6/27/2022
Today from Hiiraan Online:  _
Wararka Maanta- Arbaco, Dec 19, 2012
Guddoonka Baarlamaanka Maamulka Puntland oo iska Foogeeyey Eedeynta Jen. Cabdilaahi Siciid Samatar
Arbaco, December 19, 2012 (HOL) — Dowladda Puntland ayaa si kulul uga jawaabtey eedeymo dhowr ah oo uu maanta u jeediyey Jen. Cabdullaahi Siciid Samatar oo ah siyaasi horay xilal kala duwan uga soo qabtay Puntland, dhowaanna shaaciyey in uu yahay musharrax u taagan xilka madaxweyne-nimada.

Gudoomiye ku-xigeenka golaha wakiillada Puntland Salaad Xareed Cali oo warbaahinta gudaha la hadlay, ayaa sheegay in eedeymaha xukuumadda loosoo jeediyey ay yihiin kuwo aan xaqiiqada ku saleysneyn, si gaar ah wuxuu uga hadlay sharciyadda golaha Baarlamaanka.

Wuxuuna tilmaamay in Baarlamaanku uu wakhti iyo dadaal badan geliyey sidii nidaamka maamul ee Puntland looga dhigi lahaa mid dadka oo dhan u faran, loogana guuri lahaa habkii hore ee madaxda lagu soo dooran jirey, sharcinimada sii shaqeynta goluhuna ay tahay mid Dastuurka ku lifaaqan, Isimada iyo waxgaradkuna ay ogyihiin, raalina ka yihiin.

"Anaga xiligeenu wuxu ku lifaaqan yahay Dastuurka, waxaana naga go'an in aan Puntland gaarsiino hanaan Dimuqraadiyadeed oo buuxa, taasna Isimada ayaa laga ansixiyey oo raali ka ah" Gudoomiye ku-xigeenka Baarlamaanka Puntland ayaa yiri.

Mudane Xareed ayaa ugu danbeyntii sheegay in Golahu uu ka turjumayo rabitaanka shacabka, wax aan danta bulshadu ku jirinna aysan sina u aqbali doonin: " Nin intuu dibadda ka yimid leh sidii hore ha laygu doorto, oo aan eegeyn rabitaanka shacabka, waxan u sheegeynaa in aysan taasi socon doonin, maadaama ay tahay wax laysla wada arkay, haybadda Baarlamaankana hoos u dhigtay"

Hadalka Gudoomiye ku-xigeenka golaha Baarlamaanka Puntland ayaa yimid, kaddib markii isla maanta uu Musharrax Gen. Cabdilaahi Siciid Samatar - oo ah siyaasi horay Puntland xilal uga soo qabtay- uu sheegay in Baarlamaanka uu wakhtigu ka dhacay ayna tahay in laka diro.

Maxamed Salaad Xaaji Dirir, Hiiraan Online
[email protected]
Puntland, Soomaaliya











Click here
12/19/2012 3:02 PM EST
Arboco, December 19, 2012 (HOL) - Kadib qaraxyo iyo weeraro is xigxigay oo ka dhacay xaafadda Islii ee ay Soomaalida ugu badan ka deggan tahay Nairobi caasimadda dalka Kenya ayaa waxay Hay'adda qaxootiga u qaabilsan qaramada midoobay ee UNHCR iyo dowladda Kenya ay isku waafaqeen in Qaxootiga Soomalaida ee ku sugan magaalooyinka kala duwan ee Kenya ay iska xaadiriyaan xeryaha Qaxootiga ee Kakuma ama Dadaab.

12/19/2012 8:33 AM EST
Arbaco, December 19, 2012 (HOL) — Markab la yiraahdo MV Daesan oo waddanka waqooyiga Kuuriya laga leeyahay oo 18-kii bishii hore ee November ay ciidamada badda Puntland kasoo qabteen meel dhowr iyo toban mayl u jirta Boosaaso xilli uu badda sibir (Shimiito) ku daadinayay ayaa lala baxsaday.

12/19/2012 8:19 AM EST
Arbaco, December 19, 2012 (HOL) — Madaxweynaha Soomaaliya, Xasan Sheekh Maxamuud ayaa maanta ku qaabilay madaxtooyada Soomaaliya ergayga gaarka ah ee Qaramada Middobay u qaabilsan arrimaah Soomaaliya danjire, Augustine Mahiga.

12/19/2012 8:01 AM EST
Arbaco, December 19, 2012 (HOL) — Hay'adda qoxootiga adduunka ee UNHCR ayaa sheegtay inay sii wadayso diiwaan-gelinta qoxootiga ku nool magaalooyinka Kenya, iyadoo dowladda Kenya ay dhawaan sheegtay inay xirtay xafiisyadii lagu diiwaan-gelin jiray qoxootiga.

12/19/2012 7:45 AM EST
Arbaco, December 19, 2012 (HOL) — Jen. Cabdilaahi Siciid Samatar oo ah siyaasi horay xilal kala duwan uga soo qabtay Puntland, dhawaanna sheegay inuu yahay musharrax u taagan xilka madaxtinimada ee Puntland ayaa waraysi uu maanta oo Arbaca ah bixiyay kaga hadlay arrimo badan.

12/19/2012 7:29 AM EST
Arbaco, December 19, 2012 (HOL) — Askari ka tirsan ciidamada dowladda Somalia ayaa baqonimadii maanta ku dhaawacay afaafka hore ee madaxtooyada sarkaal ka tirsanaa xarunta madaxtooyada, iyadoo askariga uu markiiba goobta ka baxsaday.

12/19/2012 7:05 AM EST
Arbaco, December 19, 2012 (HOL) — Kooxo hubeysan oo la sheegay inay wateen mootooyin ayaa maanta barqonimadii ku toogtay magaalada daarusalaam ganacsade Soomaali ah, iyagoo ka dhacay lacago fara badan oo uu watay.

12/19/2012 5:59 AM EST
Arbaco, December, 19, 2012 (HOL) – Xilli xaalado nolaleed oo aad u liita ay soo food saareen kumanaan qoysas ah oo bishii September ka barakacay fatahadii ku dhuftaay magaalada Baladweyne, ayaa dhinaca kale waxaa soo baxaya in la la lunsaday lacago malaayiin doolar ah oo ay hay’addaha safamalka ugu talagaleen in lagu kaalmeeyo dadka dhibaateysan.

12/19/2012 2:00 AM EST
Arbaco, December 19, 2012 (HOL) — Dowladda Kenya ayaa amar ku siisay qoxootiga Soomaalida ah ee ku nool magaalooyinka Kenya inay dib ugu laabtaan xeryaha qoxootiga, gaar ahaan xeryaha adduunka ugu weyn ee Dhadhaab.

12/19/2012 1:40 AM EST
Arbaco, December 19, 2012 (HOL) — Ciidammo ka tirsan kuwa dowladda Soomaaliya oo tiradooda lagu sheegay in ka badan boqol askari ayaa sameeyay gadood, kuwaasoo sheegay inaysan wax mushaaraad iyo xuquuq ah ka helin dowladda Soomaaliya muddo bilooyin ah.