2/7/2023
Today from Hiiraan Online:  _
Wararka Maanta- Isniin, Aug 20, 2012
Ra'iisul Wasaaraha Soomaaliya oo sheegay in dowlada cusub ee la dhisayo ay xoogga saari doonto dib u dhiska dhaqaalaha dalka


Isniin, Ogoosto 20, 2012 (HOL) — Ra'iisul wasaaraha Soomaaliya, C/weli Maxamed Cali ayaa sheegay in dowladda cusub ee la dhisayo ay xoogga saari doonto dib u dhiska dhaqaalaha dalka 20-sano oo dagaallo ah kaddib; ayna la dagaalami doonto burcadbadeedda oo uu sheegay inay dhibaato ku hayaan dhaqaalaha caalamka.

Mudane Cabdiweli oo ka mid ah murashaxiinta u taagan xilka madaxnimo ee dalka oo lagu wado inay dhawaan doorashadiisu dhacdo ayaa sidoo kale wuxuu ka mid yahay 275-ta mudane ee ka tirsan baarlamaanka cusub ee Soomaaliya.

"Waxaa Soomaaliya ka jirta shaqo la'aan ba'an; taasoo keentay in dhallinyaro badan ay badda galaan," ayuu yiri ra'iisul wasaaraha DKMG ah ee Soomaaliya oo xilligeedu maanta ku eg-yahay.

Isagoo hadalkiisa sii wata ayuu mar kale yiri: "Waxaan u baahannahay jid cusub oo aan arrintan kaga fikirno, sidoo kale waxaan doonaynaa hab kale oo la taaban karo oo aan kula soconno xaaladaha suuqyada dunida mustaqbalka soo socda."

Soomaaliya oo dhaqaalaheeda lagu sheegay 5.9 billion oo dollarka Mareykanka ah ayaa waxay dhawaan heshiis ganacsiga xorta ah la saxiixatay dowladda Kenya, taasoo suurogelin karta in shirkado waaweyn ay maalgashi ku sameysteen.

Ra'iisul wasaaraha Soomaaliya wuxuu sheegay in Soomaaliya ay beesha calaamka uga baahan tahay inay gacan qabato si ay uga baxdo dhaqaale xumada baahday ee soo jirtay sannadaha badan.

"Dowladda cusub ee Federaalka Soomaaliya waxaa laga doonayaa inay heshiisyo laba geesood ah la gasho caalamka si fursad loogu helo in lala jaanqaado suuqyada calaamka," ayuu yiri C/weli Gaas.

Hadalkan ra'iisul wasaaraha Soomaaliya ee xilligiisu gabgabada yahay ayaa wuxuu kusoo beegmayaa xilli ay maanta kulan yeelanayaan xildhibaannada cusub ee dalka uu yeelanayo, kuwaasoo dhawaan dooran doona madaxweyne cusub.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/20/2012 12:48 PM EST
Isniin, August 20, 2012(HOL): Sidii aad kula socoteen wararkeennii hore waxaa hool ku yaalla garoonka diyaaradaha Muqdisho ka socotay dhaarinta xildhibaannada Baarlamaanka cusub ee Soomaaliya, kuwaasi oo tiradoodu dhammeyd 211 Mudane, waxaana dhaarintaas kaddib guddoomiye kumeel gaar ah loo doortay Muuse Shiikh Xasan Cabdulle Xasan.

8/20/2012 10:56 AM EST
Isniin, Ogoosto 20, 2012 (HOL) — Waxaa garoonka diyaaradaha Muqdisho goor dhow ka furmay shirka xildhibaannada cusub ee baarlamaanka Soomaaliya, kaasoo lagu dhaarin doono ayna ku dooran doonaan guddoomyaha kulammada si KMG ah u guddoomin doono inta laga dooranayo guddoomiye cusub.

8/20/2012 10:54 AM EST
Isniin, Ogoosto 20, 2012 (HOL) — Munaasabad si heer sare ah loosoo agaasimay oo laba loogu qaybinayay gobolka Hiiraan ayaa maanta lagu qabtay magaalada Muqdihso, iyadoo ay goojoog ka ahaayeen xildhibaanno iyo wasiirro kasoo jeeda gobolka Hiiraan.

8/20/2012 6:10 AM EST
Hay'adda Camuud (Amoud Foundation) ayaa soo gabagabeysay barnaamijyo isugu jiray afurin, biya-qaybin iyo kaalmo ay ugu talo-gashay ciidul-fidriga kuwaasoo ay ka qaybisay gobollada dalka qaarkood, iyadoo ay ka faa'iideysteen deeqahaas dad badan oo ay ku jireen indhoolayaal.

8/20/2012 5:29 AM EST
Isniin, Ogoosto 20, 2012 (HOL) — Kulan looga hadlayay ammaanka Muqdihso uuna shir guddoominayay madaxweynaha Soomaaliya, Shariif Sheekh Axmed ayaa xalay ka dhacay xarunta madaxtooyada Soomaaliya, waxaana kulankaas ka qayb-galay taliyaha guud ee AMISOM Andrew Gutti.

8/20/2012 3:25 AM EST
Isniin, Ogoosto 20, 2012 (HOL) — Munaasabadda Ciidul-fidriga ayaa si heer loogu dabaal-dagay magaalada Baydhabo ee xarunta gobolka Bay, taasoo lagu qabtay xarunta garoonka kubadda cagta ee Dr Ayuub, waxaana tukashada Salaadda ciidda ka qaygalay mas'uuliyiinta dowladda Soomaaliya ee gobolka Bay.

8/20/2012 2:47 AM EST
Isniin, Ogoosto 20, 2012 (HOL) — Ugu yaraan afar qof oo shacab ah ayaa ku dhaawacmay qaraxyo siyaabo kala duwan xalay uga dhacay degmooyinka Muqdisho kuwaasoo lagu weeraray booliiska Soomaaliya iyo booliiska AMISOM.

8/20/2012 2:44 AM EST
Isniin, Ogoosto 20, 2012 (HOL) — Iyadoo maanta ay ku eg-tahay xilliga DKMG ah ee Soomaaliya ayaa waxaa magaalada Muqdisho laga dareemayaa qabanqaabada kulankii ugu horreeyay oo ay yeelanayaan xidlhibaannada cusub ee baarlamaanka Soomaaliya, kuwaasoo isla maanta la dhaafin doono guddoomiye KMG ah dhexdooda ka xulanaya.