11/28/2021
Today from Hiiraan Online:  _
Wararka Maanta- Isniin, Aug 13, 2012
Ciidammo ka tirsan kuwa Dowladda KMG Soomaaliya oo Muqdisho ku dilay Suxufi
Isniin, Ogoosto 13, 2012 (HOL) — Ciidammo ka tirsan kuwa DKMG ah ee Soomaaliya ayaa shalay gallinkii dambe ku dilay degmada Yaaqshiid ee gobolka Banaadir mid ka mid ah suxufiyiinta madaxa-bannaan ee Muqdisho ku sugan.

Marxuumka la dilay oo lagu magacaabi jiray, Maxamed Nuur Buneyste ayaa wuxuu ka mid ahaa wariyeyaashii nabadgalyada darrada awgeed uga barakacay xarunta Soomaaliya, isagoo dhawaan kusoo laabtay, kaddib markii ay hooyadiis xanuunsatay.

Suxufiyiin ay si wanaagsan isku yaqaanneen wariyaha la dilay ayaa sheegay inuu ahaa wariye howlkar ah, uuna doonayay inuu dib ugu laabto dalka Kenya, mana jirin goob warbaahineed oo uu xilligan la shaqeynayay.

Goobjoogayaal ayaa sheegay ay ku dhacday xabad ay rideen ciidamada dowaldda KMG ah oo ku sugnaa meel ku dhow halka uu ku sugnaa oo ahayd goob ciyaar lagu daawanayay, inkastoo wararka qaarkood ay sheegayaan inuu agagaarka gurigiisa ku sugnaa.

Wariyahan ayaa wuxuu noqonayaa kii labaad oo muddo 12-saacadood gudahodo ah lagu dilo Muqdisho, iyadoo aroortii hore ee shalay lagu dilay degmada Dharkeynley ee gobolka Banaadir, Yuusuf Cali Cusmaan (Yuusuf Farey) oo ka mid ahaa suxufiyiinta waaweyn ee ka howlgala Muqdisho.

Dowladda Soomaaliya kama hadlin dilka wariyahan gallinkii dambe ee shalay ay dilka u geysteen askar ka tirsan kuwa dowladda Soomaaliya, iyadoo dowladdu ay si aad ah u cambaareysay dilkii Yuusuf Farey. Waxaana lagu wadaa wariye Buneyste in maanta lagu aaso Muqdisho.

Tan markii uu billowday sannadkan ayaa waxaa Soomaaliya lagu dilay toddoba wariye oo afar ka mid ah lagu dilay magaalada Muqdisho, midna lagu dilay degmada Baladweyne halka labada kalena lagu dilay degmada Gaalkacyo ee gobolka Mudug.

Yuusuf Farey iyo Buneyste ayaa waxay noqonayaan labadii wariye ee maalin qura lagu dilo Muqdisho, marka laga reebo Mahad Axmed Cilmi iyo Cali Iimaan Sharma'arke oo saacado gudahood lagu dilay Muqdisho 11-kii bishii Ogoosto ee sannadkii 2007.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
8/13/2012 9:01 AM EST
Isniin, Ogoosto 13, 2012 (HOL) — Dajire Augustine Mahiga oo ah ergayga xoghayaha guud ee Qaramada Midoobay uga wakiilka ah arrimaha Soomaaliya ayaa sheegay in toddobaadka soo socda lasoo dooran doono afhayeenka baarlamaanka, ku xigeennadiisa iyo madaxweynaha.

8/13/2012 9:00 AM EST
Isniin, Ogoosto 13, 2012 (HOL) — Madaxweynaha DKMG Soomaaaliya, Shariif Sheekh Axmed ayaa maanta la kulmay guddiga xalinta khilaafaadka ee ku kulansan Muqdisho, isagoo ugu baaqay guddiga in la xalliyo cabashooyin ku saabsan musuqmaasuqa ee beelaha qaarkood soo gudbiyaan.

8/13/2012 5:18 AM EST
Isniin, Ogoosto 13, 2012 (HOL) — Wararka aynu ka heleyno magaalada Afmadow ee gobolka Jubada hoose ayaa sheegaya in xalay duleedka degmadaasi ay madaafiic isku weeydaarsadeen ciidamada dowladda, kuwa Kenya iyo Al-shabaab.

8/13/2012 5:08 AM EST
Isniin, Ogoosto 13, 2012 (HOL) — Komishanka Doorashooyinka Somaliland ayaa sheegay in doorashooyinka golaha deegaanka Somaliland ay dhici doonaan maalinimadda Arbacadda ee bisha November 28, 2012

8/13/2012 4:45 AM EST
Isniin, Ogoosto 13, 2012 (HOL) — Madaxweynaha Somaliland Md: Axmed Maxamed Maxamuud Siillaanyo, ayaa hambalyo u diray guusha weyn ee uu soo hooyey Orodyahanka caanbaxay ee Maxamed Faarax ee u orda dalka Ingiriiska.

8/13/2012 4:36 AM EST
Isniin, Ogoosto 13, 2012 (HOL) — Kooxo bastoolado ku hubeysan ayaa bartamaha magaalada Mandheera ee dalka Kenya ku toogtay baadari Kenyan ah, iyadoo warar kala duwan ay kasoo baxayaan baadariga la dilay halka uu ka yimid.

8/13/2012 4:12 AM EST
Isniin, Ogoosto 13, 2012 (HOL) — Dab xooggan ayaa khasaare xooggan ka geystay suuqa xerada qoxootigsa IFO oo ka mid ah xeryaha ku yaalla Dhadhaab, halkaasoo ay ku jiraan in ka badan Nus Malyuun qof oo u badan Soomaali.

8/13/2012 3:57 AM EST
Isniin, Ogoosto 13, 2012 (HOL) — Afhayeenka baarlamaanka KMG ah ee uu xilligiisu gabagabada yahay, Shariif Xasan Sheekh Aadan ayaa sheegay in haddii loo doorto xilka madaxnimo ee Soomaaliya uu dalka ku hoggaamin doono cadaalad.

8/13/2012 3:48 AM EST
Isniin, Ogoosto 13, 2012 (HOL) — Dowladda Uganda ayaa sheegaty in tiro ka mid ah ciidamadeeda iyo diyaaradaha nooca qummaatiga u kaca ah ee helicopter-ka loo yaqaan oo ay u dirtay Soomaaliya si howgalka socda uga qaybqaataan lagu waayay hawada dalka Kenya.