6/30/2022
Today from Hiiraan Online:  _
Wararka Maanta- Khamiis, Dec 20, 2012
Faahfaahin dheeraad ah oo ku saabsan laba Qarax oo xalay gilgilay Xaafadda Islii [Eastleigh] ee Magaalada Nairobi
Khamiis, December 20, 2012 (HOL) — Ugu yaraan hal qof ayaa ku dhintay saddex kalena dhaawacyo kala duwan ayaa kasoo gaaray qaraxyo xalay ka dhacay Islii oo ka tirsan xaafadaha magaalada Nairobi ee dalka Kenya, halkaaso ay deggen yihiin Soomaalida ku nool xarunta Kenya.

Qaraxyadan oo laba ahaa ayaa loo adeegsaday bambooyinka gacanta laga tuuro iyadoo lala beegsaday masaajid ay dad badan ku tukanayeen oo ku yaalla xaafadda Islii, sida ay sheegayaan goobjoogayaal ku sugan xaafaddaas.

"Weerarradu waxay ahaayeen kuwo loo adeegsaday bambooyinka gacanta laga tuuro, kuwaasoo si weyn looga maqlay magaalada Nairobi. Bambooyinku waxay ku dhaceen afaafka hore ee masaajidka Al-Amiin oo xaafadda Islii ku yaalla," ayuu yiri goobjooge ku sugan Nairobi.

Goobjoogahan ayaa sheegay inuu arkay dhimashada hal qof iyo dhaawaca saddex kale oo la saarayo gaadiidka caafimaadka ee loo yaqaan Ambalaasta, isagoo xusay in markii ay qaraxyadu dhaceen uu isgaartay ganacsiga iyo isku socodka dadka iyo gaadiidka.

Inkastoo xaaladdu ay tahay saakay mid deggen haddana xaafadda Islii waxaa ku sugan ciidammo fara badan oo Kenya ah, kuwaasoo baaritaanno ku sameynaya guryaha ku yaalla xaafaddaas.

Bartamihii bishan ayay ahayd markii bambooyin lagu weeraray dhowr goobood oo ku yaalla Nairobi, kuwaasoo uu ku jiray masjidka Al-Hidaaya iyadoo dadkii weerarkaas ku dhaawacmay uu ku jiray xidhibaan Yuusuf Xasan oo laga soo doorto degmada Kaamakuunji oo ay Islii ku jirto.

Illaa hadda booliiska Kenya cidna kuma eedeyn qaraxyadii xalay ka dhacay Nairobi, sidoo kalena ma jirto cid sheegatay inay mas'uul ka tahay, waxaase inta badan ay xukuumadda Kenya ku eedeysaa qaraxyada dhaca Xarakada Al-shabaab oo gudaha Soomaaliya ka dagaalanta.

Dhanka kale, dad badan oo Soomaali ah ayaa ka cararay magaalada Nairobi kaddib amar kasoo baxay xukuumadda Kenya oo ahaa in qoxootigu ay ku laabtaan xeryaha, taasoo keentay in dadka intooda badan ka dhoofaan Nairobi oo ay hanti badan ku lahaayeen.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/20/2012 3:03 PM EST
Khamiis, 20, 12 2012 (HOL) Saddex ruux ayaa lagu toogtay oo geeriyootay labo dhacdo oo kala duwan caawa gudaha degmada Gaarisa ee Xarunta gobolka Waqooyi Bari, sida ay xaqiijinayaan dad ku dhaqan deegaanka Gaarisa.

12/20/2012 9:51 AM EST
Khamiis, December, 20, 2012 (HOL) – Abaartii sanad hore ku dhufatay qeybo ka mid ah gobollka Hiiraan waxaa la oran karaa saameynta ugu darran waxaa ay ku reebtay dadka reer miyiga ah, gaar ahaa qoysaska ay nolashooda ku tiirsaneyd dhaqashada xoolaha kuwaasoo ku soo dhacay gacmo maran kadib markii ay dhaafeen duunyo wixii ay dhaqanayeen.

12/20/2012 9:38 AM EST
Khamiis, December 20, 2012 (HOL) —Israsaaseyn xooggan ayaa gudaha magaalada Kismaayo ku dhexmartay kooxo hubeysan oo jidgooyo dhigtay xaafadda V-afmadow ee magaalada Kismaayo iyo ciidamada ammaanka degmadaasi.

12/20/2012 9:10 AM EST
Khamiis, December 20, 2012 (HOL) —Munaasabad heersare loo soo agaasimay islamarkaasina lagu xusay maalintii la aasaasay ciidamada Booliska Soomaaliyeed ayaa waxa ay maanta ka dhacay kuliyadda Jeneraal Kaahiye, iyadoona munaasabadda maanta ay ahayd mid siheersare ah loosoo agaasimay.

12/20/2012 8:14 AM EST
Khamiis, December 20, 2012 (HOL) — Madaxweynaha dowlada federaalka Soomaaliya, Xasan Sheekh Maxamuud ayaa maanta xafiiskiisa Muqdisho kula kulmay wasiirka horumarinta dowladda Norway, Heikki Holmas iyadoo kulanka uu goobjoog ka ahaa safiirka Nowray ee Soomaaliya iyo saraakiil ka tirsan Villa Soomaaliya.

12/20/2012 7:58 AM EST
Khamiis, December 20, 2012 (HOL) — Taliska ciidamada Booliska Puntland ee gobolka Mudug ayaa ka warbixiyey qaraxyo xalay ka dhacay magaalada Gaalkacayo iyo howlgal ay ciidamadu sameeyeen oo dad lagu soo qabtay.

12/20/2012 7:57 AM EST
Khamiis, December 20, 2012 (HOL) — Wasiiradda maaliyadda East Timor, Emelia Pires ayaa booqasho ku timid maanta magaalada Muqdisho, iyadoo la kulantay madaxweynaha Somalia iyo wasiirka maaliyadda, Maxamuud Xasan Suleymaan, waxayna kala hadashay xiriirka labada dal iyo sidii uu iskaashi u dhexmari lahaa wasaaradaha maaliyadda labada dal.

12/20/2012 7:44 AM EST
Khamiis, December 20, 2012 (HOL)- Munaasabad ballaaran oo lagu xusayey sanadguuradii 69-aad ee kasoo wareegtey xilligii dhidibada loo taagey ciidamada Booliska Soomaaliyeed, ayaa maanta ka dhacday xarunta wasaaradda amniga Puntland ee magaalada Boosaaso.

12/20/2012 7:35 AM EST
Khamiis, December 20, 2012 (HOL) — Guddidda doorashooyinka Somaliland, ayaa waxba kama jiraan ku tilmaamay eeddo loosoo jeediyey, kuwaas oo la sheegay inay doorashadii ay qabteen guddidu ay musuqmaasuq badani ka jirtay.

12/20/2012 7:32 AM EST
Khamiis, December 20, 2012 (HOL) — Saraakiisha ciidamada Jabuuti ee howlgalka midowgga Africa AMISOM ayaa sheegay in ay wadaan qorshe howlgalkooda ku gaarsiinayaan demooyinka iyo deegaannada gobollka Hiiraan uu ka kooban yahay

12/20/2012 1:19 AM EST
Khamiis, December 20, 2012 (HOL) — Sarkaal ka tirsan booliiska Kenya ayaa la dilay laba kalena dhaawacyo ayaa loo geystay, kaddib markii kooxo hubeysan ay xalay weerar ku qaadeen gaari ay wateen ciidamadan oo marayay bartamaha magaalada Nairobi ee xarunta Kenya.

12/20/2012 1:06 AM EST
Khamiis, December 20, 2012 (HOL) — Wasiirka arrimaha gudaha Soomaaliya, C/kariin Xuseen Guuleed ayaa si rasmi ah u sheegay in wasaaradda arrimaha gudaha ay isbedel ku sameyn doono maamullada gobollada iyo kuwa degmooyinka ee aysan ku qanasanayn shacabka ay maamulaan.