12/6/2021
Today from Hiiraan Online:  _
Wararka Maanta- Isniin, July 16, 2012
Dowladda Soomaaliya oo Maamul u Magacowday Gobolka Galguduud oo ay ka kala taliyaan Ahlusunna iyo Al-shabaab
Isniin, July 16, 2012 (HOL) — Dowladda Soomaaliya ayaa maamul cusub maanta u magacowday gobolka Galguduud ee bartamaha Soomaaliya oo ay ka kala taliyaan Ururrada Ahlusunna Waljmaaaca iyo Xarakada Al-shabaab.

Xaflad ay soo qabanqaabisay wasaaradda arrimaha gudaha iyo ammaanka Qaranka ee dowladda KMg ah ayaa looga dhawaaqay magacyada mas'uuliyiinta ay dowladdu u magacowday gobolkaas.

Mas'uuliyiinta maamulka gobolka Galguduud ayaa lagu magacaabay wareegto kasoo baxday xafiiska madaxweynaha Soomaaliya, taasoo lagu sheegay inu soo jeedinta lahaa wasiirka arrimaha gudaha iyo ammaanka Qaranka, Cabdisamad Macallin Maxamuud.

Guddoomiyaha gobolka Galguduud ayaa waxaa loo magacaabay: Axmed Yuusuf Xasan (Ciyoow) iyadoo guddoomiye ku xigeen loo magacaabay, Saadaq Sheekh Yuusuf Sheekh Ibraahim, halka guddoomiyaha degmada Dhuusomareeb looga magacaabay Macallin C/raxmaan Geedo-qorow iyo guddoomiyaha degmada Guriceel oo loo magacaabay Cismaan Ciise Nuur (Taar-dhuleed).

"Gobolka Galguduud waxaa ka dhacay dhibaatooyin ay dadka iyo dabeecada sabab u yihiin sida dagaallo soo laalaabtay, abaaro iyo biyo la'aan, waxaana dowladda KMg ah ka codsanaynaa inay caawiso dadka gobolkaas ku nool," ayuu yiri Ciyoow.

Sidoo kale, shacabka ku nool gobolkaas ayuu ka dalbaday inay xilka loo dhiibay ku siiyaan gacan, isagoo sheegay in maamulkiisa ay ka go'an tahay wax ka qabashada dhinacyada ammaanka iyo horumarinta gobolka.

Wasiirka arrimaha gudaha iyo ammaanka Qaranka DKMG ah oo goobta ka hadlay ayaa sheegay in guddoomiyaha gobolka looga baahan yahay inuu ka shaqeeyo sidii ammaanka uu wax uga qaban lahaa, sidoo kalena uu ka shaaqeeyo sidii dowladda KMG ah iyo shacabka ku nool gobolkaas ay wada-shaqeyn u dhexmari lahayd.

"Magacaabista guddoomiyaha gobolka Galguduud iyo mas'uuliyiinta kale waxay ku yimaadeen rabitaanka shacabka ku nool gobolkaas iyo ogolaashaha Ahlusunna, xubnaha dhimanna waxaan sugaynaa inay ka yimaadeen dadweynaha," ayuu Wasiirku yiri.

Deegaannada maamulka loo magacabaay ayaa waxay ku yaallaan dhinaca ay ka taliso Ahlusunna oo xiriir la leh dowladda KMG ah, iyadoo aanay jirin mas'uuliyiin loo magacaabay degmooyinka ay gobolkaas kaga sugan tahay Al-shabaab.

Inkastoo Ahlusunna aysan ka hadlin go'aankooda ku aaddan magacaabistan ayaa haddana mas'uuliyiinta ay dowladdu magacowday ayaa dhammaantood ah kuwii Ahlusunna ay horay gobolkaas ugu magacaabeen.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
7/16/2012 1:29 PM EST
Isniin, July 16, 2012 (HOL) - Waxaa maanta albaabada loo laabay in badan oo kamid ah goobaha ganacsiga ee magaalada Boosaaso, oo iyadu ah xarunta ganacsiga iyo dhaqaalaha ee dowlad goboleedka Puntland.

7/16/2012 9:47 AM EST
Isniin, July 16, 2012 (HOL) — Kooxo sita labiska ciidamada DKMG ah ee Soomaaliya ayaa xalay ku toogtay degmada Afgooye ganacsade iyo wiil uu dhalay oo lagu kala magacaabi jiray, Cismaan Axmed Xuseen iyo wiilkiisa Maxamed Cismaan Axmed, kaddib markii ay ku weerareen dukaankooda oo ku yaala bartamaha degmadaas.

7/16/2012 9:45 AM EST
Isniin, July 16, 2012 (HOL) - Ra'iisul wasaarihii hore ee Soomaaliya Maxamed C/laahi Farmaajo ayaa si deggan uga jawaabay warbixintii qaramada midoobay ay soo saartay ee qaar kamid hogaamiyayaasha dawlada ku eedaysay musuqmaasuq iyo lunsashada hantida qaranka.

7/16/2012 8:37 AM EST
Isniin, July 16, 2012 (HOL) — Madaxweyne ku xigeenka Somaliland Md: Cabdiraxmaan Cabdilaahi Ismaaciil (Saylici) oo safar xaqiiqo raadis ah u tagay goboladda galbeedka Somaliland ee abaaruhu aad u dhibaateeyeen, kuwaas oo dad iyo duunyaba saamaysay, waxaanu caalamka iyo bulshadda ku booriyey inay gurmad u fidiyaan dadkaasi.

7/16/2012 8:31 AM EST
Isniin, July 16, 2012 (HOL) — Xarakada Al-shabaab ayaa maanta sheegtay inay difaacaynayso magaalada Kismaayo ee gobolka Jubbada hoose, halkaasoo ay ku wajahan yihiin ciidamada Kenya ee ka mid noqday AMISOM, kuwa Dowladda KMG ah iyo xoogagga Raaskambooni.

7/16/2012 8:09 AM EST
Isniin, July 16, 2012 (HOL) — Ra'iisul wasaaraha Itoobiya, Meles Zenawi ayaan ka qaybgalay shirka madaxda ururka Midowga Afrika uga socda Addis Ababa, iyadoo ay ilo wareedyo hoose sheegayaan inuu aad u xanuunsan yahay.

7/16/2012 6:33 AM EST
Isniin, July 16, 2012 (HOL) — Maxamuud Cabdi Ibraahim (Garweyne) oo ka mid ahaa xildhibaannada baarlamaanka Soomaaliya horayna u soo noqday wasiir ayaa ku dhintay qarax maanta oo Isniin ah ka dhacay degmada Xamar-weyne ee gobolka Banaadir; iyadoo qaraxaas ay ku dhaawacmeen sideed qof oo laba ka mid ah ay la saarnaayeen gaariga.

7/16/2012 3:55 AM EST
Isniin, July 16, 2012 (HOL) — Dhallinyaro Soomaaliyeed oo ay xabsi ku hayaan koox malleeshiyo ah oo gacanta ku haysa magaalada Misraata ee dalka Liibiya ayaa ka cabanaya dhibaatooyin lagu hayo.

7/16/2012 3:35 AM EST
Isniin, July 16, 2012 (HOL) — Madaxda ururka Midowga Afrika ayaa xalay u doortay in haweeney ay markii ugu horreysay hoggaamiso ururka Midowga Afrika, taasoo ah wasiirradda arrimaha gudaha ee dalka Koonfur Afrika, Nkosazana Dlamini-Zuma oo dhowr wareeg oo doorasho ah kaga guleysatay hoggaamiyihii Midowga Afrika, Jean Ping oo u dhashay dalka Gaaboon.

7/16/2012 2:55 AM EST
Isniin, July 16, 2012 (HOL) — Ra'iisul wasaaraha xukuumadda Soomaaliya, C/wali Maxamed Cali ayaa sheegay inay heer gabo-gabo ah marayaan howlaha looga gudbayo xilliga KMG ah ee Soomaaliya, isagoo sheegay inuu rajo wanaagsan ka qabo in howshan ay ku dhammaanto xilligii loo qabtay.