1/29/2023
Today from Hiiraan Online:  _
Wararka Maanta- Axad, July 1 , 2012
Madaxweynaha Soomaaliya oo sheegay in haddii fikir mideysan la qaato laga gudbi karo dhibaatada hadda jirta

Axad, July 01, 2012 (HOL) — Madaxweynaha Soomaaliya, Sheekh Shariif Sheekh Axmed oo khudbad dheer ka jeediyay munaasabad lagu xusayay 1-da Luuliyo oo xalay ka dhacday xarunta madaxtooyada Soomaaliya ayaa sheegay in loo baahan yahay in fikir mideysan la qaato si looga gudbo dhibaatada hadda jirta, dalkana loogu soo dabaalo dowladnimo iyo amni.

Xafladdii lagu xusayay maalinta xoriyaadda gobollada Koonfureed ee Soomaaliya iyo israacii labada gobol oo ay kasoo wareegtay 50-sano ayaa waxaa goobjoog ka ahaa xubno ka tirsanaa ururkii SYL iyo dad kale oo goobjoog ahaa habeenkii calanka la saarayay.

"Taariikhada Soomaaliya waa mid dheer oo aan shalay iyo maanta billaaban, dad badan ayaa isku dayay inay marin habaabiyaan taariikhada Soomalaiya, laakiin Soomaalida waxaa lagu tiriyaa dadka ugu taariikhda dheer ee adduunka" ayuu yiri madaxweyne Sheekh Shariif.

Madaxweynuhu wuxuu xusay in jiritaanka Jirtaanka Soomaaliya ay ka tarjumayso luuqadda, taariikhda iyo fanka ay xambaarsan yihiin dadka Soomaaliyeed, wuxuuna xusay in dadka Soomaaliyeed looga baahan yahay inay iska ilaaliyaan khaladaadka ayna dib dalkooda u dhisaan.

"Sida la ogyahay dowladnimada laguma helin baryo, kala qaybsanaan iyo inay dadku dhabarka isku dhaggan yihiin, laakiin waxaa lagu helay fikrad mideysan iyo Soomaali oo hal hadaf leh, taasaana keentay in lagu guuleysto," ayuu yiri Sheekh Shariif.

Madaxweynuhu wuxuu shacabka Soomaaliyeed ugu baaqay inay iska illoobaan wixii dhexmaray ayna hadda wixii ka dambeeya u jeestaan sidii ay dalkooda u horumarin lahaayeen, maadaama ay yihiin kuwa ay saaran tahay mas'uuliyadda maanta.

"Xorriyadii kaddib wax badan ayaa dhacay, himiladii ummaddu lahayd wax badan oo la rabay inay hirgalaan ayaan hirgelin, maanta innaga ayaa joogna oo mas'uuliyaddu na saaran tahay, waxaan hubaa taariikhdu inay wax badan na bartay, haddaan midowno oo aan ka gudubno khilaafaadka iyo waxyaabaha yaryar ee dadka lagu mashquuliyo oo aan ujeesanno ummadnimo waxaan hubaa inaan noqonayso dadka ugu fiican dunida," ayuu madaxweynaha Soomaaliya ku sheegay khubaddiisa.

Sidoo kale, madaxweynuhu wuxuu sheegay in ciidamada AMISOM, Itoobiya iyo kuwa Kenya ay dowladda Soomaaliya gacan ka siinayaan sidii ay uga bixi lahayd dhibka, isagoo sheegay in abaalkaas ay u gudi doonaan.

"Soomaaliya maanta caafimaadkeeda waa soo laabtay, cid walba oo gacan siisayna waa ku mahadsan tahay, waxaan rabaa inuusan khalad kale dhicin oo aan jidka laga habaabin, waxaa saxda ah waa dowladnimo waana mid aan shirko ku nahay," ayuu Sheekh Shariif yiri mar kale.

Mar uu ka hadlay arrimaha dastuurka ayuu sheegay in dastuurka hadda la qoray uu ku soconayo wax ka badal muddada afarta sano ee soo socota, isagoo xusay inaan khalad laga waayi karin wax bani'aadam sameeyay, laakiin la ogaado in duruuf adag lagu qoray.

"Haddii ay noo suurogalaan waxyaabaha aan rajeynayno oo aan helno dowlad sax ah, waxaa dastuurkan la horgeyn doonnaa baarlamaanka oo wax ka bedeli doona inta looga ansixinayo afti dadweyne," ayuu madaxweynuhu yiri.

Dhanka kale; madaxweynaha Soomaaliya wuxuu ammaan ballaaran u jeediyay ciidamada DKMG ah oo uu sheegay inay guulo la taaban karo ku tallaabsadeen sannadkan ayna deegaanno badan ka qabsadeen Al-shabaab.

"Waxaa jira qaar ciidamada ka mid ah oo magacooda iyo sumcadooda ku ciyaara si xal loogu helo waxay dowladdu qaaday tallaabooyin waxaana xabsiyada ku jira hadda askar maxkamad sugayaal ah, waxaana hari doona kuwa wanaagsan," ayuu yiri madaxweynaha oo ka hadlayay ciidamada dowladda ee shacabka dhibaateeya.

Xubnihii kale ee goobta ka hadlay ayaa waxay iyaguna si qoto dheer uga hadleen sida lagu helay xorriyaddda muddo hadda laga joogo 52-sano, waxayna qaarkood sheegeen inay joogeen habeenkii calanka la saarayay, inkastoo ay sheegeen inay dhaceen dhibaatooyin badan lagana gudbi doono.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
7/1/2012 5:05 PM EST
Axad, July 01, 2012(HOL): Xulka Spain ayaa markii 2aad ku guuleystay koobka qaaradda Yurub kaddib markii uu 4—0 ku dhuftay xulka Italy oo rajo ka qabay in uu koobkan hanto.

7/1/2012 4:16 PM EST
Axad, July 01, 2012(HOL): Xaflad lagu maamuusayay 52 guuradii ka soo wareegatay markii ay Gobollada Koofureed ee Soomaaliya ay xornimada ka qaadeen gumeystihii Talyaaniga, sidoo kale ay midoobeen gobollada Waqooyi iyo Koofur ee Soomaaliya ayaa maanta lagu qabtay magaalada Eskilstuna ee dalka Sweden.

7/1/2012 8:38 AM EST
Axad, July 01, 2012 (HOL) — Munaabasad lagu xusayay 1-da Luuliyo ayaa maanta ka dhacday garoonka kubadda cagta ee Banaadir, kaasoo ay ka qaybgaleen madax ka tirsan dowladda KMG ah oo uu ku jiray madaxweynaha iyo kumannaan dadweyne ah.

7/1/2012 8:34 AM EST
Axad, July 01, 2012 (HOL) — Kooxo hubeysan ayaa xalay waqooyiga degmada Gaalkacyo ee gobolka Mudug ku toogtay xeer ilaaliyihii maxkamadda gobolka ee maamulka Puntland, Bashiir Cabdi Maxamed oo ku magac-dheeraa Garas.

7/1/2012 7:35 AM EST
Boqollaal Soomaali ah ayaa xalay isugu tagay gurigii hore ee safaarada Soomaalida ee magaalada Nairobi, halkaasoo ay isugu yimaadeen qaar kamid madaxda qaranka.

7/1/2012 7:33 AM EST
Axad, July 01, 2012 (HOL) — Xarakada Al-shabaab ayaa sheegatay inay weerar ka dhacay deegaanka Lafoole ee duleedka Muqdisho ku dishay taliyihii ciidamada DKMG ah ee deegaankaas oo u dhexeeya Muqdisho iyo Afgooye.

7/1/2012 7:14 AM EST
Axad, July 01, 2012 (HOL) — Ugu yaraan 15-qof oo laba sarkaal oo booliiska Kenya ka tirsan ay ku jireen ayaa ku dhintay, 50-ruux oo kalena way ku dhaawacmeen weerarro lagu qaaday lagu weeraray laba kaniisadood oo ku yaalla magaalada Gaarisa ee gobolka Waqooyi-bari ee dalka Kenya.

7/1/2012 7:08 AM EST
Axad, July 01, 2012 (HOL) — Dhowr sano kadib waxaa xalay lagu qabtay magaalada Beledweyne ee xarunta gobollka Hiiraan munaasabad lagu maamuusayay 1-Luulyo oo ku beegan 1960-kii, maanta oo kale waqtigii ay ka xuroobeen gobollada Koonfurta Soomaaliya gumeystihii Talyaaniga iyo is raacii labada gobol Koonfur iyo Waqooyi.

7/1/2012 5:57 AM EST
Axad, July 01, 2012 (HOL) — Madaxweynaha Somaliland Mudane: Axmed Maxamed Maxamuud (Siillaanyo), ayaa kulan kula yeeshay hotelka uu ka degan yahay ee magaaladda Dubia hogaamiyihii SSC ee Sool, Sanaag iyo Cayn.

7/1/2012 5:55 AM EST
Axad, July 01, 2012 (HOL) — Ciidmaada dowladda KMG oo kaashanaya kuwa Raaskaambooni iyo Xoogagga Al-shabaab ayaa xalay ku dagaalamay deegaanka Qooqaani oo hoostaga Degmada Afmadow, iyadoona dagaalkaasi uu sababay khasaarooyin kala gaaray labada dhinac.

7/1/2012 4:07 AM EST
Axad, July 01, 2012 (HOL) — Wararka aynu ka heleyno magaalada Garisa ayaa sheegaya in goordhow qarax xooggan uu ka dhacay goob kaniisad ah oo ay ku sugnaayeen dadweeyne fara badan, iyadoona la sheegay in qaraxu sababay khasaarooyin lixaad leh.

7/1/2012 4:00 AM EST
Axad, July 01, 2012 (HOL) — Munaasabado lagu xusayay sannad-guuradii 52-aad ee kasoo wareegtay markii ay gobollada Koonfureed xoriyaddooda ka qaateen dalka Talyaaniga ayna midoobeen gobollada Koonfureed iyo waqooyi ee Soomaaliya ayaa xalay ka dhacay gobollada dalka qaarkood.

7/1/2012 3:34 AM EST
Axad, July 01, 2012 (HOL) — Wasiirka arrimaha dibadda ee dalka Yemen Abubakar Cabdalla Al-Qarbi ayaa ka guddoomaya waqadihii aqoonsiga danjirenimo qunsulka guud ee dowladda Soomaaliya u magacowday magaalada Cadan, Axmed Cabdi Xasan (Axmed Suudaan) kaddib kulan uu kula qaatay wasiirka oo ka dhacay Sanca.