6/25/2022
Today from Hiiraan Online:  _
Wararka Maanta- Arbaco, Dec 19, 2012
UNHCR iyo Xukuumadda KENYA oo Isku Afgartay in Qaxootiga Soomaalidu ay Tagaan Xeryaha Kakuma ama Dadaab

Arboco, December 19, 2012 (HOL) - Kadib qaraxyo iyo weeraro is xigxigay oo ka dhacay xaafadda Islii ee ay Soomaalida ugu badan ka deggan tahay Nairobi caasimadda dalka Kenya ayaa waxay Hay'adda qaxootiga u qaabilsan qaramada midoobay ee UNHCR iyo dowladda Kenya ay isku waafaqeen in Qaxootiga Soomalaida ee ku sugan magaalooyinka kala duwan ee Kenya ay iska xaadiriyaan xeryaha Qaxootiga ee Kakuma ama Dadaab.

Caawa fiidkii waxaa inta badan dadka heysta Mandate-ka UNHCR ee ku nool magaalooyinka Waaweyn ee ay Nairobi ugu horeyso ay fariimaha SMS-ka ku ogeysiinayeen in UNHCR iyo hay'adda Kenya u qaabilsan qaxootiga ee DRA ay isku afgarteen in dadka qaxootiga ah iyo dhamaan dadka doonaya magan galyada looga baahan yahay iney iska xaadiriyaan xeryaha Qaxootiga ee Dadaab iyo Kaakuma.

13-kii bishan Dec ayay ahayd markii hay'adda DRA oo ah laanta Kenya u qaabilsan umuuraha Qaxootiga ay ku wargelisay UNHCR iyo dhamaan hay'adaha kale ee u dooda arimaha qaxootiga iney joojiyaan diiwaan gelinta qaxootiga ku nool magaalooyinka, iyagoona laga codsaday in qaxootiga Soomaalida ay u daabulaan xeryaha Qaxootiga ee Kenya ee ku kala yaalla Kaakuma iyo Dadaab.

“Waxaan soo gabagabeynaynaa qaxootiga ku nool magaalooyinka, taasoo ay ku xigi doonto inaan qaxooti badan dib ugu celino Soomaaliya” sidaasi waxaa sheegtay Sora Katelo, oo ah madaxa laanta DRA ee Kenya u qaabilsan umuuraha qaxootiga.

Katelo waxay intaasi raacisay iney joojinayaan bixinta dukumintiyada qaxootiga iyadooona dukumintiyada qaxootiga ee horay loo bixiyay aanay ka shaqeyn doonin magaalooyinka waaweyn ee kaliya ay ka shaqeyn doonaan xeryaha qaxootiga Kenya.

Dad badan oo ay Hiiraan Online xiriir la sameysay ayaa xaqiijiyay in caawa lasoo gaarsiiyay fariimo uga imaanayay UNHCR hay'adda qaxootiga u qaabilsan qaramada midoobay taasoo qaxootiga lagu ogeysiinayay iney iska xaadiriyaan Kakuma amase Dadaab, balse UNHCR waxay sheegtay in weli ay u socdaan wada tashiyo dhex maraya UNHCR iyo dowladda Kenya si go'aankani wax looga baddello.

700,000 Soomaaliya ayaa Kenya Qaxooti ku ah

Qaxooti aad u farabadan oo isugu jira kuwo ku nool magaalooyinka waaweyn iyo sidoo kale kuwo deggan xerada Qaxootiga ugu weyn caalamka ee Dadaab oo hooy u ah in kabadan 500,000 oo Qaxootiya ayaa ku sugan Dalka Kenya waxaana ay tirada ugu badan ku sugan yihiin gobolka Waqooyi bari Kenya, iyadoo sidoo kalena ay ku nool yihiin xerada Kakuma ee waqooyi galbeed Kenya.

Xerada Dadaab ee uu tankeedu dhaafay intii loogu tallo galay ayaa ka kooban xeryaha Ifo, Dhagaxleey iyo Xagardheere kuwaasi oo ay aad u adag tahay noloshooda, waxaana sidoo kale ka dhaca weeraro qorsheysan iyo qarxyo maadaama ay xeradu ku taallo xadka ay wadaagaan Kenya iyo Soomaaliya.

Ururada caalamiga ah ee u dooda xuquuqda qaxootiga ayaa Kenya ku eedaynaya iney ka horimaaneyso heshiisyadii Qaramada Midoobay ee ku aadanaa arimaha Qaxootiga ku sugan dalkeeda, waxaana muuqata in dadkani ay dowladda la tashanayeen tan iyo jimcadii lasoo dhaafay ay weli isku dhaafi weysan yihiin, iyadoo xukuumadda Kenya ay ku adkeysanayso in Qaxootigu Soomaalidu ay tagaan Xeryaha Kaakuma ama Dadaab.

Siyaasadda Kenya ee ku aaddan arimaha Qaxootiga ayaa sheegaysa in dhamaan Dadka Qaxootiga ah ay iska xaadiriyaan xeryaha qaxootiga balse Kumanaan u badan Soomaalida qaxootiga ku ah Kenya ayaa deggan magaalooyinka Nairobi, Garissa iyo Mombasa, waxayna tilaabadan horseedi kartaa in kumanaan Soomaaliya ay dib ugu laabtaan Dalkooda amaba ay ku biiraan xeryaha Qaxootiga ee Kakuma iyo Dadaab.

Cabdiqafaar Shire
Hiiraan Online
Nairobi, Kenya













Click here
12/19/2012 8:33 AM EST
Arbaco, December 19, 2012 (HOL) — Markab la yiraahdo MV Daesan oo waddanka waqooyiga Kuuriya laga leeyahay oo 18-kii bishii hore ee November ay ciidamada badda Puntland kasoo qabteen meel dhowr iyo toban mayl u jirta Boosaaso xilli uu badda sibir (Shimiito) ku daadinayay ayaa lala baxsaday.

12/19/2012 8:19 AM EST
Arbaco, December 19, 2012 (HOL) — Madaxweynaha Soomaaliya, Xasan Sheekh Maxamuud ayaa maanta ku qaabilay madaxtooyada Soomaaliya ergayga gaarka ah ee Qaramada Middobay u qaabilsan arrimaah Soomaaliya danjire, Augustine Mahiga.

12/19/2012 8:05 AM EST
Arbaco, December 19, 2012 (HOL) — Dowladda Puntland ayaa si kulul uga jawaabtey eedeymo dhowr ah oo uu maanta u jeediyey Jen. Cabdullaahi Siciid Samatar oo ah siyaasi horay xilal kala duwan uga soo qabtay Puntland, dhowaanna shaaciyey in uu yahay musharrax u taagan xilka madaxweyne-nimada.

12/19/2012 8:01 AM EST
Arbaco, December 19, 2012 (HOL) — Hay'adda qoxootiga adduunka ee UNHCR ayaa sheegtay inay sii wadayso diiwaan-gelinta qoxootiga ku nool magaalooyinka Kenya, iyadoo dowladda Kenya ay dhawaan sheegtay inay xirtay xafiisyadii lagu diiwaan-gelin jiray qoxootiga.

12/19/2012 7:45 AM EST
Arbaco, December 19, 2012 (HOL) — Jen. Cabdilaahi Siciid Samatar oo ah siyaasi horay xilal kala duwan uga soo qabtay Puntland, dhawaanna sheegay inuu yahay musharrax u taagan xilka madaxtinimada ee Puntland ayaa waraysi uu maanta oo Arbaca ah bixiyay kaga hadlay arrimo badan.

12/19/2012 7:29 AM EST
Arbaco, December 19, 2012 (HOL) — Askari ka tirsan ciidamada dowladda Somalia ayaa baqonimadii maanta ku dhaawacay afaafka hore ee madaxtooyada sarkaal ka tirsanaa xarunta madaxtooyada, iyadoo askariga uu markiiba goobta ka baxsaday.

12/19/2012 7:05 AM EST
Arbaco, December 19, 2012 (HOL) — Kooxo hubeysan oo la sheegay inay wateen mootooyin ayaa maanta barqonimadii ku toogtay magaalada daarusalaam ganacsade Soomaali ah, iyagoo ka dhacay lacago fara badan oo uu watay.

12/19/2012 5:59 AM EST
Arbaco, December, 19, 2012 (HOL) – Xilli xaalado nolaleed oo aad u liita ay soo food saareen kumanaan qoysas ah oo bishii September ka barakacay fatahadii ku dhuftaay magaalada Baladweyne, ayaa dhinaca kale waxaa soo baxaya in la la lunsaday lacago malaayiin doolar ah oo ay hay’addaha safamalka ugu talagaleen in lagu kaalmeeyo dadka dhibaateysan.

12/19/2012 2:00 AM EST
Arbaco, December 19, 2012 (HOL) — Dowladda Kenya ayaa amar ku siisay qoxootiga Soomaalida ah ee ku nool magaalooyinka Kenya inay dib ugu laabtaan xeryaha qoxootiga, gaar ahaan xeryaha adduunka ugu weyn ee Dhadhaab.

12/19/2012 1:40 AM EST
Arbaco, December 19, 2012 (HOL) — Ciidammo ka tirsan kuwa dowladda Soomaaliya oo tiradooda lagu sheegay in ka badan boqol askari ayaa sameeyay gadood, kuwaasoo sheegay inaysan wax mushaaraad iyo xuquuq ah ka helin dowladda Soomaaliya muddo bilooyin ah.