11/28/2021
Today from Hiiraan Online:  _
Wararka Maanta- Isniin, July 16, 2012
Madaxda Qaaradda Afrika oo Markii ugu horreysay Hoggaanka sare Ururka Midowga Afrika u doortay Haweeney

Isniin, July 16, 2012 (HOL) — Madaxda ururka Midowga Afrika ayaa xalay u doortay in haweeney ay markii ugu horreysay hoggaamiso ururka Midowga Afrika, taasoo ah  wasiirradda arrimaha gudaha ee dalka Koonfur Afrika, Nkosazana Dlamini-Zuma oo dhowr wareeg oo doorasho ah kaga guleysatay hoggaamiyihii Midowga Afrika, Jean Ping oo u dhashay dalka Gaaboon.

Dlamini-Zuma oo 63-jir ah ayaa kaga guuleysatay Jean Ping 37 kaddib afar wareeg oo doorasho ah, waxaana tani ay noqonaysaa markii ugu horreysay oo haweeney ay hoggaanka ururka qabato tan iyo markii la aasaasay sannadkii 1960-kii.

"Hadda waxaan doorannay Madame Zuma oo hoggaamin doonta mustaqbalka ururka Midowga Afrika," ayuu yiri madaxweynaha Benin, Thomas Boni Yayi, iyadoo shir-guddoomin doonta kulanka hadda socda ee Midowga Afrika.

Guddoomiyaha cusub ee ururka Midowga Afrika oo ahayd xaaska madaxweynaha dalka Koonfur Afrika, Jacob Zuma. Waxayna horay u soo qabatay wasiirka arrimaha dibadda, wasiirka caafimaadka iyo hadda oo ay tahay wasiirka arrimaha gudaha.

"Tani macnaheedu waa in Qaaradda Afrika ay isbedeshay ayna awood siiyaan haweenka, taasina waa muhiim," ayay tiri Zuma oo sheegtay inay wax badan ka bedeli doonto habka uu u shaqeeyo ururka Midowga Afrika.

Madaxweynayaasha Afrika oo ka hadlay sida ay u arkaan guusha ay gaartay Zuma ayaa ku tilmaamay mid aad u wanaagsan, waxaana madaxweynaha Uganda oo ka mid ahaa mas'uuliyiintii hadlay uu sheegay in Zuma ay tahay haweeney xorriyadda dalkeeda u dagaalantay aysanna ahayn qof cunsuriyad ah.

Guddoomiyihii hore ee ururka Midowga Afrika, Jean Ping ayaa u hambalyeeyay guddoomiyaha cusub ee xilka kaga guuleysatay, isagoo sheegay inuu la shaqeyn doono uuna ku faraxsan yahay inay xilka kala wareegto.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
7/16/2012 1:29 PM EST
Isniin, July 16, 2012 (HOL) - Waxaa maanta albaabada loo laabay in badan oo kamid ah goobaha ganacsiga ee magaalada Boosaaso, oo iyadu ah xarunta ganacsiga iyo dhaqaalaha ee dowlad goboleedka Puntland.

7/16/2012 9:47 AM EST
Isniin, July 16, 2012 (HOL) — Kooxo sita labiska ciidamada DKMG ah ee Soomaaliya ayaa xalay ku toogtay degmada Afgooye ganacsade iyo wiil uu dhalay oo lagu kala magacaabi jiray, Cismaan Axmed Xuseen iyo wiilkiisa Maxamed Cismaan Axmed, kaddib markii ay ku weerareen dukaankooda oo ku yaala bartamaha degmadaas.

7/16/2012 9:45 AM EST
Isniin, July 16, 2012 (HOL) - Ra'iisul wasaarihii hore ee Soomaaliya Maxamed C/laahi Farmaajo ayaa si deggan uga jawaabay warbixintii qaramada midoobay ay soo saartay ee qaar kamid hogaamiyayaasha dawlada ku eedaysay musuqmaasuq iyo lunsashada hantida qaranka.

7/16/2012 8:37 AM EST
Isniin, July 16, 2012 (HOL) — Madaxweyne ku xigeenka Somaliland Md: Cabdiraxmaan Cabdilaahi Ismaaciil (Saylici) oo safar xaqiiqo raadis ah u tagay goboladda galbeedka Somaliland ee abaaruhu aad u dhibaateeyeen, kuwaas oo dad iyo duunyaba saamaysay, waxaanu caalamka iyo bulshadda ku booriyey inay gurmad u fidiyaan dadkaasi.

7/16/2012 8:31 AM EST
Isniin, July 16, 2012 (HOL) — Xarakada Al-shabaab ayaa maanta sheegtay inay difaacaynayso magaalada Kismaayo ee gobolka Jubbada hoose, halkaasoo ay ku wajahan yihiin ciidamada Kenya ee ka mid noqday AMISOM, kuwa Dowladda KMG ah iyo xoogagga Raaskambooni.

7/16/2012 8:11 AM EST
Isniin, July 16, 2012 (HOL) — Dowladda Soomaaliya ayaa maamul cusub maanta u magacowday gobolka Galguduud ee bartamaha Soomaaliya oo ay ka kala taliyaan Ururrada Ahlusunna Waljmaaaca iyo Xarakada Al-shabaab.

7/16/2012 8:09 AM EST
Isniin, July 16, 2012 (HOL) — Ra'iisul wasaaraha Itoobiya, Meles Zenawi ayaan ka qaybgalay shirka madaxda ururka Midowga Afrika uga socda Addis Ababa, iyadoo ay ilo wareedyo hoose sheegayaan inuu aad u xanuunsan yahay.

7/16/2012 6:33 AM EST
Isniin, July 16, 2012 (HOL) — Maxamuud Cabdi Ibraahim (Garweyne) oo ka mid ahaa xildhibaannada baarlamaanka Soomaaliya horayna u soo noqday wasiir ayaa ku dhintay qarax maanta oo Isniin ah ka dhacay degmada Xamar-weyne ee gobolka Banaadir; iyadoo qaraxaas ay ku dhaawacmeen sideed qof oo laba ka mid ah ay la saarnaayeen gaariga.

7/16/2012 3:55 AM EST
Isniin, July 16, 2012 (HOL) — Dhallinyaro Soomaaliyeed oo ay xabsi ku hayaan koox malleeshiyo ah oo gacanta ku haysa magaalada Misraata ee dalka Liibiya ayaa ka cabanaya dhibaatooyin lagu hayo.

7/16/2012 2:55 AM EST
Isniin, July 16, 2012 (HOL) — Ra'iisul wasaaraha xukuumadda Soomaaliya, C/wali Maxamed Cali ayaa sheegay inay heer gabo-gabo ah marayaan howlaha looga gudbayo xilliga KMG ah ee Soomaaliya, isagoo sheegay inuu rajo wanaagsan ka qabo in howshan ay ku dhammaanto xilligii loo qabtay.