11/28/2021
Today from Hiiraan Online:  _
Wararka Maanta- Sabti, Aug 4 , 2012
Ra'iisul wasaaraha Soomaaliya oo casho sharaf loogu sameeyay Magaalada Nairobi ee dalka Kenya (DAAWO SAWIRRO)
xaflad11.jpg
Sabti, August 04, 2012 (HOL) - Xaflad casho sharaf ah oo ay soo qabanqaabiyeen gudiga ganacsatada xaafada Islii ayaa Ra'iisul wasaaraha Soomaaliya Cabdi wali Maxamed Cali loogu sameeyay Hoteelka Laico Regency ee magaalada Nairobi.

Waxaana kulankan Ra'iisul wasaaraha ku weheliyay qaar kamid ah golihiisa wasiirrada, iyo dadweyne kale oo kasoo qaybgalay oo isugu jiray ganacsato,siyaasiyiin,odayaal,haween iyo dhalinyaro.

Ugu horrayna waxaa hadalka furay gudoomiyaha gudiga ganacsatada xaafada Islii Xaaji Xassan Guuleed oo hadal uu jeediyay ku ammaanay Ra'iisul wasaaraha, kagana codsaday inuu qabto jagada ugu sarreysa dalka.

"C/wali waxaa uu guulo ka keenay dawladnimada Soomaaliya intii uu ahaa Ra'iisul wasaaraha, haatanna waxaan ka codsanaynaa inuu dalka hogaankiisa ugu sarreeya qabto, si uu u dhammaystiro shaqooyinka harsan" ayuu yiri Xaaji Xassan.

Marwo Faadumo Jibriil oo iyaduna halkaas hadal ka jeedisay ayaa ku dheeraatay in la siiyo xuquuqda ay haweenku ku leeyihiin ka qaybqaadashada hannaanka dawladnimo ee Soomaaliya.

Faadumo Jibriil ayaa sheegtay in C/wali uu door muhiim ah ka ciyaaray qoondayntii 30% kuraasta ah ee haweenka laga siiyay baarlamaanka cusub ee haatan lasoo xulayo.

xaflad.jpg

Qaar kamid golaha xukuumada oo ay kamid ahaayeen wasiirrada ganacsiga,qorshaynta,dastuurka, iyo dib u dhiska oo iyaguna halkaas hadallo ka jeediyay ayaa taageero u muujiyay Ra'iisul wasaaraha Soomaaliya, iyagoo ka codsaday inuu isu taago hanashada hogaanka dalka.

Ra'iisul wasaaraha Soomaaliya C/wali Maxamed Cali oo hadalka soo xiray ayaa jeediyay khudbad dheer oo uu kaga hadlay waxqabadkii xukuumadiisa.

C/wali ayaa sheegay in caqabado adag ay soo wajaheen, balse ay guulo ka gaareen dhammaan dhinacyada ansixinta dastuurka, xiriirka dibada, xoraynta gobollada, dawlad wanaagga iyo waliba tallaabooyinka kale oo badan oo loo qaaday dhanka soo celinta qarannimada Soomaaliya, sida uu yiri..

C/wali si rasmi ah uguma dhawaaqin inuu isu taagayo doorashada ka dhici doonta Soomaaliya, balse waxaa uu sheegay in qabsoomideedu xataa ay noqonayso mid kamid ah guulaha ay ku tillaabsatay xukuumadiisu.

Dhanka kalana Ra'iisul wasaaraha Soomaaliya wuxuu si kulul u weeraray beesha caalamka, waxaana uu sheegay in Soomaaliya aan loo caawin sida loo caawiyay wadamada kale ee ay ka dhaceen dagaallada sokeeye, lana galiyay kumeel gaar uu ku tilmaamay inuu qayb ka ahaa siyaasadaha Soomaaliya lagu hagardaamaynayo.

C/wali ayaa dhanka kalana xaqiijiyay in ay u baahantahay Soomaaliya gacanta beesha caalamka iyo taageeradooda, balse aysan mar naba gorgortan ka gali doonin karaamada iyo madaxbannaanida Soomaaliya.

Hadalka Ra'iisul wasaaraha Soomaaliya ee ku aadanaa beesha caalamka ayaa ahaa kii ugu kululaa ee uu jeediyo tan iyo markii uu xilka qabtay.

xaflad6.jpg
xaflad2.jpg
xaflad12.jpg
xaflad7.jpg
xaflad8.jpg
xaflad9.jpg
xaflad5.jpg
xaflad4.jpg
xaflad3.jpg
xaflad10.jpg

Axmed C/samad, Hiiraan Online
[email protected]
Nairobi , Kenya












Click here
8/4/2012 6:10 PM EST
Sabti, August 04, 2012(HOL): Orodyahanka Mo Farah ayaa caawa taariikh Isboorti oo dhinaca orodka ah sameeyay kaddib markii uu ku guuleystay orodka 10,000 ee mitir ee ragga. Mo Farah oo u ordayay Britain ayaa wuxuu noqday qofkii ugu horreeyay oo Biritish ah oo ku guuleystay billadda dahabka ah ee lagu helo orodka 10,000 mitir.

8/4/2012 2:15 PM EST
Sabti, August 04, 2012 (HOL) - Xoghayaha amuuraha dibadda ee dalka Maraykanka Hillary Clinton ayaa maanta kulan la qaadatay hogaamiyayaasha Soomaalida.

8/4/2012 9:24 AM EST
Sabti, Ogoosto 04, 2012 (HOL) — Guddoomiyaha Urur Siyaasadeedka Umadda Dr Maxamed Cabdi Gaboose ayaa qabsoomi la’aanta Doorashooyinka golaha deegaanka ku eedeeyey madaxweynah Somaliland, maadaama oo ay waajib ku tahay buu yidhi inuu suurtogaliyo dhicitaanka doorashaddaasi.

8/4/2012 8:22 AM EST
Sabti, Ogoosto 04, 2012 (HOL) — Guddiga farasamada ee xulista baarlamaanka Soomaaliya ayaa ka dalbaday odayaasha dhaqanka ee ku howlan soo xulista xidhibaanada inay ugu dambeyn berri oo Axad ah soo gudbiyaan magacyada xildhibaannada baarlamaanka soo socda.

8/4/2012 8:00 AM EST
Sabti, Ogoosto 04, 2012 (HOL) — Bannaanbax ay dhigayeen dadweynaha ku nool degmada Huriwaa ee gobolka Banaadir ayaa maanta ka dhacay degmadaas, kasaoo ay uga cabanayeen dhac ay sheegeen inay ciidamada dowladda KMG ah geystaan.

8/4/2012 7:35 AM EST
Sabti, Ogoosto 04, 2012 (HOL) — Madaxweynaha Somaliland, Mudane, Axmed Maxamed Maxamuud (Siilaanyo) ayaa gudoomiyihii urur siyaasadeedka SSCD oo ka mid ahaa ururaddii ku hadhay qiimeyntii guddidda Diiwaangelintu samaysay u magacaabay wasiirudawlaha Nabadaynta Arrimaha goboladda Bariga Somaliland.

8/4/2012 7:26 AM EST
Sabti, Ogoosto 04, 2012 (HOL) — Howgallo ay ciidamada dowladda KMG iyo kuwa AMISOM ka sameynayeen labadii maalmood ee lasoo dhaafay waddada isku xirta Muqdisho iyo Afgooye ayaa waxay kusoo qab-qabteen askari dhaca u geysanayay dadka shacabka ah, iyadoo dhowr askari oo kalena lagu dilay howgalkaas.

8/4/2012 7:16 AM EST
Sabti, Ogoosto 04, 2012 (HOL) — Wararka aynu ka heleyno magaalada Kismaayo ee gobolka Jubbada hoose ayaa sheegaya in xalay xaafado badan oo magaaladaas ka tirsan laga maqlayay daryanka madaafiic iyo hub culus oo ka dhacayay dhanka deegaanno xeebta ku beegan ee hoostaga magaalada Kismaayo.

8/4/2012 7:07 AM EST
Sabti, Ogoosto 04, 2012 (HOL) — Ugu yaraan 14-qof ayaa ku dhintay dagaal culus oo ciidamada DKMG ah iyo kuwa Itoobiya oo dhinac ah iyo xoogagga Al-shabaab ku dhexmaray degmada Qansax-dheer ee gobolka Bay, iyadoo tiro inaas ka badanna ay ku dhaawacmeen.

8/4/2012 5:51 AM EST
Sabti, Ogoosto 04, 2012 (HOL) — Saraakiisha ciidamada DKMG ah ee Soomaaliya ayaa sheegay inay saakay la wareegeen iyagoo gacan milateri ka helaya ciidamada AMISOM garoonka diyaaradaha KM-50 ee gobolka Shabeellada hoose.

8/4/2012 4:55 AM EST
Sabti, August 04, 2012 (HOL) - Qarax shalay maqribkii ka dhacay xaafada Islii ee magaalada Nairobi, oo ah goob ay ku noolyiin kumannaan Soomaali ah ayaa waxaa kasoo baxaya warar is khilaafsan.