11/28/2021
Today from Hiiraan Online:  _
Wararka Maanta- Isniin, July 30, 2012
Qiimaha Maciishada Somaliland oo sare u kacay bisha Ramadaan iyo Sarifka Doolarka oo hoos u dhac uu ku yimid
Isniin, July 30, 2012 (HOL) — Qiimaha badeecadaha quutul-daruuriga ah ayaa sare u kac uu ku yimid bishan barakaysan ee Ramadaan, halka qiimihii sarifka doollarkuna hoos uga dhacay suuqyada sarifka Somaliland.

Jamaal Xuseen Ismaaciil oo ka mid ah ganacsatadda Somaliland oo isbedelka ku dhacay qiimaha meceeshadda HOL uga waramay ayaa sheegay in guud ahaan bisha Ramadaan ay korodho qiimaha meceeshaddu, waxaanu sheegay in qaybna sare u kaceen, halka qarkoodna aanay wax is bedel ahi ku dhicin.

Sidoo kale, waxa magaaladda Hargeysa aad looga waayey timirta oo ah raashinka aadka loo isticmaalo bishan Barakaysan ee Ramadaan, waxaana la sheegayaa inuu ku yimid kala go’, iyadoo arirntaasna lagu sababeeyey baahidda Timirta oo badatay iyo ganacsatadii keeni jiray oo midba mid kale ku haleeyey keenista Timirta, taasina ay keentay inay kala go’do, maadaama oo bishii hore ee Ramadaan ay ku khasaareen ka dib markii Timir badan la keenay, isla markaana ay keentay in qoloba qolada kale  is tidhaa way keeni timirta ayuu ku sababeeyey ganacsade aanu wax ka waydiinay yaraanshaha Timirta ee sanadkan, waxaanu sheegay in barigii hore labaatan Koontineer la keeni jiray, balse sanadkan la keenay toban koontiinar, taasina ay keentay Timir yaraanta jirta.

Si kastaba ha ahaatee, Raashinka kordhay iyo Ramadaanta ka hor inta ay ahaan jireen  ayaa faraq weyne u dhexeeyaa, waxaana Gadbadda Bariiska ee 50Kg ramadaanta ka hor lagu iibin jiray 26 doollar, waxayna imika lagu iibinaya $27.5 dollar, Sonkorta 50kg waxa hore u joogtay 27 dollar, imikana 28.5 dollar, Daqiiqdu wax weyn isma bedelin hore waxa lagu iibin jiray 25 dollar imikana 25.5 dollar,  Jirikaanka (Caagadda) Saliidda ah ee 10 Litir waxa hore loogu iibin jiray 26 dollar, imikana 27 dollar.

Sidoo kale, waxyaalaha kor u kacay waxa ka mid ah Khudaarta oo bishan Ramadaan aad loo isticmaalo waxaana ka mid ah khudaarta Qaali garowday Basasha 12 Kg oo loo yaqaan (Faraasilad) waxa hore lagu iibin jiray 6 dollar, halka ay imika ka noqotay 12 dollar,  Baradhadda  12 Kg waxa hore loogu iibin jiray 25,000 SHSL (shan iyo labaatan kun oo Shiling Somaliland ah), imika waxa lagu iibiyaa 40,000 SHSL (Afartan kun oo Somaliland shilling ah).

Sidoo kale, Tanaga Timirta waxa hore loo kala siisan jiray 12 dollar, imika waxa lagu iibinayey 18 doollar, Meceeshadda aan is bedelin waxaa ka mid ah Caanaha oo wax isbedel ahi ku dhicin waxaana laguna iibinayey 14 dollar, sharaabka budada oo ah mid aad loo isticmaalo waxa isna uu marayaa 7.5 doollor, halka sharaabka kale ee Ilotaango loo yaqaana lagu iibinayo 5 dollar, Kartoonka Baastaddu waxba isma bedelin oo waxa markii hore iyo imikaba la kala siistaa 10 dollar, kalluunka ayaa isna wax qiimo korodh ahi ku dhicin waxaana kartoonkiisa lagu iibinayey 12 dollar.

Sidoo kale, waxa iyana hoos u dhac ku yimid sarifkii lacagta Doollar ah oo qoysas badan oo dibadda laga soo biiliyo ay wax badan ka go’ayaan marka  shilin Somaliland loogu bedelo, waxaana barigii hore boqolka dollar lagu sarifi jiray  670,000 SHSL, waxa imika lagu sarifaa 640,000 SHSL (Somaliland Shilling), taas oo dhibaato ku ah qoysas badan ka dib markii lacagtii dollarka ee  masruufka u qaadan jireen hoos u dhac ku yimid, halka raashinkiina sare u kaceen.

Sidoo kale, waxa iyana sanadkan aad u soo go’ay Xabxabkii oo bishan Ramadaan dadweynaha sooman aad u jecel yihiin,kuwaas oo aad loo iibsado, isla markaana meel kasta laga helayo, haseyeeshee qiimo go’an oo la kala siistaa ma jirto nin waliba waxa uu doono ayuu siinayaa, waxaanu iskugu jira nooc yayar yar, qaar dhexe iyo kuwa waaweyn, waxaana ka u weyn lagu iibinayey 20,000 SHSL, halka ka u yarna lagu iibinayey 8,000 SHSL.

Si kastaba ha ahaatee, danyarta magaaladda Hargeysa ayaa goyn kari waayey Timirtii bishi Ramadaan, maadaama oo uu aad u qaali garowday, meelo badan aan lagu iibin, waxaana la sheegayaa inay intii taalayna hore loo boobay, taasina waxay keentay in sanadkan danyartii Timir la’aani ku dhacday.

Barkhad-Ladiif M. Cumar, Hiiraan Online  
[email protected]
Hargeysa, Somaliland












Click here
7/30/2012 9:25 AM EST
Isniin, July 30, 2012 (HOL) — Madaxweynaha maamulka Galmudug, Col. Maxamed Axmed Caalin oo ku sugan magaalada Nairobi oo dhawaan wadnaha looga qalay ayaa sheegay inuu soo dhaweynayo shirka ansixinta dastuurka ee Muqdisho ka socda, isagoo ka digay doorashooyin madaxweyne oo ka dhaca Galmudug.

7/30/2012 8:55 AM EST
Isniin, July 30, 2012 (HOL) — Ergooyinka beesha shanaad ayaa waxay maanta ka dhigeen xarunta uu shirku ka socdo dibadbax cabasho ah, kaasoo ay ku sheegeen inay kaga soo horjeedaan nidaamka 4.5-ka ee lagu qaybsado awoodda dalka.

7/30/2012 6:59 AM EST
Isniin, July 30, 2012 (HOL) — Madaxweynaha Soomaaliya, Shariif Sheekh Axmed iyo wafdi uu horkacayo ayaa maanta gaaray degmada Afgooye ee gobolka Shabeellada hoose, halkaasoo ay maalmihii ugu dambeeyay ka geysanayeen ciidamada DKMG ah falal ammaan-darro, iyagoo la kulmay waxgaradka degmadaas

7/30/2012 3:39 AM EST
Isniin, July 30, 2012 (HOL) — Daaladda jaamacadaha Soomaaliya ee Somali-Ren ayaa deeq ka kooba kambiyuutarrro iyo birinto casri ah oo ay ugu deeqday dowladda Turkiga ku wareejisay jaamacadda Simad oo ka mid ah jaamadaha ka howlgala magaalada Muqdisho ee xarunta Soomaaliya.

7/30/2012 3:23 AM EST
Isniin, July 30, 2012 (HOL) — Ra'iisul wasaaraha dowladda KMG ah ee Soomaaliya, C/weli Maxamed Cali oo kormeer ku tahay Axaddii shalay xarunta uu ka socdo shirka ansixinta dastuurka ayaa sheegay inuu rajo weyn ka qabo in muddadii horay loogu qabtay lagu ansixiyo dastuurka qaybyada ah.

7/30/2012 3:17 AM EST
Isniin, July 30, 2012 (HOL) — Wararka laga helayo degmada Baydhabo ee xarunta gobolka Bay ayaa waxay sheegayaan in halkaas ay tan iyo xalay ka jireen dhaqaaq ciidan oo ay sameynayeen ciidamada DKMG ah iyo kuwa caawinaya ee Itoobiya.