6/16/2012 7:28 AM EST
Sabti, June 16, 2012 (HOL) — Inta la ogyahay lix qof oo u badan dhinacyadii uu u dhexeeyay dagaal maanta ka dhacay degmada Qansax-dheere ayaa ku dhintay tiro intaas ka badanna way ku dhaawacmeen.

6/16/2012 6:46 AM EST
Sabti, June 16, 2012 (HOL) — Qarax ismiidaamin ah oo loo adeegsaday gaar waxyaabaha qaraxa laga buuxiyay ayaa goor dhaweyd ka dhacay degmada Afgooyer ee gobolka Shabeellad hoose, waxaana mas'uuliyadda weerarkan sheegatay Al-shabaab.

6/16/2012 6:02 AM EST
Sabti, June 16, 2012 (HOL) — Doon siday shixnado ganacsi oo u rarnayd ganacsato Soomaali ah ayaa ku dagtay meel u dhow dekedda Magaalada Kismaayo, kadib markii ay ku dhacday Jamal ku yaalla Badda Dhexdeeda.

6/16/2012 3:17 AM EST
Sabti, June 16, 2012 (HOL) — Ururka Ahlusunna Waljamaaca ayaa sheegay inay bedeleen qaabkii ay kula dagaalami jireen Al-shabaab, taasna ay keentay inay isaga soo baxaan deegaanno ka tirsan gobolkaas oo ay ka mid tahay degmada Ceelbuur.

6/16/2012 3:13 AM EST
Sabti, June 16, 2012 (HOL) — Ugu yaraan 12-qof oo dhinacyadii dagaalamay ka tirsan ayaa ku dhintay dagaallo culus oo shalay illaa xalay ka socda deegaanno ka tirsan gobolka Gedo ee Koonfurta Soomaaliya.