1/21/2022
Today from Hiiraan Online:  _
Wararka Maanta- Talaado, July 3 , 2012
Hay'ada SYAO oo tartanka todobaadka xornimada Soomaaliya u qabatay Maxaabiista Xabsiga Dhexe ku jirta (SAWIRRO)
SYAO2.jpg

Talaado, July 03, 2012 (HOL) - Waxaa lagu soo gaba gabeeyay Xabsiga Dhexe ee Xamar Tartan loogu magac daray Todobaadka iyo Xornimada Soomaaliya, kaasoo ay ka qeyb galeen ilaa lix kooxood oo wada ciyaaray ciyaaro is arag ah.

Tartankan oo uu soo qaban qaabiyay ururka u dooda Xuquuqda Dhalinyarada ee SYAO ayaa waxaa Xafladii xeritaanka iyo ciyaartii u dambeysay ka qeyb galay Mas'uuliyiin, Saraakiil, Qeybaha Bulshada, Haweenka iyo Madaxda Ururka SYAO.

Tartankan ayaa ahmiyadiisa koowaad ahaa mid SYAO ay dhiira gelin ugu sameyneysay maxaabiista ku jirta Xabsiga dhexe, isla markaana la dareensiineysa qiimaha ay leedahay Xornimada, iyadoo Koobkii lagu maamuusayay Tartankaas ay ka wada qeyb galeen ilaa lix kooxood oo laga soo kala xulay Maxaabiista ku jirtay Xabsiga.

Ciyaartii kama dambeysta aheyd ee Finalka waxaa isugu soo haray Kooxo ku kala ciyaarayay magacyada SYAO 2 iyo June 2, waxaana ku guuleysatay Koobka kooxdii ku ciyaareysa magaca June 2 oo hanatay koobkii loogu magac daray Todobaadka iyo Xornimada Soomaaliya.

Munaasabadii xeritaanka oo aheyd mid si heer sare ah loo soo qaban qaabiyay oo ka dhacday gudaha Xabsiga ayaa waxaa khudbado u badnaa dhiirigalin iyo hambalyada Maalinta Xornimada Soomaaliya ka jeediyay Mas'uuliyiintii ka qeyb gashay, oo bogaadiyay in tartan is dhex gal bulsho loo sameeyo Maxaabiista ku jirta Xabsiga si aanay u niyad jebin.

SYAO3.jpg

Gudoomiyaha Ururka u dooda xuquuqda dhalinyarada ee SYAO Maxamed Ibraahim cali (Cajiib) oo ka hadlay Munaasabada ayaa sheegay in Tartankan ay u qabteen ujeedooyin badan, isagoo xusay in ugu horeyn muhiimada ay aheyd in la xusuusiyo dhalinyarada ku jirta Xabsiga qiimaha ay leedahay Xornimada iyo Nabadda.

"Ugu horeyn waxaa farxad ii ah in maanta dhalinyaradii xabsiga ku jirto, inaan tusno waxa ay tahay Nabada iyo is dhex galka bulshada, waxaa kaloo dareensiinay qiimaha xorriyada, ma ahan kaliya in qofka xabsiga ku jiro inuu isu heysto in bulshada intiisa kale aan lala noolaan karin, hadii uu qol ku jiro, maantana waa ujeedaan is dhex galkan wuxuu kaalin ka qaadanaysaa niyadooda, dhiira gelinna waa u tahay, waxaan balan qaadeynaa in dhalinyarada xabsiga ku jirta inaan wacyi gelin iyo aqoon kororsi u sameyno, si aanay mustaqbalkooda uga quusan"ayuu yiri Mr Cajiib oo khudbad dhiira gelin ah u jeediyay dhalinyarada ku jirta Xabsiga.


Gudoomiyaha Isbaheysiga Nabada C/llaahi Sheekh Xasan ayaa uga mahad celiyay doorka SYAO ka qaadatay horumarinta dhalinyarada iyo barnaamijyada wacyi gelinta ah, isagoo tartankan loo qabtay dhalinyarada ku sifeeyay mid sare u qaadaya niyada dhalinta xabsiga oo noloshooda ay dib u soo laaban karto, isagoo xusay in qofka dambiga galay ee xabsiga ku jira uu yahay Bani'aadam, laakiin loo baahan yahay in aanu dambi kale gelin, hadii uu soo dhameysto mudada uu xabsiga ku jiro.

Sidoo kale waxaa ka hadlay Munaasabada Gudoomiye kuxigeenka Ururka Haweenka Qaranka Canab Xasan Cilmi iyo Taliye kuxigeenka Ciidanka Ilaalada Xabsiga Jen. Xuseen Xasan, oo soo dhoweeyay tartanka loo qabtay dhalinyarada Xabsiga ku jirta, inay qeyb ka tahay tartamada is dhex galka bulshada oo aan kaliya ku sineyn dadka xorta ah ee dibada jooga, kuwa xabsiyada ku jirana ay mudan yihiin.

Ugu dambeyn Ururka SYAO ayaa waxaa uu abaal marino kala duwan gudoonsiiyay Kooxdii ku guuleysatay tartankan iyo dhamaan kooxihii ka qeyb galay tartan ciyaareedkaas.

SYAO6.jpg
SYAO4.jpg
SYAO5.jpg
SYAO7.jpg
SYAO8.jpg
SYAO.jpg
SYAO9.jpg

Axmed C/samad, Hiiraan Online
[email protected]
Nairobi , Kenya












Click here
7/3/2012 9:38 AM EST
Danjiraha Soomaaliya u jooga dalka Kenya Maxamed Cali Nuur (Ameeriko) ayaa si kulul u cambaareeyay weeraradii lagu qaaday magaalada Gaarissa ee xarunta gobolka waqooyi bari ee Soomaalida.

7/3/2012 8:58 AM EST
Talaado, July 03, 2012 (HOL) — Maamulka degmada Yaaqshiid ee gobolka Banaadir ayaa soo bandhigay maanta oo Talaado ah saddex dhallinyaro rag ah oo laba ka mid ah ay xirnaayeen dharka dumarka dhacna u geysanayay dukaan ku yaalla suuqa labaad ee Muqdisho ugu weyn (Suuq Bacaad).

7/3/2012 8:37 AM EST
Talaado, July 03, 2012 (HOL) — Munaasabado si heer sare loosoo agaasimay ayaa si gooni-gooni ah uga kala dhacday degmooyinka degmooyinka Baydhaba, Berdaale, Qasax-dheere iyo deegaanka Daynuunaay oo dhammaantood ka tirsan gobolka Bay.

7/3/2012 7:25 AM EST
Talaado, July 03, 2012 (HOL) — Maamulka tuulada Xiriiro oo ka tirsan gobolka Bari ayaa sheegay in ciidamada badda Puntland ay deegaankaas ku dileen laba qof oo shacab ah, sideed kalena ay ku dhaawacyo u geysteen.

7/3/2012 7:09 AM EST
Talaado, July 03, 2012 (HOL) — Hoggaamiyaha Raas-kambooni oo ka dagaalanta gobollada Jubbooyinka, Sheekh Axmed Maxamed Islaam (Sheekh Axmed Madoobe) ayaa sheegay in ciidamada dowladda KMG, kuwa Raas-kambooni iyo militariga Kenya ay hadda ku jiraan diyaar-garow ballaaran oo ay ku doonayaan inay ku weeraraan goobaha ay ka taliso Xarakada Al-shabaab ee gobollada Jubbooyinka.

7/3/2012 4:19 AM EST
Talaado, July 03, 2012 (HOL) — Hay'adda caawisa qoxootiga ee fadhigeedu yahay dalka Norway (NRC) ayaa sheegtay inay joojinsay howlihii samafalka ahaa ee ay ka wadday xeryaha qoxootiga Dhadhaab ee dalka Kenya, kaddib afduubkii loo geystay afar shaqaalaheeda ka mid ah oo ciidamada DKMG ah iyo kuwa Kenya ay xoog kusoo furteen.

7/3/2012 3:52 AM EST
Talaado, July 03, 2012 (HOL) — Ra'iisul wasaaraha Kenya, Raila Odinga ayaa ku hanjabay in ciidamadooda ku sugan Soomaaliya ay xoojin doonaan dagaalka ay kula jiraan Xarakada Al-shabaab oo uu ku eedeeyay weerarro ka dhacay Gaarisa iyo afduubyada shaqaale gargaar oo ka tirsan hay'adda NRC.

7/3/2012 3:45 AM EST
Talaado, July 03, 2012 (HOL) — Kooxo hubeysan ayaa magaalada Garoowe ee xarunta Puntland ku toogtay xalay taliye ku xigeenkii ciidanka booliiska Puntland, G/sare Cabdullaahi Saalax Nadaalo, iyadoo aan si dhab ah loo ogeyn sababta loo dilay iyo cid dilkiisa ka dambeysay.