11/28/2021
Today from Hiiraan Online:  _
Wararka Maanta- Khamiis, Aug 9 , 2012
Ra'iisul wasaarihii hore ee Soomaaliya oo Magaalada Muqdisho kusoo laabtay iyo Dibadbaxyo lagu taageerayo oo socda


Khamiis, Ogoosto 09, 2012 (HOL) — Ra'iisul wasaarihii hore ee Soomaaliya, Maxamed Cabdullaahi Farmaajo ayaa saakay dib ugu soo laabtay magaalada Muqdisho tan iyo markii uu xilka iska casilay sannadkii hore, isagoo ka mid ah murashaxiinta u tartamaya doorashada madxnimo ee dalka.

Dadweyne fara badan oo wata sawirkiisa iyo calanka Soomaaliya ayaa kusoo dhaweeyay garoonka diyaradaha Muqdisho ee Aaadan Cadde, iyadoo sidoo kalena ay magaalada ka dhaceen dibadbaxyo lagu taageerayo imaanshihiisa, kuwaasoo ay dhigayaan qaybaha kala duwan ee bulshada.

"Halkan waxaan u imid inaan ka qaybgalo doorashada madaxnimo oo dhici doona 10-maalmood gudahood, waxaana u mahad-celinayaa dadka sida diirran ee sharafta badan iigu soo dhaweeyay Muqdisho iyo ciidamada dowladda oo geesinimadooda muujiyay si uga hortageen kuwa nabadda diiddan iyo odayaasha dhaqanka oo aan uga mahadcelinayo xulista ergadii ansixintay dastuurka KMG ah," ayuu yiri Farmaajo oo saxaafadda la hadlay.

Ra'iisul wasaariii hore wuxuu sheegay in haddii madaxweyne loo doorto uu wax ka qaban doono ammaanka, dib u heshiisiinta iyo arrimo horumarinta dalka, isagoo xusay inuu ku kalsoon yahay in loo dooran doono xilka madaxnimo ee Soomaaliya.


Dadweynaha soo dhaweeyay ayaa waxay ku qaylinayeen erayo ay ka mid yihiin [Farmaajo soo dhawoow, dalka iyo dadka ayaa kuu baahasn iyo erayo kale] dadweynahan ayaa waxay ka yimaadeen degmooyinka kala duwan ee gobolka Banaadir, waxaan sidoo kale ka mid ah qaybaha sida aadka ah u taageersan ciidamada kala duwan ee dowladda KMG ah, kuwaasoo gaadiidka ay wataan ay ku dhajiyeen sawirka Farmaajo.

Mid ka mid ah dibadbaxayaashii taageerayay imaanshihiisa oo hadlay ayaa isaguna yiri: "Farmaajo waa Soomaali asal ah, waayo wuxuu kasbaday kalsoonida shacabka, sidaa daraadeed waxaan leennahay soo dhawow."

Magaalada Muqdisho ayaa waxaa si weyn looga dareemayaa ololaha loogu jiro ka qaybgalka doorashooyinka madaxnimo ee dalka, waxaana inta badan ololayaashaas ka dhigaya caasimadda xubnaha ugu sarreeya dalka oo musharraxiin ah.

Maxamed Farmaajo ayaa wuxuu odayaasha dhaqanka ugu baaqay inay ka shaqeeyaan danta dalka iyo dadka Soomaaliyeed ayna soo doortaan hoggaamiye wax ka qaban kara xaaladda uu dalku ku jiro.

Ra'iisul wasaarihii hore ee Soomaaliya ayaa isku casilay 19-Juun-2011 heshiis ay ku qaybsanayeen awood oo 06-Juun,2011 ay madaxweyaha DKMG ah, Shariif Sheekh iyo guddoomiyaha baarlamaanka, Shariif Xasan ku kala saxiixdeen xarunta dalka Uganda ee Kampala.

dhawayn2 (2).jpg








dhawayn4 (1).jpg

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/9/2012 8:19 PM EST
Jimco, August 10, 2012-Kulan ay guddiga amniga qaranka maanta ku yeesheen xarunta madaxtooyada oo uu shir guddoominayay madaxweynaha dowladda Soomaaliya mudane Shariif Sheekh Axmed ayaa laga soo saarat go’aanno ku saabsan ammaanka dalka iyo marxaladda dalku marayo.

8/9/2012 10:34 AM EST
Khamiis, Ogoosto 09, 2012 (HOL) — Warsaxaafadeed ay soo saareen 13-murashax oo ka mid ah kuwa u taagan xilka madaxnimo ee Soomaaliya ayaa waxay kusoo ban-dhigeen inay ku dhiseen isbahaysi ay ugu magacdareen isbahaysiga isbedel-doonka Qaranka, iyagoo sheegay inay hal xubin u dooran doonaan ka qaybgala doorashada dhacaysa 20-ka bishan.

8/9/2012 9:31 AM EST
Khamiis, Ogoosto 09, 2012 (HOL) — Hal qof oo rayid ah ayaa ku dhintay rasaas ay fureen ciidamada Itoobiya kaddib markii qarax miino saakay ciidamadaas oo howgal ku jira lagula eegtay xaafadda Irid Aamin ee degmada Baladweyne ee gobolka Hiiraan.

8/9/2012 9:31 AM EST
Khamiis, Ogoosto 09, 2012 (HOL) — Ra’iisul wasaaraha DKMG Soomaaliya. Cabdiweli Maxamed Cali ayaa sheegay inay si weyn u adkeyn doonaan ammaanka Muqdisho inta lagu jiro doorashooyinka; isagoo xusay in ciidamada qalabka sida ay diyaar u yihiin xaqiijinta ammaanka goobaha ay doorashooyinku ka dhacayaan.

8/9/2012 9:20 AM EST
Khamiis, Ogoosto 09, 2012 (HOL) — Guddiga farasamada ee xulista xildhibaannada cusub ee Soomaaliya ayaa sheegay inay maalinta berri ah ku dhawaaqi doonaan tirada xildhibaannada ay hayaan, iyadoo ay weli jiraan cabashooyin ku aaddan sida lagu xulay xildhibaannada oo ka imaanaysa beelaha qaarkood.

8/9/2012 8:36 AM EST
Khamiis, Ogoosto 09, 2012 (HOL) — Kulan loogu hadlayay sanad-guuradii koowaad ee kasoo wareegatay markii kooxda Al-Shabaab ay ka baxday Muqdisho ayaa lagu qabtay maanta degmada Wardhiigley ee gobolka Banaadir, waxaana looga hadlay arrimo fara badan oo ay ka mid yihiin waxyaabihii qabsoomay iyo horumarka ay ku tallaabsatay Muqdisho iyo sida loo adkeyn karo ammaanka.

8/9/2012 8:24 AM EST
Khamiis, Ogoosto 09, 2012 (HOL) — Madaxweynaha DKMG Soomaaliya, Shariif Sheekh Axmed ayaa degmooyin cusub ku kordhiyay gobollada Bay iyo Bay, iyadoo lagu shaaciyay magacaabista degmooyinkan wareegto kasoo baxday xafiiska madaxweynaha Soomaaliya

8/9/2012 7:32 AM EST
Soomaalida ayaa sannadihii hore ay ku yaraayeen jilitaanka filimada casriga ah, iyadoo la samayn jiray riwaayado lagu soo bandhigo masraxa oo kaliya.

8/9/2012 7:10 AM EST
Khamiis, Ogoosto 09, 2012 (HOL) — Ugaaska beesha Cabdalla oo ka mid ah beesha Direed, C/raxmaan Xaaji Xuseen Ibrahim kana mid ah 135-oday dhaqameed ee soo xulay ergadii ansixisay dastuurka ayaa sheegay in lagu diiday xildhibaanno uu u xulay inay ka mid noqdaan baarlamaanka soo socoda ee Soomaaliya.

8/9/2012 7:00 AM EST
Khamiis, Ogoosto 09, 2012 (HOL) — Ugu yaraan laba qof oo mid ka mid ah uu ahaa askari ayaa ku dhintay rasaas ay ciidammo ka tirsan DKMG ku fureen dad dhigayay dibadbax ay ku taageerayaan imaanshaha ra'iisul wasaarihii hore ee Soomaaliya, iyadoo ay rasaastaas ku dhaawacmeen saddex qof oo kale.

8/9/2012 5:02 AM EST
Khamiis, Ogoosto 09, 2012 (HOL) — Guddoomiye ku xigeenka gobolka Shabeellada dhexe ee dowladda KMG ah, Yuusuf Cabdi Cabdulle ayaa ka badbaaday qarax miino oo xalay fiidkii lagula beegsaday xaafadda Suuqa xoolaha ee degmada Huriwaa ee gobolka Banaadir.

8/9/2012 4:55 AM EST
Khamiis, Ogoosto 09, 2012 (HOL) — Maxkamad ku taalla dalka Kenya ayaa min 20-sano oo xabsi ah ku xukuntay toddoba dhallinyaro Soomaaliyeed ah oo lagu helay dambi burcadbadeednimo, iyadoo xukunkan uu qayb ka yahay dadaalka lagula dagaalamayo burcadbadeedda Soomaaliya.