12/6/2021
Today from Hiiraan Online:  _
Wararka Maanta- Sabti, Aug 11, 2012
Qaramada Midoobay, Midowga Afrika iyo Ururka Goboleedka IGAD oo uga digay in la Musuqmaasuqo Xulista Xildhibaannada
Sabti, Ogoosto 11, 2012 (HOL) — Ururka Midowga Afrika, Qaramada Midoobay iyo urur goboleedka IGAD ayaa warbixin ay si wadajir ah u soo saareen ayaa waxay ugu digeen siyaasiyiinta Soomaalida doonaya in lasoo xulo xubno iyaga taageersan.

Qoraalka kasoo baxay ururradan ayaa lagu sheegay in tallaabo deg-deg laga qaadi doono siyaasiyiin aan la magacaabin balse la sheegay inay gacmaha kula jiraan xulista baarlamaanka cusub ee Soomaaliya.

“Waxaan heleynaa warar lagu kalsoon yahay oo sheegaya in koox siyaasiyiin ah ay ku hawlan yihiin laaluush bixin, cabsi-saaris iyo in qaab aan caddaalad ahayn lagu soo xulo xildhibaanada baarlamaanka Soomaaliya, kuwaasoo laga sugayo inay soo doortaan guddoomiyaha baarlamaanka ku xigeennadiisa iyo madaxweynaha,” ayaa lagu yiri war saxaafadeed wadajir ah oo ay soo saareen ururradan.

Sidoo kale, warsaxaafadeedka ayaa lagu caddeeyay in siyaasiyiinta qaarkood ay hanjabaad iyo digniino u direen odayaasha dhaqanka iyo guddiga ku howlan xulista baarlamaanka cusub ee Soomaaliya, kaddib markii ay diideen qaarkood inay lacago ka qaataan oo ay qoraan xildhibaanno ay wataan siyaasiyiintaas.

“Waxaan ka walaacsan nahay in xubnaha 135 oday dhaqameed iyo guddiga xulista baarlamaanka loo jeediyay hanjabaad ka dhan ah amnigooda,” ayaa lagu yiri warka qoraalka ee wadajirka ah.

Warsaxaafadeedka waxaa lagu sheegay in shakhsiyaadka arrimahan ku lug leh laga qaadayo tallaabooyin isugu jira: In laga joojiyo qabashada xil dowladeed iyo In laga qaado tallaabooyin gaar ah oo lagula xisaabtamayo dambiyadii ay ka galeen dadka Soomaaliyeed.

Siyaasiyiinta qaarkood ayaa lagu eedeeyay inay doonayaan inay dib u dhigaan hawlaha doorashada iyo xulista baarlamaanka cusub si ay meesha uga saaraan in haweenka ay 30% ku yeeshaan xubnaha baarlamaanka soo socda. Iyadoo sidoo kale lagu eedeeyay siyaasiyiintaas inay ishortaag ku sameeynayaan in dad aqoon leh ay ka mid noqdaan baarlamaanka.

Ururradan ayaa waxay ugu baaqeen guddiga xulista baarlamaanka inay ka reebaan liiska xildhibaannada kuwa aan aqoonta lahayn ama dambiilayaasha ah ee dhibka u geystay shacabka Soomaaliyeed.

“Lama aqbali doono in dib loo rido waqtigii loogu talogalay in baarlamaanka cusub lasoo xulo lana qaban lahaa doorashooyinka, lamana ogolaan karo in baarlamaanka cusub looga faa’ideysto laaluush iyo wax-is-dabamarin,” ayaa warsaxaafadeedka ay soo saareen ururradan lagu soo gabgabeeyay.

Digniintan ayaa waxay imaanaysaa iyadoo ay socdaan kala saarista liiska xubnaha cusub ee ka mid noqonaya baarlamaanka Soomaaliya, iyadoo dhowr jeer oo hore la sheegay inay jiraan faragelinno lagu hayo xulista xildhibaannada cusub.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
8/11/2012 7:35 PM EST
Sabti, Agoosto 11, 2012 (HOL) -Diyaarado aan la garaneyn cid iska leh ayaa Caawa salaadii maqrib kadib duqeymo xooggan ku bilaabay magaalada Kismaayo, iyadoona gantaallada ay tuurayaan diyaaradahaasi ay ku dhaceen xaafado katirsan magaalada Kismaayo.

8/11/2012 1:23 PM EST
Wasaarada waxbarashada Soomaaliya ayaa soo maanta soo bandhigtay makiinad casri ah oo loogu talagalay soo saarista shahaadooyinka asalka ah, si looga hortago shahaadooyinka faalsada ah ee aysan waxba ka ogayn dawlada Soomaaliya.

8/11/2012 9:06 AM EST
Sabti, Ogoosto 11, 2012 (HOL) — Wararka aynu ka heleyno magaalada Dhoobleey ee gobolka Jubada Hoose ayaa sheegaya in gudaha deegaankaasi ay israsaaseyn xooggan ku dhexmartay askar kawada tirsan ciidamada dowladda KMG ee gobolka Jubbada Hoose.

8/11/2012 8:57 AM EST
Sabti, Ogoosto 11, 2012 (HOL) — Guddiga xulista baarlamaanka cusub ee Soomaaliya ayaa sheegay maanta inay meel garbo-gabo ah u marayso liiska xildhibaannada baarlamaanka soo soo socda ee Soomaaliya, iyagoo sheegay inay xubnahan ku jiraan kuwo aan buuxin shuruudihii laga doonayay ayna dib ugu celin doonaan oday dhaqameedyadii soo xulay.

8/11/2012 8:42 AM EST
Sabti, Ogoosto 11, 2012 (HOL) — Xukuumadda Somaliland iyo weftiga uu hogaaminayo gudoomiyaha SSC Saleebaan Ciise Xaglo Toosiye ayaa isku afgartay qodobo la sheegay in lagu nabadaynayo deegaanka Buuhoodle ee baryihii u dambeeyey colaaddu ka taagnayd.

8/11/2012 8:39 AM EST
Sabti, Ogoosto 11, 2012 (HOL) — Murashax ka mid ah kuwa u taagan doorashada madaxnimo ee Soomaaliya oo maanta shir jaraa'id ku qabtay magaalada Muqdisho ayaa ku hanjabay inay qaban doonaan dibadbaxyo ay uga horjeedaan qorshha ay madaxda dowaldda KMG ah ku doonayaan inay ku hagaan doorashooyinka.

8/11/2012 7:46 AM EST
Sabti, Ogoosto 11, 2012 (HOL) — Madaxweynaha Soomaaliya, Shariif Sheekh Axmed ayaa billad abaalmarin ah guddoonsiiyay madaxa haya'dda safamlka ah ee Kisme Yok Mu oo ka mid ah hay'adaha Turkiga ee ka howglala Muqdisho.

8/11/2012 7:23 AM EST
Sabti, Ogoosto 11, 2012 (HOL) — Golaha Guurtidda oo fadhi aan caadi ahayn iskugu yimid ayaa maanta cod aqlabiyad ah ku meel mariyey wax ka bedelkii iyo kaabistii lagu sameeyey xeerka doorashooyinka Somaliland.

8/11/2012 7:20 AM EST
Sabti, Ogoosto 11, 2012 (HOL) — Ururka Midowga Yurub ayaa sheegay inay walaac xooggan ka qabaan habka lagu soo xulayo xildhibaannada cusub ee baarlamaanka Soomaaliya, iyagoo ka digay in la musuq-masuqo qaabka xulista xildhibaannada.

8/11/2012 6:53 AM EST
Sabti, Ogoosto 11, 2012 (HOL) — Labaatan qoys oo ah agoomaha ku dhaqan xaafadda Daami ee magaaladda Hargeysa ayaa loo qaybiyey laba kun ($2000) oo doollarka Maraykank ah si caruurtaasi looga farxiyo maalinta Iidda, isla markaana ay ula iidi lahaayeen dadweynaha islaamka.

8/11/2012 3:41 AM EST
Sabti, Ogoosto 11, 2012 (HOL) — Ugu yaraan shan ruux oo ka mid ah dhinacyadii dagaalamay ayaa ku dhintay dagaal muddo kooban socday oo ciidamada DKMG ah iyo kuwa Al-shabaab ku dhexmaray xalay deegaanka Ceelasha biyaha ee duleedka Muqdisho.

8/11/2012 3:36 AM EST
Sabti, Ogoosto 11, 2012 (HOL) — Iyadoo ay fooda nagu soo heyso ciidda barakeysan ee Ciidul Fidirga ayaa Diyaargarow aad u weyn oo ku aadan munaasabadaasi laga dareemayaa magaalada Kismaayo ee xarunta gobolka Jubada Hoose.