2/7/2023
Today from Hiiraan Online:  _
Wararka Maanta- Arbaco, Aug 15, 2012
Maraakiib dagaal oo saakay duqeeyay Magaalada Kismaayo iyo Dadka Reer Kismaayo oo barakac billaabay
Arbaco, Ogoosto 15, 2012 (HOL) — Maraakiibta dagaal ee ku sugan xeebta magaalada Kismaayo ayaa saaka aroortii markale gantaallo dhowr ah kusoo tuuray magaalada, iyadoona ay arintaasi keentay in dagaalyahannada Al-shabaab ay iyaguna dhankooda ku tuuraan madaafiic taasoo cabsi ku abuurtay dadka ku dhaqan Kismaayo.

Ma jiraan cid wax ku noqotay duqeyntii saaka, haseyeeshee Maraakiibta ayaa weli soo tuuraya madaafiic kusoo dhaceyso qeybo kamid ah magaalada.

Shacabka reer  Kismaayo ayaa maanta bilaabay bakarac xooggan iyagoo ka cabsi qaba in ay waxyeelo kasoo gaarto duqeymaha ay isweeydaarsanayaan xoogagga Al-shabaab iyo maraakiibta dagaal ee ku sugan xeebta Kismaayo.

Goobjooge ka gaabsaday in magaciisa la shaaciyo ayaa HOL u sheegay in magaalada ay saaka aroortii ku bilowdeen gantaallo ay soo tuurayeen maraakiib ku sugan meel aan sidaa uga fogeyn dekedda Kismaayo, wuxuuna sheegay in dagaalyahannada Al-shabaab ay iyaguna dhankooda tuurayaan hubka lidka diyaaradaha.

“Dhawaqa Madaafiicda ay ridayaan Maraakiibta waa mid aan loo adkeysan Karin, dhulka ayaa kula gariirayo markuu dhacayo,” ayuu goobjooguhu hadalkiisii raaciyay.

Shacabka reer Kismaayo intoodii awoodi kartay waxa ay bilaabeen in ay u barakacaan deegaanada Gosha ee dhanka waqooyi kaga began magaalada Kismaayo.

Sidoo kale waxa hawada magaalada Kismaayo ku dulwareegaya diyaarado nooca dagaalka ah, walow aysan jirin wax duqeymo ah oo ay geysteen.

Maraakiibtan ku sugan xeebta magaalada Kismaayo oo la aaminsayahay in ay leedahay dowladda Kenya ayaa duqeyntii ugu danbeeysay ee ay ka geysteen magaalada Kismayo waxa ku dhimatay sedex qof halka ay ku dhaawacmeen ilaa afar kale, kuwaasoo dhamaantood ahaa dad rayid ah.

Xasan Nuur, Hiiraan Online
[email protected]
Kismaayo, Soomaaliya











Click here
8/15/2012 3:38 PM EST
Shir aan caadi ahayn ayaa dalalka Islaamka uga furmay dalka Boqortooyada Sacuudiga. Shirkaas ayaa looga hadlayaa dhibaatada ka taagan dalka Suuriya.

8/15/2012 10:49 AM EST
Arbaco, August 15, 2012(HOL): Madaxweynaha Soomaaliya Shiikh Shariif Shiikh Axmed oo maanta ka soo laabtay dalka Boqortooyada Sacuudiga oo uu uga qeybgalay Shirkii waddamada Islaamka ayaa shir jaraa’id oo uu ku qabtay xarunta Madaxtooyada waxaa uu uga warramay hanjabaado loo jeediyay guddiga soo xulaya xubnaha baarlamaanka Soomaaliya, saameynta Xukuumadda Soomaaliya ay leedahay xilligan iyo waxyaabihii looga hadlay shirkii waddamada Islaamka ee uu ka qeybgalay.

8/15/2012 9:39 AM EST
Arbaco, Ogoosto, 15, 2012 (HOL)-Maleeshiyo watay dhawr gaadhi ayaa shalay galab afar qof oo xoolo dhaqato ah ku afduubtey meel u dhexeysa deegaanka Sool-Joogto iyo Buuhoodle, kuwaas oo la sheegay in lala tagay degmadda Buuhoodle oo hadda lagu hayo.

8/15/2012 9:36 AM EST
Danjiraha dawlada Britain u qaablisan arrimaha Soomaaliya Matt Baugh ayaa rajo ka muujiyay xaalada Soomaaliya, isagoo sheegay in ansixinta dastuurka iyo horumarka dhanka ammaanka ee la gaaray ay tahay calaamad muujinaysa in Soomaaliya ay soo hagaagayso.

8/15/2012 7:53 AM EST
Arbaco, Ogoosto 15, 2012 (HOL) — Tifaftirhii laanta Af-Soomaaliga ee BBC-da, Yuusuf Garaad Cumar Axmed ayaa maanta kaga dhawaaqay Muqdisho inuu yahay murashax u taagan xilka madaxnimo ee Soomaaliya, isagoo sheegay in haddii uu ku guuleysto doorashada uu ka shaqeyn doono nabadda iyo dib u heshiisiinta.

8/15/2012 7:20 AM EST
Arbaco, Ogoosto 15, 2012 (HOL) — Wararka aynu ka heleyno deegaanka Hoosingoow ee gobolka jubada Hoose ayaa sheegaya in deegaan lagu magacaabo Waraaq oo qiyaastii 30 KM u jira deegaanka Hoosingoow ay ku dagaalameen laba beelood, kadib markii uu soo dhexgalay muran ku saabsan dhul.

8/15/2012 7:12 AM EST
Arbaco, Ogoosto 15, 2012 (HOL) — Xoghayaha guud ee Qaramada Midoobay, Ban Ki-Moon ayaa ka digay Talaadadii shalay inuu dib u dhac ku yimaado xulista xubnaha baarlamaanka KMG ah ee Soomaaliya.

8/15/2012 6:42 AM EST
Arbaco, Ogoosto 15, 2012 (HOL) — Magaalada Baladweyne ee xarunta gobolka Hiiraan ayaa galinkii danbe ee maalintii shalay lagu soo gabagabeeyay tartan kubada cagta ah oo lagu maamuusayay ama loo dhigay bisha barakeysan ee Ramadaan.

8/15/2012 3:56 AM EST
Arbaco, Ogoosto 15, 2012 (HOL) — Kooxo hubeysan ayaa xalay ku dilay degmada Yaaqshiid ee gobolka Banaadir guddoomiyihii Suuq Bacaad oo ah suuqa labaad ee ugu weyn Muqdisho, Siciid Fiidoow iyadoo lagu wado in maydkiisa maanta lagu aaso qubuuraha Jeneraal daa'uud ee isla degmadaas.