12/6/2021
Today from Hiiraan Online:  _
Wararka Maanta- Isniin, Aug 13, 2012
Danjire Mahiga oo sheegay in Toddobaadka soo socda lasoo dooran doono Afhayeenka Baarlmaanka iyo Madaxweyne
Isniin, Ogoosto 13, 2012 (HOL) — Dajire Augustine Mahiga oo ah ergayga xoghayaha guud ee Qaramada Midoobay uga wakiilka ah arrimaha Soomaaliya ayaa sheegay in toddobaadka soo socda lasoo dooran doono afhayeenka baarlamaanka, ku xigeennadiisa iyo madaxweynaha.

Ergayga ayaa sheegay inay rajo weyn ka qabaan todobaadkan in lagu soo dhameystio xulidda baarlamaanka cusub ee Soomaaliya si ay howsha baarlamaanka u billaabato toddobaadka soo socda.

"Waxaynu ku jirnaa dhameystirka xilliga KMG ah, toddobaadkan waxaa la hirgelin doonaa baarlamaan ka kooban 275 xubnood, kuwaasoo toddobaadka soo socda soo dooran dooran doona guddoomiyaha, ku xigeennadiisa iyo madaxweyne, waxaana ku rajo weynnahay in wax walba lagu dhameystiri doono waqtigii harsan," ayuu yiri Mahiga oo wareysi siinayay BBC-da.

Danjire Mahiga oo la weydiiyay inay baqdin ka qabaan in waqtiga uu dib u dhaco, maadaama xidhibaanno ka mid ah kuwa lasoo xulay dib loogu celiyay odayaasha, ayaa wuxuu sheegay in la haysto waqti ku filan in howsha dhiman lagu qabto, isagoo sheegay in odayaashu ay hayaan magacyada dad ay ku bedeli karaan kuwa la diiday.

Sidoo kale, su'aal kale oo ahayd inay jirto qaylo-dhaan ka timid dadweyaha oo ku saabsanayd laaluush bixin iyo hanjabaad, ayaa kaga jawaabay: "waxaan rajo weyn ku qabnaa in dowladda soo socota ay sameyn doonto aasaasyo sharci ah oo tallaabo looga qaadi doono arrimahan loogu talo-galay in la isku hortaago in la dhameystiro xilliga KMG ah."

Dajire Mahiga wuxuu sheegay inay iyagu horay u caddeeyeen in musuqmaasuqa jira ay kaga jawaabayaan cunno-qabteyn, balse ma uusan sheegin go'aanka laga filayo inay dowladda KMG ah ka qaato arrintan.

"Waxaan ku kalsoonnahay inay jiraan dad aad u badan oo ceeb ka saliim ah iyadoo baaritaannada iyo tijaabooyinka la marsiinayo murashaxiinta baarlamanka ay tahay sidii lagu badbaadin lahaa sharafta iyo hannaanka daacadnimada, waxaana leennahay guddi farsamo, mid xulid iyo kormeerayaal caalam ah kuwaasoo oo runtii tilmaamay magacyo xoogaa ah," ayuu danjire Mahiga kaga jawaabay su'aal ahayd kalsoonida lagu qabi karo xildhibaanno laaluush ku yimid.

Wakiilku wuxuu sheegay in xildhibaannada maray imtixaanaadka iyo xaqiijinta ay noqon doonaan kuwo lagu kalsoon yahay, isagoo xusay inay awood u yeelanayaan inay dhex istaagaan gudaha baarlamaanka soo socda iyo inay gaarno go'aamo horseedi doona dowlad wanaag.

Ugu dameyn, mar uu ka hadlay ammaanka ayuu sheegay in xaaladda ammaan ee Muqdisho ay tahay hadda tahay mid wanaagsan, isagoo nasiib-darro ku tilmaamay dilal maalmihii lasoo dhaafay ka dhacay Muqdisho, wuxuuna xusay in ammaanka ay gacanta ku hayaan ciidamada AMISOM iyo iyo kuwa DKMG ah.

Hadalka danjire Mahiga ayaa kusoo beegmaya iyadoo dadaal xooggan loogu jiro sidii xildhibaannada baarlamaanka loogu dhawaaqi lahaa, waxayna guddiga ku howlan xulista xildhibaannada ay sheegeen inay ku jiraan kala saarista magacyada xubnaha loosoo gudbiyay.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
8/13/2012 9:00 AM EST
Isniin, Ogoosto 13, 2012 (HOL) — Madaxweynaha DKMG Soomaaaliya, Shariif Sheekh Axmed ayaa maanta la kulmay guddiga xalinta khilaafaadka ee ku kulansan Muqdisho, isagoo ugu baaqay guddiga in la xalliyo cabashooyin ku saabsan musuqmaasuqa ee beelaha qaarkood soo gudbiyaan.

8/13/2012 5:18 AM EST
Isniin, Ogoosto 13, 2012 (HOL) — Wararka aynu ka heleyno magaalada Afmadow ee gobolka Jubada hoose ayaa sheegaya in xalay duleedka degmadaasi ay madaafiic isku weeydaarsadeen ciidamada dowladda, kuwa Kenya iyo Al-shabaab.

8/13/2012 5:08 AM EST
Isniin, Ogoosto 13, 2012 (HOL) — Komishanka Doorashooyinka Somaliland ayaa sheegay in doorashooyinka golaha deegaanka Somaliland ay dhici doonaan maalinimadda Arbacadda ee bisha November 28, 2012

8/13/2012 5:00 AM EST
Isniin, Ogoosto 13, 2012 (HOL) — Ciidammo ka tirsan kuwa DKMG ah ee Soomaaliya ayaa shalay gallinkii dambe ku dilay degmada Yaaqshiid ee gobolka Banaadir mid ka mid ah suxufiyiinta madaxa-bannaan ee Muqdisho ku sugan.

8/13/2012 4:45 AM EST
Isniin, Ogoosto 13, 2012 (HOL) — Madaxweynaha Somaliland Md: Axmed Maxamed Maxamuud Siillaanyo, ayaa hambalyo u diray guusha weyn ee uu soo hooyey Orodyahanka caanbaxay ee Maxamed Faarax ee u orda dalka Ingiriiska.

8/13/2012 4:36 AM EST
Isniin, Ogoosto 13, 2012 (HOL) — Kooxo bastoolado ku hubeysan ayaa bartamaha magaalada Mandheera ee dalka Kenya ku toogtay baadari Kenyan ah, iyadoo warar kala duwan ay kasoo baxayaan baadariga la dilay halka uu ka yimid.

8/13/2012 4:12 AM EST
Isniin, Ogoosto 13, 2012 (HOL) — Dab xooggan ayaa khasaare xooggan ka geystay suuqa xerada qoxootigsa IFO oo ka mid ah xeryaha ku yaalla Dhadhaab, halkaasoo ay ku jiraan in ka badan Nus Malyuun qof oo u badan Soomaali.

8/13/2012 3:57 AM EST
Isniin, Ogoosto 13, 2012 (HOL) — Afhayeenka baarlamaanka KMG ah ee uu xilligiisu gabagabada yahay, Shariif Xasan Sheekh Aadan ayaa sheegay in haddii loo doorto xilka madaxnimo ee Soomaaliya uu dalka ku hoggaamin doono cadaalad.

8/13/2012 3:48 AM EST
Isniin, Ogoosto 13, 2012 (HOL) — Dowladda Uganda ayaa sheegaty in tiro ka mid ah ciidamadeeda iyo diyaaradaha nooca qummaatiga u kaca ah ee helicopter-ka loo yaqaan oo ay u dirtay Soomaaliya si howgalka socda uga qaybqaataan lagu waayay hawada dalka Kenya.