1/29/2023
Today from Hiiraan Online:  _
Wararka Maanta- Axad, July 29, 2012
Dagaal culus oo ciidamada Dowladda KMG, kuwa Itoobiya iyo Xarakada Al-shabaab ku dhexmaray Gobolka Gedo
Axad, July 29, 2012 (HOL) — Ugu yaraan 10-qof oo dhinacyadii dagaalamay ka tirsan ayaa ku dhintay dagaal culus oo xalay duleedka deegaanka Yurkud ee gobolka Gedo ku dhexmaray ciidamada DKMG ah, kuwa Itoobiya iyo xoogagga Al-shabaab.

Dagaalkaas ayaa qarxay markii xoogag daacad u ah Al-shabaab ay weerareen deegaankaas oo ay gacanta ku hayaan ciidamada DKMG ah iyo kuwa Itoobiya, waxaana dagaalkan ku dhaawacmay tiro ka badan 15-qof oo dhinacyadii dagaalku u dhexeeyay ka mid ah.

"Al-shabaab ayaa xalay soo weerartay deegaanka Yurkud, waana la iska difaacay iyadoo halkaas uga cararay maydadka 26-qof oo ka mid ah dagaalyahannadoodii," ayuu yiri guddoomiyaha gobolka Gedo ee dowladda KMG ah, Maxamed Cabdi Kaliil oo la hadlayay saxaafadda.

Guddoomiyaha gobolka Gedo, ma uusan sheegin khasaare dhankooda soo gaartay, iyadoo saraakiil u hadlay Xarakada Al-shabaab ay sheegeen inay weerareen Yurkud oo ka tirsan gobolka  Gedo, balse ma sheegin khasaaraha dagaalkaas ka dhashay.

Deegaanka Yurkud ayaa waxaa gacanta ku haya ciidamada dowladda iyo kuwa Itoobiya, iyadoo xoogaggii Al-shabaab ay xalay dib uga laabteen halkaas, waxaana uu noqonayaa dagaalkii labaad ee noociisa ah oo sannadkan ciidamada DKMG ah, Itoobiya iyo Xarakada Al-shabaab ku dhexmara deegaankaas.

Ma jirto khasaare dagaalkaas kasoo gaaray dadka shacabka ah, iyadoo dadka ku sugan degmadaas oo qaarkood warbaahinta la hadlya ay sheegeen in dagaalku uu ahaa mid aad u culus.

Dhanka kale, guddoomiyaha gobolka Gedo ee dowladda Soomaaliya ayaa xaqiijiyay in weerar gaadmo ah lagu qaaday gaadiid ay wateen ciidamada dowladda KMG ah iyo kuwa Kenya oo ka tirsan AMISOM, halkaasna lagu gubay mid ka mid ah gaadiidkii ay wateen ciidamadan.

Wararka ayaa waxay sheegayaan inay ku dhaawacmeen afar askari oo ciidamada dowladda KMG ah ka tirsan, inkastoo guddoomiyaha gobolka Gedo uusan sheegin wax khasaare ah oo kasoo gaaray weerarkaas.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
7/29/2012 3:39 PM EST
Axad, July 29, 2012 (HOL) - Dab baabi'iyay gabi ahaanba suuqii ugu waynaa ee xeryaha qaxootiga ee Dhadhaab ayaa galabta maqribkii halkaas ka bilowday.

7/29/2012 9:38 AM EST
Axad, July 29, 2012 (HOL) — Guddoomiyaha maamulka gobolka Hiiraan, Cabdifitaax Xasan Afrax iyo xubno ka tirsan maamulka ayaa maanta gaaray degmada Matabaan ee gobolka Hiiraan.

7/29/2012 8:31 AM EST
Axad, July 29, 2012 (HOL) — Kooxo hubeysan ayaa maanta lidka diyaaradaha iyo madaafiic ku weeraray garoonka diyaaradaha ee Gaalkacyo oo ku yaalla dhinaca waqooyi-bari oo ay ka taliso maamulka Puntland, inkastoo aan la sheegin khasaare ay rasaastaasi geysatay.

7/29/2012 7:50 AM EST
Axad, July 29, 2012 (HOL) — Ra'iisul wasaaraha DKMG Soomaaliya C/weli Maxamed Cali ayaa maanta kulan kula yeeshay Muqdisho ra'iisul wasaare ku xigeenka dalka Ireland ahna wasiirka arrimaha dibadda iyo ganacsiga ee dalka Irland iyo wafdi uu hoggaaminayo oo booqasho ku yimid Muqdisho.

7/29/2012 7:24 AM EST
Axad, July 29, 2012 (HOL) — Warsaxafadeed ay hay'adda culummada Soomaaliyeed kasoo saartay Muqdisho maanta oo Axad ah ayay ku sheegtay in dastuurka ay ku jiraan qodobbo ka horimaanaya diinta Islaamka, iyadoo codsatay in lagu asmeeyo isbedel ka hor inta aan la ansixin.

7/29/2012 7:06 AM EST
Axad, July 29, 2012 (HOL) — Dagaal aad u xooggan ayaa xalay ka dhacay degmada Afmadow ee gobolka Jubada Hoose, iyadoona dagaalkaasi uu u dhexeeyay ciidamada dowladda KMG oo garab ka helaya kuwa Kenya iyo Xarakada Al-shabaab.

7/29/2012 3:40 AM EST
Axad, July 29, 2012 (HOL) — Hay'adda caafimaadka adduunka ee WHO ayaa salay oo Sabti ahayd sheegtay in cudurka halista ah ee Ebola uu k dillaacay dalka Uganda, uuna dilay 14-qof, tiro kale oo dad ahna ay isbitaallada u jiifaan.

7/29/2012 3:21 AM EST
Axad, July 29, 2012 (HOL) — Afhayeenka howgallada ee Xarakada Al-shabaab, Sheekh C/casiis Abu-Muscab ayaa sheegay inay ciidamadooda sida gaarka ah u tababaran toogasho ku dileen laba ka tirsan ciidamada AMISOM oo ku sugnaa garoonka diyaaradaha ee degmada Dayniile.