11/28/2021
Today from Hiiraan Online:  _
Wararka Maanta- Arbaco, Aug 1 , 2012
Jen. Cabdi Qeybdiid oo loo doortay Madaxweynenimada Galmudug


Khamiis, August 02, 2012(HOL): Magaalada Gaalkacyo ee Gobolka Mudug ayaa waxaa maanta ka dhacday doorashada madaxweynenimada maamulka Galmudug, taasi oo ay u tartameen labo musharrax oo xilkaas isu soo taagay.

Musharrixiinta xilka madaxweynenimada Galmudug u tartamay oo kala ah Jen. Cabdi Xasan Cawaale Qeybdiid iyo Cabdisamad Nuur Guuleed ayaa waxaa codeyn qarsoodi ah ku kala saaray Xildhibaannada Maamulka Galmudug.

Wareeggii koowaad ee codbixinta ayuu xilka madaxweynenimada Galmudug ku guuleystay Jen. Cabdi Xasan Cawaale Qeybdiid oo helay codadka ugu badan ee xubnaha Baarlamaanka maamul goboleedka Galmudug.

Intaas kaddib waxaa  natiijada codbixinta doorashada ku dhawaaqay Guddoomiyaha Maxkamadda Sare ee maamulka Galmudug Shiikh Axmed Shiikh Yuusuf Ilka-dahab oo sheegay in doorashadu ay u dhacday si ansax ah.

Musharrixii la tartamay Jen. Cabdi Qeybdiid ee Cabdisamad Nuur Guuleed ayaa isna si aqlabiyad ah loogu doortay xilka madaxweyne ku xigeenka Galmudug, isagoo xilkaasna horay u hayay.

Goobta ay doorashada ka dhacday ayaa waxaa ammaankeeda si buuxda u adkeynayay ciidamada ammaanka Galmudug, waxaana goob-joog-ka ahaa doorashada qeybaha kala duwan ee bulshada ka soo jeedda deegaannada Galmudug.

Markii ay doorashada soo gebagebowday ayaa magaalada Gaalkacyo, gaar ahaan qeybta hoos timaada maamulka Galmudug waxaa ka dhacay dibadbax lagu taageerayo doorashada madaxweynenimo ee Galmudug.

Dhanka kalena, Madaxweynihii hore ee Galmudug Col. Maxamed Axmed Caalin oo arrimo caafimaad u jooga magaalada Nairobi ee caasimadda u ah dalka Kenya oo u warramay TV-ga Universal ayaa wuxuu ka soo horjeestay doorashadii maanta ka dhacday Gaalkacyo ee Jen. Cabdi Qeybdiid madaxweynenimada Galmudug loogu doortay, wuxuuna sheegay in aysan doorashadaas ahayn mid la isku raacsan yahay, wuxuuna sheegay in uu dhawaan ka digay in la qabto doorasho kala geyneysa dadka deegaannada Galmudug, wuxuuna carrabka ku dhuftay in uu talo ku bixiyay in inta aanan la qaban doorasho marka hore la xalliyo khilaafaad ka dhex jira Galmudug.

Col. Caalin oo sheegay in uu muddo 6 sanadood ah ka soo shaqeynayay horumarka Galmudug ayaa wuxuu dhanka kale sheegay in uu yahay madaxweynaha sharciga ah ee Galmudug, wuxuuna intaas ku daray in uu Nairobi u joogo ka qeybgalka shir ay saxiixayaasha Roadmap-ka ku yeelan doonaan halkaas iyo arrimo nasasho ah.


Salaad Iidow Xasan (Xiis), Hiiraan Online
[email protected]













Click here
8/1/2012 9:48 AM EST
Arbaco, Ogoosto 01, 2012 (HOL) — Wakiilka xoghayaha guud Qaramada Midoobay ee arrimaha Soomaaliya, danjire Augustine Mahiga ayaa sheegay inay jiraan xubno doonaya in lasoo magacaabo xildhibaanno ay iyagu wataan, isagoo sheegay inaan la aqbali karin arrinaas.

8/1/2012 9:27 AM EST
Arbaco, August 01, 2012 (HOL) - Safaarada Soomaalida ayaa bilowday deeq raashin ah oo la gaarsiinayo dadka saboolka ah ee ku nool xaafada Islii ee Soomaalidu ay ku badantahay.

8/1/2012 8:47 AM EST
Arbaco, Ogoosto 01, 2012 (HOL) — Madaxweynaha DKMG ah ee Soomaaliya, Shariif Sheekh Axmed iyo wafdi uu hoggaaminayo ayaa maanta tagay degmada Balcad ee gobolka Shabeellada dhexe oo 30-km dhinaca waqooyi kaga beegan Muqdisho.

8/1/2012 7:11 AM EST
Arbaco, Ogoosto 01, 2012 (HOL) — Munaasabad siweyn loo soo qaban qaabiyay kana dhacday saldhiga baliiska magaalada Baladweyne ee xarunta gobollka Hiiraan ayaa waxaa ka qeyb-galay guddoomiyaha gobollka Hiiraan, saraakiisha dowladda Itoobiya, iyo taliska ciidamada Jabuuti ee AMISOM.

8/1/2012 7:05 AM EST
Arbaco, Ogoosto 01, 2012 (HOL) — Dhamaan deegaanada Puntland waxaa maanta si weyn looga xusay, 1-da August oo ku beegan sanad guuradii 14-aad ee kasoo wareegtey xiligii dhidibada loo taagay maamul goboleedka Soomaaliyeed ee Puntland sanadkii 1998.

8/1/2012 5:09 AM EST
Arbaco, Ogoosto 01, 2012 (HOL) — Ergada ansixinta dastuurka qabyadaha ee Soomaaliya ayaa ku ansixiyay dastuurka cod aqlabiyad ah iyadoo ay jireen xubno ka diiday ansixinta iyo kuwo ka aamusay.

8/1/2012 4:32 AM EST
Arbaco, Ogoosto 01, 2012 (HOL) — Diyaarado nooca dagaalka oo aan illaa imika la garaneyn cida iska leh ayaa shalay ilaa maanta si weyn ugu dulwareegaya magaalada Kismaayo, iyadoona diyaaradahani ay qalqal ku abuureen shacabaka ku dhaqan magaalada Kismaayo ee xarunta gobolka jubbada hoose.

8/1/2012 4:04 AM EST
Arbaco, Ogoosto 01, 2012 (HOL) — Ugu yaraan 10-qof oo dhinacyadii dagaalamay ka tirsan ayaa ku dhintay dagaal culus oo ciidamada dowladda KMG ah, kuwa Kenya iyo xoogagga Al-shabaab ku dhexmarya deegaanka Faafax-dhuun ee gobolka Gedo.

8/1/2012 3:17 AM EST
Arbaco, Ogoosto 01, 2012 (HOL) — Halkan hoose ka daawo(Live)shirka golaha ansixinta DASTUURKA qabyada ah ee Soomaaliya, iyadoo codeynta oo gacan taag ah ay ka billaabatay xarunta uu shirku ka socdo.

8/1/2012 3:01 AM EST
Arbaco, Ogoosto 01, 2012 (HOL) — Weerarro ismiidaamin ah ayaa lagu qaaday maanta xarunta uu shirka uga socday ergooyinka ansixinta dastuurka, waxaana mas'uuliyiin ka tirsan dowladda ay sheegeen inay ku dhinteen qaraxyadaas labadii qof ee xambaarsanaa, sidoo kalena aysan jirin cid kale oo ay dhimasho kasoo gaaray.