12/6/2021
Today from Hiiraan Online:  _
Wararka Maanta- Isniin, July 30, 2012
Ciidamada DKMG ah iyo kuwa Itoobiya oo illaa xalay dhaqdhaqaaqyo ciidan ka waday Degmada Baydhabo ee Gobolka Bay
Isniin, July 30, 2012 (HOL) — Wararka laga helayo degmada Baydhabo ee xarunta gobolka Bay ayaa waxay sheegayaan in halkaas ay tan iyo xalay ka jireen dhaqaaq ciidan oo ay sameynayeen ciidamada DKMG ah iyo kuwa caawinaya ee Itoobiya.

Goobjoogayaal ku sugan degmada Baydhabo ayaa u xaqiijiyay HOL in ciidamada DKMG ah iyo kuwa Itoobiya ay dhaqdhaqaaqyo ciidan ka billaabeen degmadaas shalay gallinkii dambe, kuwaasoo socday illaa xalay.

"Ciidamada Itoobiya iyo kuwa Soomaalida ayaa waxay isku urursanayeen saldhigyo ay ku leeyihiin magaalada, waxaan sidoo kale socday gaadiid dagaal oo fara badan kuwaasoo ay ku jireen taangiyo," ayay goobjoogayaal ku sugan Baydhabo u sheegeen HOL.

Maamulka degmada Baydhabo iyo saraakiisha ciidamada ayaan weli ka hadlin daqdhaqaaqyada ciidan ee ka jira degmada Baydhabo, kuwaasoo shacabka ku nool halkaas ay aad u dareemeen.

Degmada Baydhabo oo 240-km dhinaca Waqooyi-galbeed kaga beegan Muqdisho oo ah xarunta Soomaaliya ayaa waxay dhammaadkii bishii Feberaayo ee sannadan gacanta u gashay ciidamada dowladda KMG ah oo gacan ka helaya kuwa AMISOM.

Inkastoo xilligaas kaddib ay ciidamada isbahaysanaya qabsadeen dhowr degmo oo ka tirsan gobolkaas ayaa haddana waxay weli Al-shabaab ka talisaa degmooyin ay ka mid yihiin Buur-hakaba iyo Diinsoor oo dhinacyada koonfur iyo bari ka xiga degmada Baydhabo.

Xarakada Al-shabaab ayaa horay u sheegtay inay difaacanayso degmooyinka weli kaga sugan tahay gobolka Bay, iyadoo warar lagu kalsoonaan karo oo la helayo ay sheegayaan in ciidamada dhaqdhaqaaqa wada ay ku wajahan yihiin labadan degmo.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
7/30/2012 9:25 AM EST
Isniin, July 30, 2012 (HOL) — Madaxweynaha maamulka Galmudug, Col. Maxamed Axmed Caalin oo ku sugan magaalada Nairobi oo dhawaan wadnaha looga qalay ayaa sheegay inuu soo dhaweynayo shirka ansixinta dastuurka ee Muqdisho ka socda, isagoo ka digay doorashooyin madaxweyne oo ka dhaca Galmudug.

7/30/2012 8:55 AM EST
Isniin, July 30, 2012 (HOL) — Ergooyinka beesha shanaad ayaa waxay maanta ka dhigeen xarunta uu shirku ka socdo dibadbax cabasho ah, kaasoo ay ku sheegeen inay kaga soo horjeedaan nidaamka 4.5-ka ee lagu qaybsado awoodda dalka.

7/30/2012 6:59 AM EST
Isniin, July 30, 2012 (HOL) — Madaxweynaha Soomaaliya, Shariif Sheekh Axmed iyo wafdi uu horkacayo ayaa maanta gaaray degmada Afgooye ee gobolka Shabeellada hoose, halkaasoo ay maalmihii ugu dambeeyay ka geysanayeen ciidamada DKMG ah falal ammaan-darro, iyagoo la kulmay waxgaradka degmadaas

7/30/2012 6:26 AM EST
Isniin, July 30, 2012 (HOL) — Qiimaha badeecadaha quutul-daruuriga ah ayaa sare u kac uu ku yimid bishan barakaysan ee Ramadaan, halka qiimihii sarifka doollarkuna hoos uga dhacay suuqyada sarifka Somaliland.

7/30/2012 3:39 AM EST
Isniin, July 30, 2012 (HOL) — Daaladda jaamacadaha Soomaaliya ee Somali-Ren ayaa deeq ka kooba kambiyuutarrro iyo birinto casri ah oo ay ugu deeqday dowladda Turkiga ku wareejisay jaamacadda Simad oo ka mid ah jaamadaha ka howlgala magaalada Muqdisho ee xarunta Soomaaliya.

7/30/2012 3:23 AM EST
Isniin, July 30, 2012 (HOL) — Ra'iisul wasaaraha dowladda KMG ah ee Soomaaliya, C/weli Maxamed Cali oo kormeer ku tahay Axaddii shalay xarunta uu ka socdo shirka ansixinta dastuurka ayaa sheegay inuu rajo weyn ka qabo in muddadii horay loogu qabtay lagu ansixiyo dastuurka qaybyada ah.