11/28/2021
Today from Hiiraan Online:  _
Wararka Maanta- Axad, July 15, 2012
Guddiga Doorashooyinka Somaliland iyo Golayaasha Sharci-dajinta oo ku kala aragti duwan habka ay Doorashooyinku u dhacayaan
Axad, July 15, 2012 (HOL) — Guddoomiyaha guddidda Doorashooyinka Somaliland, Ciise Yuusuf Xamari ayaa ka hadlay tallo soo-jeedin ay u soo jeediyeen goleyaasha Sharci dejinta inay wax ka bedelaan Astaantii hore ee doorashooyinka lagu gali jiray oo ay ka dhigeen in number lagu galo si ay ugu fududaato hawlaha doorashooyinka, balse soo jeedintaasi guddidda Doorashooyinka waxa ku gacan saydhay golaha Guurtidda oo diiday in number lagu galo doorashooyinka, maadaama oo ay badan yihiin dadka aan waxna qorin waxna akhriyin, isla markaana ay ku wareerayaan dadkaasi qofkay codka siin lahaayeen, sidaa awgeed ay lagu gallo doorashadda sidii birigii hore ee astaan lagu gali jiray.

Haseyeeshee, guddidda Doorashooyinka oo golaha Wakiiladda hor yimid ayaa sheegay in caqabadaha hor yaalla doorashooyinka ay ka mid tahay qaabka loo galayo doorashadda,maadaama oo ay tiradda asxaabta Siyaasadda ka qaybgalayaa badan tahay, sidaas darteed musharaxiintaas badani aanay ku gali Karin in qofkasta astaan ku galo, balse ay u dhibyar tahay guddi ahaan in lagu gallo number, isla markaana la is waafajiyo sharcigiii hore ee astaanta lagu galay iyo soo jeedintan cusub ee numbarka lagu galayo.

 “Haddii aynu soo qaadano Hargeysa waa 25 xubnood oo Golaha Deegaanka ah, 25 Xubnood oo ku yaala hal Warqad oo sagaal Xisbi min 25 soo sharaxayaan, waxa weeyaan 225 Musharax ayaa Warqada codaynta ku oolaysaa, taas oo keenaysa in codkii Muwaadinku aanu ku dhicin gacantuu doonayey oo ah marka uu 225 lagu soo qoro Warqad codayneed oo kaliya in ay ku keento sidii aynu hore u soo aragnay doorashadiinii  inuu Qofku kala garan-waayo 225 sumadood”ayuu yidhi guddoomiyah doorashooyinka oo sharaxaya sababta u codsadeen in wax laga bedelo habkii hore ee loo gali jiray doorashooynka.

 “waxaanu samaynay Doorasho tijaabo ah oo Waxaanu u yeedhnay 200 qof, 100 Qof oo wax akhriya iyo 100 oo aan waxba akhriyin, oo isugu jira Dad waaweyn iyo dhalinyaro oo Rag iyo Dumar-ba leh, waxa nooga soo baxay qaladaad yar-yar oo farsamo oo qofku ku dhacay markii uu codaynayey oo laga sixi karo daabacaada dambe, laakiin waxaanu si wacan u helnay oo nooga soo baxay in dadku lambarka ku faa’iidi karayaan”ayuu yidhi Guddoomiye Xamari.

Si kastaba ha ahaatee, Doorashooyinkii hore ee ka dhacay Somaliland ayaa waxa ninka musharaxa ahi ku gali jiray astaan la isla garanayo sida Neef Adhi ah, dundumo, dibi, balse qorshahaasi ayaa wax laga bedelay waxaanay codsadeen komishanka doorashooyinku in lagu bedelo astaantii lamber si ay u koobnaato waraaqda lagu codaynayo, oo tusaale ahaan qof la siiyo Lamber uu doorashadda ku galayo, maadaama oo dadka  isa soo sharaxayaa ay aad u badan yihiin astaantuna u baahan tahay waraaqo badan oo loo adeegsado, balse lambarku kooban yahay.

Haseyeeshee, arrintaasi waxa ganafka ku dhuftay golaha Guurtiddda oo sheegay in dadku yaqaanaan astaanta balse aanay Lamber garan Karin, taasina ay keenayso in jahawareer ku dhaco qofka codaynayo, sidaa awgeed lagu galo astaantii hore.

Dhinaca kale, waxa iyana khilaaf soo kala dhexgalay golaha wakiiladda iyo haweenka Somaliland ka dib markii golaha wakiiladdu dib u celiyeen soo jeedin madaxweynuhu soo jeediyey in haweenka iyo beelaha la hayb sooco xubno aan doorasho galin kuraas laga siiyo goleyaasha qaranka, maadaama oo haweenka iyo dadka la haybsoocaa doorasho ku soo baxayn. Haseyeeshee, golaha wakiiladda ayaa diiday in kooto la siiyo haweenka, isla markaana sharciga ka hor imanayso in dad gaar ah kooto kuraas ah la siiyo, sidaa darteedna dib loo celiyey soo jeedintaasi.

Kootadan haweenka la siinayey ee dib loo celiyey waxa ka xanaaqay haweenkii Somaliland oo dabadda ka riixayey in loo ansixiyo Kuraastaas kootadda ah, waxaanay kulan iskugu yimaadeen ku cambaareeyeen go’aan goluhu diiday in kooto gaar ah la siiyo haweenka, iyagoo ku baaqay isku soo bax ka dhan ah golaha wakiiladda ay haweenku iskugu yimaadaan si golaha loogu qasbo inay ogolaadaan xubno u gaar ah in la siiyo haweenka.

Sidoo kale, waxa iyaguna arrintan ka hadlay beelaha la haybsooco oo sheegay in haweenka iyo iyaga la isku dhufanayo, isla markaana haweenka saami badan la siiyey, halka beelaha la hayb sooco oo badana kuraasta lagu yareeyey, waxaanay soo dhoweeyeen xeerkaa dib loo ceeliyey maadaama oo cadaalad aanu ku dhisnayn.

Barkhad-Ladiif M. Cumar, Hiiraan Online  
[email protected]
Hargeysa, Somaliland












Click here
7/15/2012 6:48 PM EST
Axad, July 15, 2012 (HOL) - Tartan kubada cagta ah oo loogu magac darey Somali Week Seattle ayaa waxoow si xiiso badan uga socdey garoomada Chief Sealth Stadium iyo Foster High Stadium kasoo eey ka qeyb galayeen 12 kooxood oo ka kala yimid magaaladan Seattle iyo Goboladda waaweyn ee dalka Mareykanka sida Minnesota, Denver, Utah, Oregon.

7/15/2012 8:59 AM EST
Axad, July 15, 2012 (HOL) — Kooxo bastoolado ku hubeysan ayaa maanta ku dilay xaafadda Suuqa Xoolaha ee degmada Huriwaa laba wiil oo dhallinyaro ah, halka ay mid kalena ku dhaawacmeen.

7/15/2012 7:57 AM EST
Axad, July 15, 2012 (HOL) — Ugu yaraan hal qof ayaa ku dhintay, 16-qof oo kalena way ku dhaawacmeen iska-horimaadyo bartamaha magaalada Addis Ababa ee dalka Itoobiya ku dhexmaray salay oo Sabti ahayd booliiska federaalka dalkaas iyo kooxo muslimiin ah.

7/15/2012 3:14 AM EST
Axad, July 15, 2012 (HOL) - Kooxda Baarista (Monitoring Group) oo ay Golaha Ammaanka ee Qaramada Midoobay u xilsaartay baarista qaabka loo maamulay dhaqaalaha soo gala dowladda KMG ah ee Soomaaliya ayaa warbixin hordhac ah oo laga helay ku eedesay madaxda sare ee dowladda Soomaaliya inay lunsadeen hanti gaareysa 131-milyan oo doollar.

7/15/2012 2:55 AM EST
Axad, July 15, 2012 (HOL) — Xarakada Al-shabaab ayaa guulo ka sheegatay iska-horimaadyo ka dhacay deegaanno ka tirsan gobollada Bakool iyo Shabeellada Hoose iyo waddada isku xirta Muqdisho iyo Afgooye.

7/15/2012 2:35 AM EST
Axad, July 15, 2012 (HOL) — Madaxweyne ku xigeenka Somaliland, Cabdiraxmaan Cabdilaahi Ismaaciil (Saylici), ayaa safar shaqo ku tagay magaaladda Boorame ee gobolka Awdal, isagoo sheegay inuu doonayo inuu u yimid si uu gacan uga gaysto abaaraha baahsan ee ka jira deegaanadaasi.

7/15/2012 2:32 AM EST
Axad, July 15, 2012 (HOL) — Iska-horimaad xooggan oo u dhexeeya ciidamada dowladda KMG ah oo kaashanaya kuwa AMISOM iyo xoogagga Al-shabaab ayaa maanta ka dhacay meel qiyaastii 5-km u jirta magaalada Afmadow ee gobolka Jubada Hoose.